ފްރާންސް ގެ ރައީސް އިމަނުއެލް މެކްރޮން އާއި، ޔުކްރެއިންގެ ވުލޮޑޮމިއަރ ޒެލެންސްކީ، އިނގިރޭސިވިލާތު ގެ ބޮޑު ވަޒީރު ކިއާ ސްޓާމާ އަދި ޖަރުމަނުގެ ޗާންސެލަރު ފްރެޑްރިކް މާޒް ބައްދަލު ކުރައްވާ ގޮތަށް ހަމަޖެހިއްޖެ އެވެ.

އިނގިރޭސިވިލާތު ގެ ވެރި ރަށް ލަންޑަންގައި މި ބޭފުޅުން ހޯމަ ދުވަހު ބައްދަލު ކުރައްވާއިރު، އެ ބައްދަލުވުމު ގައި ޔުކްރެއިންގެ ޙާލަތާ ގުޅޭ ގޮތުން މަޝްވަރާ ކުރައްވާނެ ކަމަށް ބުނެފައިވެ އެވެ. ހަމަ އެހެންމެ، އެމެރިކާ ގެ މެދުވެރިކަމާ އެކު ކުރިއަށްދާ މަޝްވަރާތަކާ ގުޅޭ ގޮތުން ވެސް މި ލީޑަރުން މަޝްވަރާ ކުރައްވާނެ ކަމަށް ބުނެފައިވެ އެވެ.

ފްރާންސްގެ ރައީސް މެކްރޮން، އޭނާ ގެ ރަސްމީ އެކްސް އެކައުންޓުގައި ކުރެއްވި ޕޯސްޓެއް ގައި ވިދާޅުވީ، ޔުކްރެއިން އަށް ދެމުން އަންނަ ތާއީދު އަބަދު ވެސް އެގޮތުގައި ލިބެމުން އަންނާނެ ކަމުގެ ޔަގީންކަން ދޭން ބޭނުންވާ ކަމަށެވެ. އަދި ކޯލިޝަން އޮފް ދަ ވިލިންގް އިން ކުރާ މަސައްކަތުގެ މައިގަނޑު މަޤްޞަދަކީ އެއީ ކަމަށް ވެސް މެކްރޮން ވަނީ ވިދާޅުވެފަ އެވެ.

މީގެ އިތުރުން މެކްރޮން ވިދާޅުވީ އެމެރިކާ އާއެކު އެ މަސައްކަތް ކުރިއަށް ގެންދަން ވާނީ ޔުކްރެއިން އަށް ބޭނުންވާ ސަލާމަތާއި ޔަގީންކަން ދީގެން ކަމަށެވެ. އަދި ޔުކްރެއިންގެ ސަލާމަތާއި ރައްކާތެރި ކަމަށް ބޭނުންވާ ކަންކަން ނުކުރެވެނީސް، ދެމެހެއްޓެނިވި ސުލްޙައެއް ޤާއިމު ނުކުރެވޭނެ ކަމަށް ވެސް މެކްރޮން ވިދާޅުވެފައިވެ އެވެ. އިތުރަށް މެކްރޮން ވިދާޅުވީ، ޔުކްރެއިންގެ މައްސަލަ އަކީ ޔޫރަޕުގެ މުޅި ސަލާމަތާ ގުޅިފައިވާ މައްސަލައެއް ކަމަށެވެ.

ރަޝިޔާ އިން ޔުކްރެއިން އަށް އަމާޒުކޮށް މިފަހުން ހަމަލާ ތަކެއް ދީފައިވާއިރު، މެކްރޮން ވަނީ އެކަން ވަރަށް ބޮޑަށް ކުށްވެރި ކުރައްވައިފަ އެވެ. ޚާއްސަކޮށް ޔުކްރެއިންގެ އާންމުން ޙަރަކާތްތެރި ވަމުން އަންނަ ބައެއް ސަރަހައްދު ތަކަށް އަމާޒުކޮށް ދިން ހަމަލާ އަކީ، ހަރުކަށި އިބާރާތުން ކުށްވެރި ކުރާ ކަމެއް ކަމަށް މެކްރޮން ވިދާޅުވެފައިވެ އެވެ.

ރަޝިޔާ އަށް މީގެ ކުރިން ވެސް ވަރަށް ބޮޑަށް ފާޑު ވިދާޅުވެފައިވާ މެކްރޮން ވިދާޅުވީ، ރަޝިޔާ އަދި ވެސް އޮތީ ހަނގުރާމަ އިތުރަށް ފުޅާ ކުރުން، ނުވަތަ ބޮޑު ކުރުމުގެ ނިޔަތުގައި ކަމަށެވެ. އަދި ހަނގުރާމަ ނިންމުމަށް ބޭނުންވާ ސުލްޙަ ހޯދުމަށް ރަޝިޔާ އިން މަސައްކަތް ނުކުރާ ކަމަށް ވެސް މެކްރޮން ފާހަގަ ކުރެއްވި އެވެ. އެކަން ފާހަގަ ކުރައްވައި މެކްރޮން ވިދާޅުވެފައި ވަނީ، ސުލްޙަ ހޯދުމަށްޓަކައި ރަޝިޔާ އަށް މަޖުބޫރު ކުރުމުގައި އެންމެން އެކުގައި ތިބެން ޖެހޭ ކަމަށެވެ.

އިންޓަނޭޝަނަލް އެޓޮމިކް އެނާޖީ އެޖެންސީ އިން ހޮނިހިރު ދުވަހު ބުނެފައި ވަނީ، އެންމެ ފަހުން ރަޝިޔާ އިން ޔުކްރެއިން އަށް ދީފައިވާ ވަރުގަދަ ހަމަލާ ތަކުގެ ސަބަބުން، ޔުކްރެއިންގެ ކަރަންޓުގެ ނިޒާމަށް އަސަރު ކޮށްފައިވާ ކަމަށެވެ. އަދި އޮޕަރޭޓް ކުރަމުން ދިޔަ ނިއުކްލިއާ ޕަވާ ޕްލާާންޓު ތަކުން އުފައްދާ ކަރަންޓުގެ މިންވަރު ކުޑަ ކުރަން ޖެހުނު ކަމަށް ވެސް ފާހަގަ ކޮށްފައިވެ އެވެ.

މެކްރޮން އާއި ކޯލިޝަން އޮފް ދަ ވިލިންގްގެ ލީޑަރުން މި ބައްދަލުވުން ބާއްވަނީ، ޔުކްރެއިންގެ ހަނގުރާމައާ ގުޅިގެން ސަލާމަތީ ކަންބޮޑުވުންތައް އިތުރުވެ، ސުލްޙަ ހޯދުމަށް ބައިނަލްއަޤުވަމީ މުޖުތަމައުން ވަރަށް ބޮޑަށް ޙަރަކާތްތެރި ވަމުން އަންނަ ދަނޑިވަޅެއްގަ އެވެ. ޔޫރަޕުގެ ލީޑަރުން ވަނީ، ޔުކްރެއިން އަށް ދެމެހެއްޓެނިވި ތާއީދާއި، ސަލާމަތީ ޔަގީންކަން ފޯރުކޮށްދިނުމުގެ މުހިންމުކަން މީގެ ކުރިން ވެސް ފާހަގަ ކުރައްވައިފަ އެވެ.