ޑިވެލޮޕްމަންޓް ބޭންކުގެ ބޯޑަށް 4 މެންބަރުން އައްޔަން ކޮށްފި
ދިވެހި ސަރުކާރުގެ 100 އިންސައްތަ ހިއްސާ އޮންނަ "ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑް" އަކީ ރައީސް ޑރ. މުޙައްމަދު މުޢިއްޒު އުފެއްދެވި ކުންފުންޏެކެވެ
ރައީސުލްޖުމްހޫރިއްޔާ ޑިވެލޮޕްމަންޓް ބޭންކް އޮފް މޯލްޑިވްސް އިފްތިތާޙުކޮށްދެއްވުން
ރާއްޖޭގައި އުފެއްދި ޑިވެލޮޕްމަންޓް ބޭންކް (ޑީބީއެމް) ގެ ބޯޑަށް ހަތަރު މެމްބަރަކު އައްޔަންކޮށްފި އެވެ.
ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑުން ނެރުނު ބަޔާނެއްގައި ބުނީ ދައުލަތުގެ ވިޔަފާރި ތަންތަން ޕްރައިވަޓައިޒް ކުރުމާއި ކޯޕަރަޓައިޒް ކުރުމާ އަދި މޮނީޓާކޮށް އިވެލުއޭޓު ކުރުމުގެ ގާނޫނުގެ މަތިން ޑިވެލޮޕްމަންޓް ބޭންކުގެ ބޯޑަށް ބޭފުޅުން އައްޔަންކޮށްފައިވާ ކަމަށެވެ.
އެގޮތުން ޑިރެކްޓާރުންގެ ބޯޑަށް އައްޔަންކުރި 4 ބޭފުޅުންނަކީ:
- ހަސަން މިރާސް، މއ. މާފުނަ
- އަހުމަދު އަޒްޔާން ހަމީދު، މ. ލަންސިމޫގެ
- މައީޝާ އިބްރާހީމް، ދ. ކުޑަހުވަދޫ، ތިކުރީތު
- އަޒްމީން ރަޝީދު، ގދ. ރަތަފަންދޫ، ޗަބޭލީވިލާ
ދިވެހި ސަރުކާރުގެ 100 އިންސައްތަ ހިއްސާ އޮންނަ "ޑިވެލޮޕްމަންޓް ބޭންކް އޮފް މޯލްޑިވްސް ލިމިޓެޑް" އަކީ ރައީސް ޑރ. މުޙައްމަދު މުޢިއްޒު އުފެއްދެވި ކުންފުންޏެކެވެ. މި ކުންފުނި އުފައްދާފައިވަނީ މިދިޔަ މެއި މަހުގެ 16 ވަނަ ދުވަހު އެވެ. އެ ބޭންކު ހިންގަނީ އެ ކުންފުނީގެ ދަށުންނެވެ. މި ކުންފުނި އުފައްދަވާފައިވަނީ ޤާނޫނު ނަންބަރު 2023/7 (ކުންފުނީގެ ޤާނޫނު) ގެ 15 ވަނަ މާއްދާއިން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުންނެވެ.
ރައީސް ޑރ. މުއިއްޒު އުފެއްދެވި މި ކުންފުންޏަކީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިގްތިޞާދީ އަދި އިޖުތިމާޢީ ތަރައްގީއަށް އިންވެސްޓުކުރުމާއި، އުމްރާނީ ތަރައްގީއަށް ބޭނުންވާ ފައިސާ ހޯދުމާއި، ސިންޑިކޭޝަން ފައިނޭންސް މެދުވެރިކޮށް ޕީއެސްއައިޕީ މަޝްރޫއުތަކަށް ފައިސާ ފޯރުކޮށްދިނުމުގައި ދިމާވާ ގޮންޖެހުންތައް ހައްލުކުރުމާއި، ދިވެހިރާއްޖޭގެ ބޭންކިންގ ނިޒާމުގައި ބޭރު ފައިސާ ބެހެއްޓުން އިތުރުކުރުމުގެ ބޭނުމުގައި އުފެއްދެވި ކުންފުންޏެކެވެ.
ޑީބީއެމްގެ މެނޭޖިން ޑިރެކްޓަރު އަދި ސީއީއޯއަކަށް އިނގިރޭސި ވިލާތުގެ ބޭފުޅެއް ކަމަށްވާ ނޮއެލް ގްރެގާ ޕެޓާސަން ޖޯންސް އެ ބޭންކް އިފްތިތާހުކުރުމާ އެކު އައްޔަންކުރި އެވެ. ނަމަވެސް މިދިޔަ މާޗު މަހު އޭނާ ވަނީ މަގާމުން އިސްތިއުފާ ދެއްވައިފަ އެވެ. އަދި ފަހުންވަނީ އެނާ މަސައްކަތް ކުރެއްވި މުއްދަތު ގައި މުސާރަ ލިބިފައިނުވާ ކަމަށް ވިދާޅުވެ އެމައްސަލަ ހުށައަޅުއްވާފައެވެ.
