ޑެންގޫ، ލޮލުރޯގާ އަދި ވައިރަލް ހުން އައްޑޫސިޓީގައި ފެތުރޭތީ ސަމާލުވުމަށް އެދެފި
މިތިންބަލީގެ ޕޮޒިޓިވް ކޭސްތައް އައްޑޫން ދަނީ ފެންނަމުން
އައްޑޫ ސިޓީ ސްކޮއަރ
ލޮލުރޯގާއާއި ވައިރަލް ހުން އަދި މަދިރީގެ ސަބަބުން ފެތުރޭ ނުރައްކާތެރި ބައްޔެއްކަމަށްވާ ޑެންގީ ޖެހޭ މީހުން އައްޑޫސިޓީގައި ގިނަވަމުން ދިއުމާ ގުޅިގެން އެކަމަށް ސަމާލުވުމަށް ސިއްހީ އިދާރާތަކުން އިލްތިމާސްކޮށްފިއެވެ. އައްޑޫ އިކުއެޓޯރިއަލް ހޮސްޕިޓަލުން މިކަމާ ގުޅިގެން ނެރުނު ބަޔާނެއްގައި ވަނީ މިދުވަސްވަރު އައްޑޫސިޓީން ޑެންގޫ، ލޮލުރޯގާ އަދި ވައިރަލް ހުމަށް މީހުން ޕޮޒިޓިވް ވަމުން ދިއުމާގުޅިގެން އެކަމަށް ސަމާލުވުމަށް އެދިފައެވެ.
ޑެންގޫ ހުމުން ރައްކާތެރި ވުމުގެ ގޮތުން ވީހާވެސް ބޮޑަށް ހަށިގަނޑު ނިވާވާގޮތަށް ހެދުން އެޅުމާއި, ގެއާއި ގޯތި ތެރޭގައި އުޅޭއިރު މަދިރިން ރައްކާތެރިވުމަށް ބޭނުންކުރާ ޒާތުގެ ލޯޝަން ބޭނުންކުރުމާއި މަދިރި އާލާވާފަދަ ތަންތަން ނައްތާލުމަށް އެބަޔާނުގައި އެދިފައިވެއެވެ.
އަދި ލޮލުރޯގާގެ އަލާމާތެއް ފެނިއްޖެ ނަމަ ވީހާވެސް އަވަހަށް ޑޮކްޓަރަށް ދައްކައި, ފަރުވާ ހޯދުމަށާއި އާއްމުން އުޅޭ ތަންތަނަށް ނުދިއުމަށް އިލްތިމާސްކޮށްފައިވެއެވެ. މީގެ އިތުރުން ވައިރަލް ހުމުން ރައްކާތެރި ވުމުގެ ގޮތުން, ހުންއައިސް ކެއްސާ ކިނބިހި އަޅާނަމަ ފްލޫ ކްލިނިކަށް ދައްކައިގެން އަވަހަށް ފަރުވާ ހޯދުމަށާއި މީހުން އެއްވެ އުޅޭ ތަންތަނަށް ނުދިއުމާއި, ގިނަގިނައިން އަތް ދޮވުމުގެ އިތުރަށް ކެއްސާ ކިނބިހި އަޅާނަމަ އަނގަޔާއި ނޭފަތްނިވާކުރުމަށް ހޮސްޕިޓަލުން އެދިފައިވެއެވެ.
މިދުވަސްވަރަކީ އައްޑޫސިޓީގައި ކޮވިޑަށް ޕޮޒިޓިވްވާ މީހުންގެ އަދަދުވެސް ގިނަ ދުވަސްވަރެކެވެ. އިއްޔެ އެކަނިވެސް 20 މީހުން ޕޮޒިޓިވް ވެފައިވާއިރު ބަލިން އަދި ފަސޭހަނުވާ 290 މީހުން މިވަގުތު އައްޑޫގައި އެބަތިއްބެވެ.
ގިނަ ބަލިތަކެއް ފެތުރުމުގެ އަސްލު ކަމުގައިވާ މަދިރި އާލާވުމުގެ ފުރުސަތު ބޮޑު ފަޅުގޯތިތަކާއި ޗަސްބިން ގިނަ އައްޑޫސިޓީން މަދިރި މަދުކުރުމަށްޓަކައި ސިޓީ ކައުންސިލުންދަނީ ހަފްތާއަކު 2 ފަހަރު ސިޓީގެ ހުރިހާ ސަރަޙައްދެއް ފޮގް ކުރަމުންނެވެ.
