ރައީސް މުޢިއްޒު ހުޅުމާލެ ރައްޔިތުންނާއި ބައްދަލު ކުރެއްވުމުގެ ކުރިން، ހުޅުމާލެ މަގުތަކުގައި ހުރި ސްޕީޑު ބްރޭކަރުތައް ނަގައިފި

ބާރަށް ދުއްވާ މީހުންގެ ސްޕީޑު ދަށްކުރުމުގެ ބޭނުމުގައި ހުޅުމާލޭގެ މަގުތަކުގައި ހަރުކުރި ސްޕީޑު ބްރޭކަރުތައް ނަގައިފި އެވެ. 

ހުޅުމާލޭގެ މަގުތަކުގައި ދުއްވާ އުޅަނދުތަކުގެ ސްޕީޑް ކޮންޓްރޯލް ކުރުމަށްޓަކައި، އެ އަވަށް ބަލަހައްޓާ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން މި ފަހުން ހަރުކުރި ކުދި ސްޕީޑް ބްރޭކަރުތަކަށް ފާޑުކިޔުން އަމާޒުވެފައި ވަނިކޮށް, އޭގެ ތެރެއިން ބައެއް އެއްޗެހި ނަގަން ފަށައިފި އެވެ.

މައުލޫމާތު ލިބޭ ގޮތުގައި ރައީސް މުޢިއްޒު ރައްޔިތުންނާ ގާތުން ބައްދަލު ކުރެއްވުމުގެ ނަމުގައި ބާއްވާ ސިލްސިލާ ބައްދަލުވުން ތަކުގެ ތެރެއިން ގަލޮޅުގެ ރައްޔިތުންނާއި ބައްދަލު ކުރެއްވުމަށްފަހު ދެން އޮތީ ހުޅުމާލޭގައި ދިރިއުޅޭ ރައްޔިތުންނާއި ބައްދަލު ކުރެއްވުމެވެ. އެގޮތުން މިހާރު މާލެގެ މާފަންނު، މައްޗަންގޮޅި އަދި ހެންވޭރު އާއި ވިލިމާލެ ގައި ދިރިއުޅޭ ރައްޔިތުންނާއި ބައްދަލު ކުރައްވާފައި އެވެ. އެ ބައްދަލުވުންތަކުގައި ސަރުކާރުން ކުރަމުންދާ ކަންކަމާމެދު ހިންހަމަ ނުޖެހުން ފާޅުކޮށް ވާހަކަ ދައްކާ މީހުން ގިނަކަން ފާހަގަ ކޮށްލެވެ އެވެ.

މިދިޔަ ސެޕްޓެންބަރު މަހުގެ ފަހު ކޮޅުން ފެށިގެން ހުޅުމާލޭގެ މަގުތަކުގައި ހަރުކުރީ، ކުދި ސްޕީޑް ބްރޭކަރުތަކެކެވެ. ނަމަވެސް ކިތަންމެ މަޑުން ދުއްވާފައި ދާ ވެހިކަލެއް ވެސް އެ ބްރޭކަރު މަތިން ހުރަސް ކުރާއިރު މުޅި އުޅަނދަށް ލޮޅުން އަރަ އެވެ. މިއީ މީހުންގެ ހަށިގަނޑަށާއި ވެހިކަލްތަކަށް ވެސް ބޮޑެތި ގެއްލުންތަކެއް ލިބޭފަދަ ބްރޭކަރުތަކެއް ކަމަށް ބުނެ، އެ ހަރުކުރަން ފެށި ދުވަހުން ފެށިގެން އާއްމުން ދިޔައީ ކަންބޮޑުވުން ފާޅުކުރަމުންނެވެ. ބައެއް ސިއްހީ ތަޖުރިބާކާރުން ވެސް ދިޔައީ އެއީ ރައްކާތެރި ބްރޭކަރުތަކެއް ނޫން ކަމަށާއި އޭގެ ސަބަބުން މީހުންގެ މައިބަދަފަދަ ނާޒުކު ގުނަވަންތަކަށް އަސަރުކުރާނެ ކަމަށް އިންޒާރުދެމުންނެވެ.

އެޗްޑީސީ އިން ހުޅުމާލެ މަގުތަކުގައި ސްޕީޑު ބްރޭކަރުތައް ހަރުކުރީ ރައްކާތެރި ތަނަކަށް ހުޅުމާލޭގެ މަގުތައް ހެދުމަށް ކަމަށް އެޗްޑީސީން ބުނެ އެވެ. އެގޮތުން ތިރީހަށް ވުރެ ގިނަ ސްޕީޑު ބްރޭކަރު ހަރުކޮށްފައިވާ ކަމަށް އޭރު އެޗްޑީސީން ބުންޏެވެ.