މެދުކެނޑިފައިވާ ސީޓީ ސްކޭން ޚިދުމަތް ހުއްޓިފައި ހުންނަތާ މަހެއްވާއިރު، މުއިއްޒު އައްޑޫ އަށް ވަޑައިގަންނަވަނީ ކީއްކުރަން؟

އައްޑޫ ސިޓީގައި ސީޓީ ސްކޭން ނުހެދޭތާ ގާތްގަނޑަކަށް މަހެއްހާ ދުވަސް ހޭދަވެ އައްޑޫގެ ރައްޔިތުން ތިބީ ވަރަށް ބޮޑު މާޔޫސްކަމެއްގަ އެވެ. އިތުބާރު ހުރި މަސްދަރަކުން ރާއްޖެއެމްވީ އަށް މައުލޫމާތު ދީފައިވާ ގޮތުގައި އައްޑޫ އިކުއިޓޯރިއަލް ހޮސްޕިޓަލުގައި ސީޓީ ސްކޭން ނުހެދޭތީ އާއްމު ރައްޔިތުން ދަނީ އެކަމާއި މެދު ނުރުހުން ފާޅުކުރަމުންނެވެ. ރާއްޖެ އެމްވީ އާއި ވާހަކަދެއްކި މީހަކު ނަން ހާމަ ނުކުރުމަށް ޝަރުތުކޮށް ބުނީ އައްޑޫ އިކުއެޓޯރިއަލް ހޮސްޕިޓަލުގައި ސީޓީ ސްކޭން ނުހެދޭތާ މަހަކަށްވުރެ ގިނަ ދުވަސްވެ ގެން ގޮސްފައިވާ ކަމަށެވެ.

ސީޓީ ސްކޭންގެ ޚިދުމަތަކީ ހޮސްޕިޓަލުގައި މި ޚިދުމަތް ދޭން ފެށުނީއްސުރެ މެދުކެނޑުނު ޚިދުމަތެއް ނޫން ކަމަށް ވެސް އޭނާ ވަނީ ބުނެފަ އެވެ. އެ ހޮސްޕިޓަލްގެ ސްޓާފަކާއި ހަވާލާދީ އިތުބާރު ހުރި މަސްދަރަކުން ރާއްޖެ އެމްވީ އަށް ކިޔާދިން ގޮތުގައި ސީޓީ ސްކޭންގެ މައްސަލަ ހައްލު ނުކުރެވި ވަނީ ކުޑަކުޑަ ސްޕެއަރ އެއް (ހޮޅިކޮޅެއް)ގެ މައްސަލަ ހައްލު ނުކުރެވިގެންނެވެ.

އެ ވަރު ކުޑަ ކަމެއް ހައްލު ނުވެ ގިނަ ދުވަސްތަކެއް ވޭތުވެގެން ދިޔައިރު މި ޚިދުމަތް ނުލިބިގެން އައްޑޫގެ ރައްޔިތުން މިހާރު ސްކޭން ހަދަން ރަށުންބޭރަށް ދަތުރުކުރާތާ ދުވަސްތަކެއް ވެފައިވާ ކަމަށް މި ނޫހާއި ވާހަކަދެއްކި ބައެއް އާއްމުން ވަނީ ބުނެފައެވެ.

"ހޮސްޕިޓަލުގެ ޚިދުމަތްތައް މަޑުމަޑުން ހީނަރުވަމުން ގޮސް ރައްޔިތުންގެ މާޔޫސްކަން އިންތިހާ އަށް ގޮސްފައި ވާއިރު ރައީސް މުއިއްޒު އައްޑޫ ސިޓީ އަށް މިވަޑައިގަންނަވަނީ ކީއްކުރަން ތޯ" އެ އާއްމު މީހާ ވަނީ ބުނެފައެވެ.

ރައީސް ޑރ،.މުހައްމަދު މުއިއްޒު އަތޮޅު ތެރެއަށް ކުރައްވާ ދަތުރުފުޅުގެ ތެރެއިން ބުދަ ދުވަހު ހެނދުނުގެ ވަގުތެއްގައި ސ.ހުޅުދޫ އަށް ވަޑައިގަތުމަށް ވަނީ ހަމަޖެހިފަ އެވެ. އަދި ހުޅުދޫގައި އޭޓީއެމްގެ ރިބަން ކެނޑުމަށް ވަނީ ހަމަޖެހިފަ އެވެ. އޭގެ ފަހުން ހިތަދޫ އަށް ވެސް ވަޑައިގަންނަވަން ހަމަޖެހިފައިވާ ކަމަށް ވަނީ މައުލޫމާތު ލިބިފަ އެވެ.

އައްޑޫގައި ސީޓީ ސްކޭން ނުހެދޭކަން އޭއީއެޗްގެ ސީއީއޯ ޔަޤީންކޮށްދެއްވާ، ވިދާޅުވީ ހައްލުކުރަން މަސައްކަތް ކުރަމުންދާ ކަމަށް!

އައްޑޫ އިކުއިޓޯރިއަލް ހޮސްޕިޓަލް (އޭއީއެޗް)ގެ ސީއީއޯ ޑރ.ޔާސިރު އަހުމަދު ރާއްޖެ އެމްވީ އަށް މައުލޫމާތު ދެއްވަމުން ވިދާޅުވީ މިހާރު ވެސް އެމަރޖެންސީ ސްކޭންތައް އޭއީއެޗްގައި ކުރެވޭ ކަމަށެވެ. އެހެންނަމަވެސް ސީޓީ ސްކޭންގެ ޚިދުމަތް ހުއްޓިފައި އޮންނަތާ 3 ހަފްތާ ވެފައިވާ ކަން އޭނާ ވަނީ ޔަޤީންކޮށްދެއްވާފަ އެވެ.

"ހަމައެކަނި އެމަރޖެންސީ އެއްޗެހި ހެދެނީ. އެ ބޭފުޅުން ވިދާޅުވީ ރިންގެއްގެ މައްސަލަ ޖެހުނު ކަމަށް. އިތުރު ސްޕެއަރ އެއް ބޭނުންވާ ކަމަށް. އެމަރޖެންސީކޮށް ހެދޭ އެއީ މާ ގިނައިން ހަދަން ވެއްޖެއްޔާ މައްސަލަ ޖެހޭނެތީ." އޭނާ ވިދާޅުވިއެވެ.

މި ސަރުކާރުގެ އިސްސަފުގައި މަސައްކަތް ކުރައްވާ ބޭފުޅަކާއި ހަވާލާދީ އިތުބާރު ހުރި މަސްދަރަކުން މައުލޫމާތު ދީފައިވާ ގޮތުގައި އޭއީއެޗްގެ ހިންގުން ބަލިކަށިވެ ޑރ.ޔާސިރު މަޤާމުގައި ބަހައްޓާނީ ތޯ ނުވަތަ ނޫންތޯ ރައީސް ވަނީ ކަމާއި ގުޅުން ހުރި ބައެއް ބޭފުޅުންނާ މަޝްވަރާ ކޮށްފައެވެ.

"ރައީސްގެ އަރިހަށް މައްސަލަ ގެންގޮސްގެން ސަރުކާރު ތެރޭގައި ކިޔާ ގޮތުން ނަމަ މަޤާމުން ވަކިކުރަން ވެސް އެންގި ކަމަށް ބުނަނީ. ނަމަވެސް ދެން އެހެން ނުފޫޒު ގަދަ ފަރާތަކުން އެ ނިންމުމަށް ބާރު ފޯރުވި ކަމަށް ބުނަނީ. ޑރ.ޔާސިރު އަކީ ފަރސްޓް ލޭޑީ ސާޖިދާގެ ކުރީގެ ބޮސް. އަދި ހައިދަރުގެ ކޮއްކޮ. ނޭނގެ ދެން ކީއްވެ ކަމެއް ބެހެއްޓީ" އޭނާ ވަނީ ބުނެފައެވެ.

ރާއްޖެއެމްވީ އަށް މައުލޫމާތު ދިން މީހާ މިފަދައިން ބުނި ނަމަވެސް ޑރ.ޔާސިރު ވިދާޅުވީ އޭނާ މަޤާމުން ވަކިކުރުމާއި މެދު އެއްވެސް ވާހަކަ އެއްް ދެކެވިފައިވާކަން އެނގިވަޑައިގެންފައި ނުވާ ކަމަށެވެ. ރަސްމީ ހައިސިއްޔަތުންނާއި ނުރަސްމީ ހައިސިއްޔަތުން ވެސް އެފަދަ ވާހަކަ އެއް ނުދެކެވޭ ކަމަށް އޭނާ ވިދާޅުވިއެވެ.

އައްޑޫ އަށް ކުރައްވާ ދަތުރުފުޅުގެ ތެރެއިން ހޮސްޕިޓަލަށް ވަޑައިނުގެންނެވި ނަމަވެސް އޭއީއެޗްގެ އިސް ބޭފުޅުންނާއި ވެސް މި ދަތުރުފުޅުގެ ތެރެއިން ބައްދަލުކުރައްވަން ހަމަޖެހިފައިވާ ކަން ވަނީ މި ނޫހަށް ޔަޤީންވެފައެވެ. ޓީ ސްކޭންގެ މަސައްކަތް ހައްލުކުރުމަށް މަސައްކަތް ކުރަނީ އެކަން ހަވާލުކޮށްފައިވާ ޖީއީ ނަމަކަށް ކިޔާ ކުންފުންޏަކާއި އެވެ.

ސިއްހީ ނިޒާމާއި މެދު އިތުރު އެތައް ޝަކުވާ އެއް އެބަ ހުރި!

މީގެ އިތުރުން އެ ހޮސްޕިޓަލުގައި ހުޅުވަން ބުނި އައިނު ފިހާރަވެސް ވުޖޫދުނުވެ މަސައްކަތް ހުއްޓިފައި އޮތުމުން ރައްޔިތުން ތިބީ ނުރުހިފައެވެ. ހަމައެހެންމެ ވޭތުވެ ދިޔަ ސަރުކާރުގައި ފަރުމާކޮށް ފުރިހަމަ ކުރި ކެތުލެބުގެ ޚިދުމަތް ފަށަން މިސަރުކާރަށް ލިބުނު އިރު އެކަން ބަޔަކާ ހަވާލުކޮށް އެގުރިމެންޓެއްގައި ސޮއިކޮށްނުލެވި 2 އަހަރު ފާއިތުވެ ދިޔައީއެވެ.

މިކަމާއި މެދު ސުވާލުކުރުމުން، ޔާސިރު ވިދާޅުވީ ކެތްލެބްގެ މަސައްކަތް ފެށުމަށް ކުރަން ޖެހޭ ކަންކަން މިހާރު ވެސް ކުރަމުންދާ ކަމަށެވެ. އެއީ އަގު ބޮޑު މަރުހަލާ އަކަށް ވުމުން އެ މަރުހަލާ ކުރިއަށް ގެންދަނީ ފިނޭންސުން ކަމަށް އޭނާ ވިދާޅުވިއެވެ. އަދި ފިނޭންސުން އެ މަސައްކަތަށް ބަޔަކު ހޮވުމަށް ފަހު މަޝްވަރާގެ މަރުހަލާ ފަށާފައިވާ ކަމަށް އަަންގާފައިވާ ކަމަށް ޔާސިރު ވަނީ ވިދާޅުވެފައެވެ. ކެތްލެބްގެ އިކުއިޕްމެންޓް އިންސްޓޯލް ކޮށްފައިވާ ކަމަށް އޭނާ ވިދާޅުވިއެވެ.

"ފިނޭންސްގައި މިހާރު އެ މަސައްކަތް އޮތީ. އެކޮޅުން އަޕްޑޭޓޭއް ސާފުކޮށްލެއްވުން ރަނގަޅު." ޑރ.ޔާސިރު ވިދާޅުވިއެވެ.

މީގެ އިތުރުން ހުޅުމީދޫގެ އެކްސްރޭ ނުނެގޭތާ ގާތްގަނޑަކަށް 3 މަސް ދުވަސް ވަނީ ވެފައެވެ. މިހާރު އެކްސްރޭ ނަގަމުން ދަނީ ބަލި މީހުން އޭއީއެޗް އަށް ގެންގޮސްގެންނެވެ. އެ މައްސަލަ ވެސް ހައްލުވާނެ ވަގުތެއް ސާފު ނުވާ ކަމަށް ރާއްޖެ އެމްވީ އަށް ވަނީ އެނގިފައެވެ.

އައްޑޫގައި ޓަރޝަރީ ފެންވަރުގައި ޚިދުމަތް ދިނުމުގައި ގޮންޖެހުންތަކެއް ހުރި ކަމަށާއި ބަލި މީހުންނަށް ޚިދުމަތް ދިނުމުގައި އިތުބާރު ހޯދަން ދަތިތަކާއި ދިމާވާ ކަމަށް ޔާސިރު ފާހަގަ ކުރެއްވިއެވެ.

މީގެ އިތުރުން ނަން ހާމަ ނުކުރުމަށް ޝަރުތުކޮށް އޭއީއެޗްގެ ބައެއް މުވައްޒަފުން ވަނީ އިދާރީ ހިންގުމަށް ވެސް މިހާރުގެ މެނޭޖްމެންޓުގެ ނޭދެވޭ ނުފޫޒު ފޯރުވާ ކަމަށް ބުނެފައެވެ. އަދި ހަރުދަނާކޮށް ހިނގަމުން އައި ބައެއް ކަންކަން ބޮއްސުން ލުމާއި، ސަރުކާރުން ލިބެން ޖެހޭ އެއްބާރުލުން ނުލިބުން ފަދަ ކަންކަން ދިމާވާ ކަމަށް އެ ސްޓާފުން ވަނީ މި ނޫހަށް ކިޔާދީފައެވެ.

މިފަދަ ކަންކަން ހައްލު ނުކުރެވި ވަނިކޮށް އައްޑޫ ސިޓީ އާއި ސ.ހުޅުދޫ އަށް ވަޑައިގެން ރައީސް މުއިއްޒު އާއްމުންނަށް ދައްކަވާނީ ކޮން މޫނެއްތޯ މި ކަމާއި މެދު ފާޑުކީ ފަރާތްތަކުން ވަނީ ބުނެފައެވެ. އަދި މިއީ ހަގީގީ މައްސަލަތައް ހައްލު ނުވާ މިންވަރު އެނގޭ ކަމެއް ކަމަށް ވެސް އާޢްމުން ދަނީ ބުނަމުންނެވެ.