އައްޑޫސިޓީގައި ކޮވިޑަށް ޕޮޒިޓިވް ވާ މީހުންގެ ޢަދަދު ގިނަވެ، ކޮވިޑުގެ އެންމެ ފަހުގެ މަޢުލޫމާތު ޢާންމު ނުކުރާތާ 3 ދުވަސް ފާއިތުވެ ހިނގައްޖެއެވެ. މަޢުލޫމާތު ޢާންމުކުރުން ލަސްވަމުން ދަނީ ކޮވިޑަށް ޕޮޒިޓިވްވާ މީހުންގެ ޢަދަދު ގިނަވެ ސާމްޕަލްތައް ޕްރޮސެސް ކުރުމުގައި ލަސްވަމުންދާތީ ކަމަށް އައްޑޫސިޓީ ކައުންސިލްގެ މީޑިއާ އޮފިޝަލް ވިދާޅުވިއެވެ.

އޮފިޝަލް ވިދާޅުވީ އެމަޢުލޫމާތު ލިބުނުހާ އަވަހަކަށް ހާމަ ކުރައްވާނެ ކަމަށެވެ. މިހިނގާ ޖަނަވަރީ މަހުގެ މެދަކާ ހިސާބުން ފެށިގެން ރެކޯޑު އަދަދަކަށް މީހުން ޕޮޒިޓިވް ވަމުން އަންނަ އައްޑޫސިޓީގައި އެންމެ ފަހުން ކޮވިޑްގެ އަޕްޑޭޓް ހާމަކޮށްފައިވަނީ ޖަނަވަރީ 19ގައެވެ. އެދުވަހު އެކަނިވެސް 123 މީހުން ބައްޔަށް ޕޮޒިޓިވްވިއިރު، އެދުވަހާ ހަމަޔަށް އެސިޓީގެ އެކްޓިވް ކޭސް ތަކުގެ އަދަދަކީ 531 އެވެ. އެއީ ހިތަދޫއިން 235 މީހުންނާއި ފޭދޫއިން 105 މީހުންނާއި، މީދޫއިން 91 މީހުންނާއި، ހުޅުދޫއިން 43 މީހުންނާއި، އަދި މަރަދޫއިން 12 މީހުންގެ އިތުރުން ރިޒޯޓްތަކާއި އަދި މީހުންނޫޅޭ ރަށްރަށުން 18 މީހުންނެވެ.

މިފަހަކަށް އައިސް އައްޑޫސިޓީގައި ސާމްޕަލް ޓެސްޓް ކުރުން ވެސް ވަނީ ވަރަށް ބޮޑަށް އިތުރުވެފައެވެ. މިހާތަނަށް ޖުމްލަ 3629 މީހަކަށް އައްޑޫގައި މިބަލި ޖެހި، އޭގެތެރެއިން 3084 މީހުންވަނީ ބަލިން ރަނގަޅުވެފައެވެ. އައްޑޫ ސިޓީން މިހާތަނަށް މިބަލީގައި 15 މީހަކު ނިޔާވެފަވެއެވެ.

ވޭތުވެދިޔަ 2021 ވަނަ އަހަރުގެ އޯގަސްޓް މަހުން ފެށިގެން އައްޑޫގައި ކޮވިޑް ފެތުރެމުންދާތީ ސިޓީގެ އަވަށްތައް އޮތީ މޮނިޓަރިންގައެވެ. 4 މަހުގެ ދިގު މުއްދަތަކަށް ފަހު މޮނިޓަރިންއިން ނެގިތާ ދުވަސްކޮޅެއްގެ ތެރޭގައި އަނެއްކާވެސް ވަނީ ކޮވިޑަށް ޕޮޒިޓިވްވާ ރޭޓް މަތިވެފައެވެ. ނިމިގެން ދިޔައީ މިޑް ޓަރމް ބަންދު ދުވަސްވަރު ކަމަށްވެފައި މީހުން ރަށަށް އައިސް ގޮސް ހެދި މިންވަރުވެސް އިތުރުވެފައިވުމާއެކު، ކުރިއަށް އޮތް ތާނގައިވެސް ގިނަ ޢަދަދެއްގެ ބަޔަކު ޕޮޒިޓިވް ވާނެ ކަމަށް ބެލެވެއެވެ. އައްޑޫގައި ދަނީ ޖަނަވަރީ 16އިން ފެށިގެން ކޮވިޑްގެ ޚާއްސަ ފިޔަވަޅުތަކާއެކު ސްކޫލްތަކުގައިވެސް ކިޔަވައި ދެމުންނެވެ.