އައްޑޫ ސިޓީ އިން ހުކުރު ދުވަހުގެ ރޭ މެންދަމުގެ ވަގުތުގައި ކަރަންޓް ކެނޑުނީ، ކޭބަލްއެއް ބުރިކޮށްލަން މީހަކު މަސައްކަތް ކުރުމުގެ ތެރޭގައި ކަރަންޓް ގައި ޖެހިގެން ކަމަށް މައުލޫމާތު ލިބިއްޖެއެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި ފޭދޫ ބަނދަރު ސަރަހައްދުގައި ހުރި ޓްރާންސްފޯމަރަކުން، ކަރަންޓް ކޭބަލް ބުރިކޮށްލަން މީހަކު ވަނީ މަސައްކަތްކޮށްފަ އެވެ. އަދި އެމީހާ ކަރަންޓްގައި ޖެހިގެން އައްޑޫ އިކިއުއޮޓޯރިއަލް ހޮސްޕިޓަލްގައި ދަނީ އިތުރު ފަރުވާ ދެމުންނެއެވެ. އޭއީއެޗްއިން ޑޮކްޓަރުންނާއި ހަވާލާދީ މައުލޫމާތުދިން ގޮތުގައި އެމީހާއަށް ކަނައަތާއި ވައަތު ފައި ފިހިފައިވާ ކަމަށާއި ނަމަވެސް ހާލު ރަނގަޅު ކަމަށެވެ. މިއީ ސެކަންޑްރީ ބާނިންއެއް ކަމުން އިތުރު ފަރުވާއަށް މާލެ ގެންދިއުމާއި މެދު އަދި ގޮތެއް ނުނިންމާ ކަމަށް އޭއީއެޗްއިން މައުލޫމާތުދިނެ އެވެ.

ގާތް ގަނޑަކަށް ދޮޅު ގަޑިއިރަށް ކަރަންޓްގެ ޙިދުމަތް ރޭ ދަންވަރު ވަނީ މެދުކެނޑިފައިވެ އެވެ. ނަމަވެސް މިމައްސަލަ ހައްލުކޮށް ކަރަންޓްގެ ޚިދުމަތް ދީފައިވަނީ ފަތިހުގެ ވަގުތެއްގަ އެވެ.

އައްޑޫ ސިޓީގެ ކަރަންޓްގެ މައްސަލަ މިފަދަ ގޮތަކަށް މެދުކެނޑުނު ނަމަވެސް ދޭތެރެ ދޭތެރެއިން އިންޖީނަށް މައްސަލަ ދިމާވެ ކަރަންޓްގެ ހިދުމަތް މެދު ކެނޑެއެވެ. ނަމަވެސް މިއަދާއި ހަމައަށްވެސް ދާއިމީ ހައްލެއް މިކަމުގައި ލިބިފައި ނުވާތީ ރައްޔިތުންގެ ޝަކުވާ ވަރަށް ބޮޑު އެވެ.