މީގެ 4 މަސްކުރިން އާރުޑީސީގެ ޗެއަރމަން ކަމުން ވަކިކުރި ޝާމީ، އަނެއްކާވެސް ހަމަ އެ މަގާމަށް އައްޔަނުކޮށްފި
4 މަސް ކުރިން އާރުޑީސީގެ ޗެއަރމަން ކަމުން ވަކިކުރުމަށްފަހު މުހައްމަދު ޝާމީ އާދަމް އަލުން އެ މަޤާމަށް އައްޔަން ކޮށްފި
އާރްޑީސީގެ ޗެއަރމަން ގެ މަގާމަށް އައްޔަނުކުރި މުހައްމަދު ޝާމީ އާދަމް
މީގެ ގާތް ގަނޑަކަށް 4 މަސްކުރިން ރޯޑް ޑިވަލޮޕްމަންޓް ކޯޕަރޭޝަން (އާރުޑީސީ)ގެ ޗެއަރމަން ކަމުން ވަކިކުރި މ. އެމޭޒަން، މުހައްމަދު ޝާމީ އާދަމް އަނެއްކާ ވެސް ހަމަ އެމަގާމަށް އައްޔަނުކޮށްފި އެވެ.
މީގެ 4 މަސް ކުރިން ޝާމީ ދިޔައީ އާރްޑީސީގެ ޗެއަރމަންކަމުގެ މަގާމުގެ އިތުރުން އެސް.އެމް.އީ ޑިވެލޮޕްމަންޓް ފައިނޭންސް ކޯޕަރޭޝަންގެ ބޯޑު މެމްބަރުކަން ވެސް ފުރުއްވަމުން ނެވެ. ނަމަވެސް އެއްވެސް ސަބަބެސް ނާންގާ، މި 2 މަގާމުންވެސް 27 އޭޕްރިލް 2025 ވަނަ ދުވަހު އޭނާ ވަނީ ވަކިކޮށްފަ އެވެ.
ބުރާސްފަތި ދުވަހު ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ބުނީ އާރުޑީސީގެ ބޯޑު މެމްބަރު ކަމަށާއި އަދި ޗެއާމަންގެ މަގާމަށް މީހަކު ހަމަޖައްސަވާފައިވާ ކަމަށެވެ. އާރުޑީސީން މިއަދު ވަނީ ޗެއަރމަން ކަމަށް ޝާމީ އައްޔަން ކޮށްފައިވާކަން އިއުލާންކޮށްފަ އެވެ.
ދާދި ފަހުން ވަނީ އާރުޑީސީގެ މެނޭޖިން ޑިރެކްޓަރަކަށް ހުންނެވި އަލީ ޒުހައިރު, ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިން ޑިރެކްޓަރުގެ މަގާމަށް ބަދަލުކޮށްފަ އެވެ. އަދި އާރުޑީސީގެ ޑެޕިއުޓީ މެނޭޖިން ޑިރެކްޓަރުކަމުގެ މަގާމުގައި ހުންނެވި މުޙައްމަދު އަސްބާހު އަލީ ނަސީރު ވެސް ވަނީ އެޗްޑީސީއަށް ބަދަލުކޮށްފަ އެވެ.
މިހާރު އާރުޑީސީގެ މެނޭޖިން ޑިރެކްޓަރުގެ މަގާމުގައި ހުންނެވީ, ކޮންސްޓްރަކްޝަން މިނިސްޓްރީގެ ސްޓޭޓް މިނިސްޓަރަކަށް ކުރިން ހުންނެވި އިބްރާހީމް ނަޒީމްއެވެ. އޭނާއަކީ ރައީސް އަބްދުالله ޔާމީންގެ ވެރިކަމުގައި ވެސް އެ މަގާމުގައި ހުންނެވި ބޭފުޅެކެވެ.
މި ސަރުކާރުން ކުންފުނިތަކުގެ މަތީ މަގާމުތަކަށް ،ދެއިރުކާ ބޭހެއްހެން ބަދަލުތައް ގެންނަކަމަށް ބުނެ ގިނަ ބަޔަކު ސަރުކާރަށް ފާޑުކިޔަމުން ދެއެވެ.
