ރ. ދުވާފަރު ގައި ގިނަ އަދަދެއްގެ ތަރައްގީގެ މަޝްރޫއުތައް ފަށައިފި

ރ. ދުވާފަރުގެ ބައެއް މަޝްރޫޢުތަކުގެ ޢަމަލީ މަސައްކަތް ފެށުމާއި، ބައެއް މަޝްރޫޢުތަކުގެ ނިމުން ފާހަގަކުރުމަށް އެ ރަށުގައި ހޮނިހިރު ދުވަު ކުރިއަށްގެންދިޔަ ރަސްމިއްޔާތުތަކުގައި ރައީސް ޑޮކްޓަރ މުޙައްމަދު މުޢިއްޒު ބައިވެރިވެވަޑައިގެންފިއެވެ.

އެގޮތުން ރ. ދުވާފަރުގައި މޯލްޑިވްސް އިސްލާމިކް ބޭންކުގެ އޭ.ޓީ.އެމް ޚިދުމަތް ރަސްމީކޮށް ފައްޓަވައިދެއްވީ ރައީސް މުޢިއްޒުއެވެ.

އެއަށްފަހު ރައީސް ވަނީ، މަސްވެރިންނަށް ހެޔޮއަގުގައި ތެޔޮ ފޯރުކޮށްދިނުމަށް އަމާޒުކޮށް ޤާއިމުކުރި ފުރަތަމަ ފިއުލް ސްކިޑް، ރަސްމީކޮށް ހުޅުއްވައިދެއްވާފައެވެ. 

ދުވާފަރު ބަނދަރު ތަރައްޤީކުރުމުގެ މަޝްރޫޢުގައި ހިމެނޭ އެކްސްޓެންޝަން މަސައްކަތް ޢަމަލީ ގޮތުން ފެއްޓެވުމަށް އެ ރަށު ބަނދަރު ސަރަޙައްދުގައި ހޮނިހިރު ދުވަހު ހެނދުނު އޮތް ރަސްމިއްޔާތުގައި ވެސް މުއިއްޒު ވަނީ ބައިވެރިވެވަޑައިގެންފައެވެ. 

މީގެއިތުރުން ރ. ދުވާފަރު ފުލުހުންގެ މަރުކަޒު ޢިމާރާތްކުރުމުގެ ޢަމަލީ މަސައްކަތް ރަސްމީކޮށް ފެށުމަށް ކުރިއަށްގެންދިޔަ ރަސްމިއްޔާތުގައި ވެސް މުއިއްޒު ބައިވެރިވެވަޑައިގަތެވެ. ފުލުހުންގެ މަރުކަޒުތައް ތަރައްޤީ ކުރުމަކީ ދިވެހި ފުލުހުންގެ ޚިދުމަތުގެ ޢުމްރާނީ ތަރައްޤީ އަށް، ރާއްޖޭގެ ތާރީޚުގައި ވެސް ހިންގާ އެންމެ ބިޔަ މަޝްރޫޢު ކަމަށް ރައީސް އޮފީހުން ބުނެ އެވެ.

މީގެ އިތުރުން، ރ. ދުވާފަރު ހިއްކިބިން ސަރަޙައްދުގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުގެ 3 ވަނަ ފިޔަވަހީގެ އެއްބަސްވުމުގައި ސޮއިކުރުމާއި، ހިއްކިބިން ސަރަޙައްދުގައި ފެނާއި ނަރުދަމާގެ ޚިދުމަތް ގާއިމުކުރުމުގެ އެއްބަސްވުމުގައި ސޮއިކުރުމަށް، އެ ސަރަޙައްދުގައި ހޮނިހިރު ދުވަހު ކުރިއަށްގެންދިޔަ ރަސްމިއްޔާތުގައި ވެސް މުއިއްޒު ބައިވެރިވެވަޑައިގަތެވެ. މި ރަސްމިއްޔާތުގައި ހިމެނިގެން، ރ. ދުވާފަރުގައި 50 ހައުސިންގް ޔުނިޓް ތަރައްޤީކުރުމުގެ މަޝްރޫޢުގެ އެއްބަސްވުމުގައި ސޮއިކުރުން ވެސް އޮތެވެ. އަދި ރ. ދުވާފަރު ގައި އިއާދަ ކުރަނިވި ހަކަތަ ޕްރޮގްރާމް އިފްތިތާޙު ކުރުމުގެ ރަސްމިއްޔާތު ވެސް ވަނީ ބާއްވާފަ އެވެ. މީގެ އިތުރުން ދުވާފަރު ބިންހިއްކުމުގެ މަޝްރޫޢުގެ 2 ވަނަ ފިޔަވަހީގެ ޢަމަލީ މަސައްކަތް ފެށުމުގެ ރަސްމިއްޔާތުގައިވެސް ރައީސް ވަނީ ބައިވެރިވެވަޑައިގެންފައެވެ.

ރާއްޖެ ޓްރާންސްޕޯޓް ލިންކް (އާރް.ޓީ.އެލް) ބަހުގެ ޚިދުމަތް، ރައީސް މުއިއްޒު ވަނީ ހޮނިހިރު ދުވަހު ހެނދުނު، ރ. ދުވާފަރުގައި ރަސްމީކޮށް ފައްޓަވައިދެއްވާފައެވެ.

ރ. ދުވާފަރު ޞިއްޙީ މަރުކަޒު ހޮސްޕިޓަލަކަށް ބަދަލުކުރުމަށް، ތިއޭޓަރ ކޮމްޕްލެކްސްއަކާއެކު އަލަށް ތަރައްޤީކުރާ ޢިމާރާތުގެ ޢަމަލީ މަސައްކަތް ފެށުމުގެ ރަސްމިއްޔާތުގައި ވެސް ރައީސުލްޖުމްހޫރިއްޔާ މިއަދު ވަނީ ބައިވެރިވެވަޑައިގެންފައެވެ. އޭގެ އިތުރުން ދުވާފަރުގެ ޞިއްޙީ މަރުކަޒަށް އަލަށް އިތުރުކުރެވުނު އިމާރާތް މުއިއްޒު ވަނީ، ހުޅުއްވައިދެއްވާފައެވެ. 

ރ. ދުވާފަރުގައި ތަރައްޤީކުރެވޭ އައުޓްޑޯ ވޮލީކޯޓުގެ ޢަމަލީ މަސައްކަތް ފެށުމާއި، ސްޕޯޓްސް ކޮމްޕްލެކްސް ގާއިމުކުރުމުގެ އެއްބަސްވުމުގައި ސޮއިކުރުމަށް އެ ރަށުގައި ކުރިއަށްގެންދިޔަ ރަސްމިއްޔާތުގައިވެސް ރައީސުލްޖުމްހޫރިއްޔާ ވަނީ ބައިވެރިވެވަޑައިގެންފައެވެ. އަދި ދުވާފަރު ކުންޏާއި ވަޞީލަތްތައް މެނޭޖުކުރާ މަރުކަޒު ތަރައްޤީކުރުމުގެ މަޝްރޫޢު ފެށުމަށް ކުރިއަށްގެންދިޔަ ރަސްމިއްޔާތުގައިވެސް ރައީސް މުއިއްޒު ވަނީ ބައިވެރިވެވަޑައިގެންފައެވެ.

މީގެ އިތުރުން، ރ. ދުވާފަރުގައި ދިވެހިރާއްޖޭގެ ޤައުމީ ޔުނިވަރސިޓީގެ ދަނާލް ޢިމާރާތް ތަރައްޤީކުރުމުގެ ޢަމަލީ މަސައްކަތްތައް ރަސްމީގޮތުން ފެށުމަށް ހޮނިހިރު ދުވަހު ހަވީރު އެ ރަށުގައި ކުރިއަށްގެންދިޔަ ރަސްމިއްޔާތުގައިވެސް މުއިއްޒު ވަނީ ބައިވެރިވެވަޑައިގެންފައެވެ. 

ރައީސް މުއިއްޒު ގެ މި ދަތުރުފުޅުގައި، ހޮނިހިރު ދުވަހުގެ ރޭ ބޭއްވުމަށް ހަމަޖެހިފައިވާ މިއަހަރުގެ މަސްވެރިންގެ ދުވަހުގެ ރަސްމީ ޖަލްސާއާއި އަދި މަސްވެރިންގެ ދުވަސް ފާހަގަކުރުމަށް ދުވާފަރުގައި މިހާރު ކުރިއަށްދާ އެކި އެކި ހަރަކާތްތަކުގައި ވެސް ބައިވެރިވެވަޑައިގަންނަވާނެ ކަމަށް ރައީސް އޮފީހުން ބުނެ އެވެ.

މި ދަތުރުފުޅުގައި، ރައީސުލްޖުމްހޫރިއްޔާގެ އަރިހުގައި އެމަނިކުފާނުގެ އަނބިކަނބަލުން ސާޖިދާ މުޙައްމަދުގެ އިތުރުން، ސަރުކާރުގެ ‎ބައެއް ވަޒީރުންނާއި ސަރުކާރުގެ ބައެއް މުއައްސަސާތަކުގެ އިސްވެރިން ބައިވެރިވެވަޑައިގަންނަވައެވެ.