ސަރުކާރުގެ ހަރަދުކުޑަކުރުމުގެ ސިޔާސަތުގެ ދަށުން އެމްއެމްޕީއާރުސީގެ ބޯޑަށް ދެ މީހަކު އައްޔަންކޮށްފި

ދައުލަތުގެ ބަޖެޓުން ބޮޑު ހަރަދެއްކޮށްގެން ކޮށްގެން ފަތުރުވެރިކަން އިސްތިހާރުކުރާ ކުންފުނި، އެމްއެމްޕީއާރުސީގެ ބޯޑު މެންބަރުކަމަށް ދެމީހަކު އައްޔަންކޮށްފިއެވެ.

ޕްރައިވަޓައިޒޭޝަން އެންޑް ކޯޕޮރަޓައިޒޭޝަން ބޯޑުން ބުނީ އެމްއެމްޕީއާރުސީގެ ޑިރެކްޓަރުންގެ ބޯޑުގެ މެންބަރުކަމަށް އައްޔަންކުރެއްވީ އއ. އުކުޅަސް، އައްސޭރި އަބްދުއްސަމީއު އިމާދު އަދި ދަފްތަރު ނަންބަރު 12480 އައިޝަތު ހަމީދުއެވެ. މި ދެބޭފުޅުން އެ މަގާމަށް އައްޔަންކުރައްވާފައިވަނީ ޖުލައި 4 ވަނަ ދުވަހުއެވެ.

އެމްއެމްޕީއާރުސީގެ ބޯޑު މެންބަރަކަށް 9،800 ރުފިޔާ މަހެއްގެ މައްޗަށް ލިބެއެވެ.

އެމްއެމްޕީއާރުސީ އަށް ދައުލަތުގެ ބަޖެޓުން ބޮޑު ހަރަދެއްކުރާ އިރު، މިދިޔަ 7 މަސް ދުވަހުގެ ތެރޭގައި ފަތުރުވެރިކަން ކުރިއެރުވުމަށް ބޮޑު މަސައްކަތެއް ކުރެވިފައިނުވެއެވެ. ރައީސް ޑރ. މުހައްމަދު މުއިއްޒު ވެރިކަމަށް ގެނައުމަށް ފައިސާ ހަރަދުކުރި ފާތިމަތު ތައުފީގު އެ ކުންފުނީގެ މެނޭޖިންގ ޑިރެކްޓަރުކަމަށް އައްޔަންކުރެވި ކުންފުނީގެ ހިންގުން ދޯހަޅިވެ އެންމެ ފަހުން އޭނާ ވަނީ އެ މަގާމުން ވަކިކޮށްފައެވެ.

އަދި އެފަހުން އެ މަގާމަށް ރާއްޖޭގެ މަޝްހޫރު ޓޭބަލް ޓެނިސް ކުޅުންތެރިޔާ އިބްރާހިމް ޝިއުރީ ވަނީ އައްޔަންކުރައްވާފައެވެ.