ފިޝަރީޒް މިނިސްޓަރު އުޅުއްވަނީ ބޮޑު ކަންނެލީގެ މަސްވެރިކަން މުޅިން ނެތި ކޮށްލަން: އިމްރާން
މަސްވެރިން ގޮވާލާ ޑިމާންޑްތަކުގެ ތެރޭގައި ރައީސް މުއިއްޒުގެ ވައުދުގައިވާ ގޮތައް ސަރުކާރުން ކަންނެލި ގަންނަން ފެށުމާއި ކަންނެލީގެ އަގު 80 އާއި 100 ރުފިޔާ އާ ދެމެދު ހިފެހެއްޓުމާއި ބޭސް ރޭޓުގައި ތެލާއި އައިސް ލިބޭނެ އިންތިޒާމް ހަމަޖެއްސުން ހިމެނޭ.
މަސްވެރިން ބޭއްވި ނޫސްވެރިންގެ ބައްދަލުވުމުގެ ތެރެއިން ނަގާފައިވާ ފޮޓޯ އެއް : 13.12.2025
މަސްވެރިންގެ އިހުތިޖާޖު މެދުކަނޑާ ނުލާނެ ކަމަށާއި މަސްވެރިންގެ އަޑު ނީވޭ ނަމަ ރައީސް ޑރ.މުހައްމަދު މުއިއްޒު އާއި ފިޝަރީޒް މިނިސްޓަރ އަހުމަދު ޝިޔާމް އިސްތިއުފާ ދެއްވުމަށް މަސްވެރިން ގޮވާލައިފި އެވެ.
މަސްވެރިން އެހެން ގޮވާލީ ބޮޑު ކަންނެލި މަސްވެެރިންނަށްވީ ވައުދުތައް ނުފުއްދާތީ ކަންބޮޑުވުން ފާޅުކޮށް ކުރަމުންދާ އިހުތިޖާޖާއި މަސްވެރިންގެ ޑިމާންޑްތަކާއި މެދު މައުލޫމާތު ދިނުމަށް ހޮނިހިރު ދުވަހު ބޭއްވި ނޫސްވެރިންގެ ބައްދަލުވުމެއްގަ އެވެ.
ބޮޑު ކަންނެލި މަސްވެރިންގެ ޔޫނިއަންގެ ނައިބު ރައީސް އިމްރާން މުހައްމަދު ވިދާޅުވީ ޝިޔާމް މަސައްކަތް ކުރައްވަނީ ހުރިހާ ކަންނެލި މަސްވެރިކަން ކުރާ ދޯނިތައް ހުއްޓުވާލަން ކަމަށް ޤަބޫލުކުރެވޭ ކަމަށެވެ. އަދި ލޯންގް ލޭން މަސްވެރިކަމަށް ޖާގަ ހޯދާ ދޭން މަސައްކަތް ކުރާ ކަަމަށް އޭނާ ތުހުމަތު ކުރެއްވި އެވެ.
"ކުރިން 300 އެއްހާ ކަންނެލި ދޯނި އޮތް. މިހާރު 100 ހަމަ ނުވޭ. މިނިސްޓަރ އުޅުއްވަނީ މުޅި ސިނާއަތް އެއްކޮށް ހަލާކުކޮށްލަން." އިމްރާން ވިދާޅުވި އެވެ.
މީ ގެ އިތުރުން މަސްވެރިން ބުނީ މި އިހުތިޖާޖްތަކަކީ ސިޔާސީ ކަމެއް ކަމަށް ސަރުކާރުން ބުނަނީ މަސްވެރިންގެ އަޑު އަހަން ބޭނުން ނުވާތީ ކަމަށެވެ.
މި ސަރުކާރުން ވެފައިވާ ވައުދުތައް ފުއްދަން އެކަށީގެންވާ ވަގުތު ދެވިފައިވާ ކަމަށް ޤަބޫލުކުރާ ކަމަށް މަސްވެރިން ވަނީ ބުނެފަ އެވެ. މަސްވެރިން ވަނީ ބޮޑުކަންނެލި މަސްވެރިންނާ މެދު މިނިސްޓަރ ޝިޔާމް އަމަލުކުރައްވާ ގޮތަށް ވަރަށް ބޮޑަށް ފާޑު ކިޔާފަ އެވެ. އެ ސިނާއަތް ނެތިކޮށްލުމަށް ވަޒީރު އިސްވެ ހުންނަވައިގެން މަސައްކަތް ކުރާ ކަމަށް މަސްވެރިން ވަނީ ސިފަކޮށްފަ އެވެ.
"މިއީ ހަމަ ސީދާ މިނިސްޓަރ ގަސްތުގައި ކުރައްވާ ކަމެއް. އަޅުގަނޑުމެންގެ ބެލެނިވެރި ފަރާތަކަށް ހުރެ އަޅުގަނޑުމެންގެ އަޑު ނީވޭ ނަމަ އިސްތިއުފާ ދެއްވާ،" މަސްވެރިއަކު ވަނީ ބުނެފަ އެވެ.
މަސްވެރިން ގެ އިހުތިޖާޖު މިދިޔަ ބުދަ ދުވަހުން ފެށިގެން ކުރިއަސް ދާ އިރު މަސްވެރިން ބުނަނީ ސަރުކާރުން އެކަށީގެންވާ އިޖާބަ އެއް ނުދޭ ކަމަށެވެ. މަސްވެރިންގެ އިހުތިޖާޖުގައި ސަރުކާރަށް ޖުމްލަ 3 ޑިމާންޑެއް އެބަ ކުރެ އެވެ. އޭގެ ތެރޭގައި ހިމެނެނީ ސަރުކާރުން ކަންނެލި ގަންނަން ފެށުމަށް ގޮވާލުމާއި، ސަރުކާރުން ވައުދުވެފައިވާ ގޮތަށް ކަންނެލީގެ އަގު 80ރ. އާއި 100ރ. އާ ދެމެދު ހިފެހެއްޓުމުގެ އިތުރުން ބޭސް ރޭޓުގައި ތެލާއި އައިސް ލިބޭނެ އިންތިޒާމް ހަމަޖައްސާ ދިނުމެވެ.
