ބޭސް ކުންފުނީގެ ޗެއާމަނަކަށް އައިޖީއެމްއެޗް ގެ ސީއީއޯ ހަލީމް އައްޔަނުކޮށްފި
ސަރުކާރުން ބޭސް އެތެރެކުރަން އުފެއްދި ކުންފުނި އުފެއްދިތާ ތިން މަސް ވިީއިރުވެސް ބޮޑެތި ބަލިތަކުގެ ބޭސް ނުލިބޭކަމުގެ ޝަކުވާ އަދިވެސް ވަރަށް ބޮޑު
އައިޖީއެމްއެޗްގެ ސީއީއޯ އިބްރާހީމް އަބްދުއްރައްޒާގު ހަލީމް
މި ސަރުކާރުން ބޭސް އެތެރެކުރުމަށް އުފެއްދި "ސްޓޭޓް ފާމަސޫޓިކަލް އެންޑް މެޑިކަލް ސަޕްލައި ކޯޕަރޭޝަން ލިމިޓެޑް"ގެ ޑިރެކްޓަރުން ގެ ބޯޑުގެ ޗެއާޕާސަންގެ މަގާމަށް މާލެ ސިޓީ ގުރޫޕް އޮފް ހޮސްޕިޓަލްސް (އައިޖީއެމްއެޗް) ގެ ސީއީއޯ އިބްރާހީމް އަބްދުއްރައްޒާގް ހަލީމް އަންގާރަ ދުވަހު އައްޔަނުކޮށްފި އެވެ.
ޕްރައިވަޓައިޒޭޝަން އެންޑް ކޯޕަރައިޒޭޝަން ބޯޑު (ޕީސީބީ)އިން އަންގާރަ ދުވަހު ކުރި ޕޯސްޓެއްގައި ހަލީމް ބޭސް ކުންފުނީގެ ޗެއާޕާސަންގެ މަގާމަށް އައްޔަނުކުރި ކަން އިއުލާންކޮށްފައިވެ އެވެ. ހަލީމް އަކީ ރާއްޖޭ ގެ ސިއްހީ ދާއިރާ ގައި ފާހަގަކޮށްލެވޭ ތަޖުރިބާކާރު ބޭފުޅެކެވެ.
ރާއްޖޭން ބޮޑެތި ބަލިތަކުގެ ބޭސް ނުލިބޭ ކަމުގެ ޝަކުވާ ބޮޑުވަމުން ގޮސް، ސަރުކާރުން ބޭސް އެތެރެކުރަން ކުންފުންޏެއް އުފެއްދީ މިދިޔަ ސެޕްޓެމްބަރު މަހުގަ އެވެ. މި ކުންފުންޏަކީ ސަރުކާރުން %100 ހިއްސާވާ ކުންފުންޏެކެވެ. މިކުންފުނި އުފެއްދެވި ނަމަވެސް އަދިވެސް ބޮޑެތި ބަލިތަކުގެ ބޭސް ނުލިބޭކަމުގެ ޝަކުވާ ވަރަށް ބޮޑެވެ.
އެ ކުންފުނި އުފެއްދިތާ މިހާރު ތިން މަސް ވެފައިވާއިރު، އާންމު ރައްޔިތުން ދަނީ ބައެއް ކަހަލަ ބޭސް ނުލިބޭތީ ކަންބޮޑުވުން ފާޅުކުރަމުންނެވެ. ބައެއް ބޭސް ފިހާރަތަކުން ބައެއް ބޭހެއް ނުލިބުމާއި، ބައެއް ބޭސް ލިބުމުގައި ލަސްވުން ހިނގަމުން އަންނަ ކަމަށް ރައްޔިތުން ބުނެ އެވެ.
އެ ކުންފުނީގެ މެނޭޖިން ޑިރެކްޓަރުގެ މަގާމަށް ޑރ. ޝާހު މާހިރު އައްޔަނުކުރީ ސެޕްޓެމްބަރު މަހުގެ 14 ގަ އެވެ. އެ ވަގުތު ޑރ. ޝާހު ހުންނެވީ ދަރުމަވަންތަ ހޮސްޕިޓަލުގެ ޑެޕިއުޓީ ސީއީއޯގެ މަގާމުގަ އެވެ. ހަލީމް ޗެއާޕާސަންގެ މަގާމަށް އައްޔަނު ކުރުމާއެކު، ބޭސް ކުންފުނީގެ އިސް ލީޑާޝިޕް ފުރިހަމަވެގެން ދިޔައީ އެވެ.
