އެކުއެޓޯރިއަލް ހޮސްޕިޓަލު ގެ އިދާރީ މުވައްޒަފުންގެ ފެންވަރު ދަށް ކަމަށް ސީއީއޯ ޔާސިރު ވިދާޅުވުމުން މުވައްޒަފުން ރަތައް!

އައްޑޫ އެކުއެޓޯރިއަލް ހޮސްޕިޓަލު (އޭ.އީ.އެޗު) ގެ އިދާރީ މުވައްޒަފުންގެ މަސައްކަތުގެ ފެންވަރު ދަށް ކަމަށް ވިދާޅުވެ، އެ ހޮސްޕިޓަލްގެ ޗީފް އެގްޒެކެޓިވް އޮފިސަރ ޑރ. އިބްރާހިމް ޔާސިރު އަހްމަދު ދެއްކެވި ވާހަކައާ ގުޅިގެން ގިނަ އަދަދެއްގެ މުވައްޒަފުން ނުރުހުން ފާޅުކުރަން ފަށައިފި އެވެ.

އައްޑޫ ސިޓީގެ ސޯޝަލް މީޑިއާ ޕްލެޓް ފޯމެއްގައި ހިންގަމުން އަންނަ އޮންލައިން މީޑިއާ އަކަށް ދެއްވި އިންޓަވިއު އެއްގައި ވާހަކަ ދައްކަވަމުން، އޭ.އީ.އެޗުގެ ހިންގުމަށް ދިމާވެފައިވާ އެންމެ ބޮޑު ގޮންޖެހުމާއި ގުޅޭގޮތުން ދެންނެވި ސުވާލަށް، ޔާސިރު ވިދާޅުވެފައިވަނީ އިދާރީ މުވައްޒަފުން ގޮވައިގެން މަސައްކަތް ކުރުމަށް ދަތި ތަކެއް އެބަ ހުރި ކަމަށާއި އެ ދާއިރާއިން މަތީ ތައުލީމް ހާސިލްކޮށްގެން ތިބި މުވައްޒަފުންވެސް މަދު ކަމަށެވެ.

އަދި އޭނާ އަށްވެސް އެންމެ ފަސޭހައީ ކްނިލިކަލް މުޒައްފުން ގޮވައިގެން މަސައްކަތް ކުރުމަށް ކަމަށް ވިދާޅުވަމުން، އިދާރީ މުވައްޒަފުންގެ މަސައްކަތުގެ ފެންވަރު ނެތް ކަމަށް ދޭހަވާ މޭރުމަކުން ޔާސިރު ވަނީ ވާހަކަ ދައްކަވާފަ އެވެ.

އަދި އިދާރީ މުވައްޒަފުން ވަޒީފާ އަދާކުރަނީ ހަމަ އެކަނި ވަޒީފާގެ ބޭނުމަށް ކަމަށްވެސް ޔާސިރު ވަނީ ވިދާޅުވެފަ އެވެ.

މިކަމާ ގުޅިގެން ނަން ނުޖެހުމަށް ޝަރުތުކޮށް، ރާއްޖެއެމްވީ އަށް މައުލޫމާތު ހިއްސާކުރި އޭ.އީ.އެޗުގެ މުވައްޒަފުން ބުނީ، ސީއީއޯ ޔާސިރު، އިދާރީ މުވައްޒަފުންނާއި ގުޅޭ ގޮތުން ދައްކަވާފައިވަނީ ހަގީގަތާއި ހިލާފު ވާހަކަތަކެއް ކަމަށެވެ. އަދި އެ ހޮސްޕިޓަލުގެ އިދާރީ މުވައްޒަފުންނަކީ ކިޔަވައިގެން ތިބި ގާބިލް މުވައްޒަފުން ކަމަށާއި ސީއީއޯ ޔާސިރު، މަގާމާއި ހަވާލުވުމަށް ތަނުގެ ހިންގުމުގެ ފެންވަރު ދަށަށް ގޮސްފައިވާ ކަމުގެ ޝަކުވާ ހިދުމަތް ހޯދާ ފަރާތްތަކުން ކުރަމުންދާ ކަމަށެވެ.

ފާއިތުވި ފަސް އަހަރުގެ ތެރޭގައި އޭ.އީ.އެޗުން ހޯދާފައިވާ ކާމިޔާބީތަކާއި އަލަށް ތަޢާރަފު ކުރެވުނު ޚިދުމަތްތަކާއި ގުޅިގެން ތައްޔާރުކޮށްފައިވާ ރިޕޯޓެއްގެ ކޮޕީއެއް ރާއްޖެއެމްވީއަށް ލިބިފައިވާއިރު، 2020 ވަނަ އަހަރުން ފެށިގެން 2023 ގެ ޖޫން 22 ވަނަ ދުވަހާއި ހަމައަށް، އެވީ ތިން އަހަރު ދުވަހުގެ ތެރޭގައި، ނިމިދިޔަ އެމްޑީޕީގެ ވެރިކަމުގައި ވަނީ 41 ޚިދުމަތެއް ތަޢާރަފް ކޮށްފަ އެވެ.

އަދި މި ސަރުކާރު އައި ފަހުން މިވީ ދެ އަހަރުގެ ތެރޭގައި 9 ހިދުމަތެއް ދޭން ފަށާފައިވާއިރު މިއީ އިދާރީ މުވައްޒަފުންގެ ސަބަބުން ދިމާވެފައިވާ މައްސަލައެއް ނޫން ކަމަށް އެމުވައްޒަފުން ދަނީ ބުނަމުންނެ އެވެ. އަދި މި ސަރުކާރުން، ފައްޓާފައިވާ މި ނުވަ ހިދުމަތަކީ ވެސް ކުރީ ސަރުކާރުން ފައްޓަން ނިންމާފައިވާ ހިދުމަތްތަކެއްކަން ވަނީ ހާމަވެފަ އެވެ.

ވެރިކަން ބަދަލުވުމަށްފަހު އޭ.އީ.އެޗު އިން ބަދަލުވެފައިވަނީ ސީއީއޯ އަދި އެފްއީ ކަމަށްވާއިރު، މިވީ މުއްދަތުގެ ތެރޭގައި ފެންވަރު ރަނގަޅުކޮށް ކުރިއަރަމުން އައި ހޮސްޕިޓަލެއް ހިންގުން މަޑު ޖެހިފައިވާ ކަމަށް ރާއްޖެއެމްވީ އާއި ވާހަކަ ދެއްކި ބައެއް އާންމު ރައްޔިތުންވެސް ވަނީ ބުނެފަ އެވެ.

އޭ.އީ.އެޗުގެ ހިންގުން ދުވަހަކަށް ވުރެ ދުވަހެއް ދަށަށްދާ ކަމަށް ބުނެ ރައްޔިތުންގެ ޝަކުވާ ވަނީ ބޮޑުވެފަ އެވެ.