ކުއްޖާ ނިޔާވުމަށް މެދުވެރިވީ ޝޯލްޑަރ ޑިސްޓޯޝިއަރގެ ސަބަބުން، ކޮނޑު ތާށިވެގެން
އައްޑޫ އިކުއެޓޯރިއަލް ހޮސްޕިޓަލް
ރޭ ދަންވަރު އައްޑޫ އެކުއެޓޯރިއަލް ހޮސްޕިޓަލުގައި ވިހޭ ތުއްތު ކުއްޖާ ނިޔާވީ ހޮސްޕިޓަލުގެ އިހުމާލުން ކަމަށް ބުނާ ވާހަކަ، އެ ހޮސްޕިޓަލުން ދޮގުކޮށްފިއެވެ.
މިކަމާ ގުޅޭ ގޮތުން ރާއްޖެ އެމްވީއަށް މަޢުލޫމާތު ދެއްވަމުން އޭއީއެޗްގެ މީޑިއާ އޮފިޝަލް ވިދާޅުވީ، މިއީ އެއްވެސް ހާލެއްގައި ބައެއްގެ އިހުމާލުން ހިނގި ކަމެއް ނޫން ކަމަށާއި، ނިޔާވި ކުއްޖާއަކީ އާއްމު މިންގަނޑަށްވުރެ ބަރު ކުއްޖަކަށްވެފައި، ޝޯލްޑަރ ޑިސްޓޯޝިއާގެ ސަބަބުން ވިއްސަން އުނދަގޫވި ކުއްޖެއްކަމަށެވެ.
"ކުއްޖާ ވިއްސުމަށްފަހު ރިސަސިޓޭޓް ކުރެވިފައިވޭ. އެހެންނަމަވެސް، ކުއްޖާގެ ފުރާނަ ސަލާމަތް ކުރުމަށް ޑޮކްޓަރުންނާއި ނަރުހުންގެ ޓީމުން ކުރި މަސައްކަތް ކާމިޔާބުވާގޮތެއް ނުވި. ޝޯލްޑަރ ޑިސްޓޯޝިއާއަކީ މަދުން ނަމަވެސް, ދިމާވުމުން، އޭގެ ސަބަބުން މައިމީހާއާއި ކުއްޖާއަށް ނުރައްކާވާ ހާލަތެއް." އޭއީއެޗްގެ ބަޔާނުގައި ވެއެވެ.
މިހާދިސާގައި، އޭއީއެޗްގައި ފަރުވާ ހޯދަމުންދާ ޕޭޝަންޓާމެދު ހޮސްޕިޓަލުން އަމަލުކޮށްފައިވަނީ އޭއީއެޗްގެ އާއްމު އުސޫލާ އެއްގޮތަށް، ޑެލިވަރީގައި ކަންކުރަން ޖެހޭ ހުރިހާ ޕްރޮސީޖަރއެއް ފުރިހަމަ ކޮށްފައިކަމަށާއި އޮންކޯލްގައި ހުންނެވި ޑޮކްޓަރުވެސް އެވަގުތު ގުޅައިގެން ގެނައިކަމަށް ހޮސްޕިޓަލުން ބުނެއެވެ.
އައްޑޫ އެކުއެޓޯރިއަލް ހޮސްޕިޓަލުގައި ވިހެއި ތުއްތު ކުއްޖާ ނިޔާވީ ހޮސްޕިޓަލުގެ އިހުމާލުން ކަމަށް އާއިލާއިން މިއަދުވަނީ ތުހުމަތުކޮށްފައެވެ. އައްޑޫ ހޮސްޕިޓަލަށް ވިއްސަން ގެނައި މިމީހާއަކީ ގދ. ވާދޫގެ އަންހެނެކެވެ. މިކަމުގައި ހޮސްޕިޓަލުގެ އިހުމާލުއޮތްކަމަށް އާއިލާއިން ތުހުމަތު ކުރަނީ، ނަރުހުންގެ އަތްމަތިން ކުއްޖާ ވިހެއުމާއި، ޑޮކްޓަރެއް އެވަގުތު ނެތުމުގެ އިތުރަށް، ކުއްޖާގެ ހަށިގަނޑަށް އެކިވަރުގެ އަނިޔާ ވެފައިވާތީއެވެ.
