ޑޮކްޓަރުންގެ މުސާރަ ކުޑަވުމުން، ގާބިލު ޑޮކްޓަރުން ހޯދުމަށް ދަތިވާ ކަމަށް އައްޑޫ އިކުއެޓޯރިއަލް ހޮސްޕިޓަލުގެ ޗީފް އެގްޒެކެޓިވް އޮފިސަރ ޑރ. މުހައްމަދު ސާލިހު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން ޑރ ސާލިހު ވިދާޅުވީ މިހާރު އޮތް ގޮތުން، ހޮސްޕިޓަލުގައި ބަޖެޓެއް ކަނޑައެޅިފައި އޮތަސް ޑޮކްޓަރުންނަށް މުސާރަ ދޭއިރު ބަލަން ޖެހޭ މިންގަނޑަކީ ސިވިލް ސަރވިސްގައި ކަނޑައަޅާފައިވާ މިންގަނޑު ކަމަށެވެ. އަދި އެ ނޫން މިންގަނޑަކަށް ޑޮކްޓަރުންނަށް މުސާރަ ދިނުމުގެ ބާރު ހޮސްޕިޓަލަށް ލިބިގެން ނުވާ ކަމަށެވެ.
ޕްރައިވެޓް ހޮސްޕިޓަލުގައި ތަފާތު ދެ ސްޕެޝަލިސްޓުންނަށް ތަޖުރިބާ އާއި މަސައްކަތަށް ބެލުމަށްފަހު މުސާރަ ދޭއިރު އަދަދުތަކުގައި ފަރަގު އުޅެދާނެ ކަމަށް ވެސް ސާލިހް ވިދާޅުވިއެވެ. ޕްރައިވެޓް ހޮސްޕިޓަލުތައް ފަދައިން އައްޑޫ އައްޑޫ އިކުއެޓޯރިއަލް ހޮސްޕިޓަލުން ވެސް އެގޮތަށް މުސާރަ ކަނޑައެޅުމުގެ ބާރު ނެތުމުން ގޮންޖެހުންތަކާއި ކުރިމަތިވާ ކަމަށް އޭނާ ވިދާޅުވިއެވެ.
ޑރ ސާލިހު ވިދާޅުވީ މި ދާއިރާއަށް ބަލާއިރު އެކަށީގެންވާ މިންވަރަށް ދިވެހި ޑޮކްޓަރުން ލިބެން ނެތް ކަމަށެވެ. އަދި ރާއްޖެތެރޭގެ ރަށްތަކަށް އައިސް މަސައްކަތް ކުރާނެ ޑޮކްޓަރުން ވެސް ހޯދުމަށް ދަތިވާ ކަމަށެވެ.
އެހެންވުމުގެ ސަބަބުން ބޭރު ގައުމުތަކުން ޑޮކްޓަރުން ގެންނަން ޖެހޭ ކަމަށާއި އެގޮތަށް ބަލާއިރު ވެސް ބައެއް ގައުމުތަކުގައި ކޮވިޑުގެ ހާލަތު ރަނގަޅު ނުވާތީ، ރާއްޖެއިން ބޭރުން ވެސް ޑޮކްޓަރުން ގެންނަން ހުރަސްތަކާއި ކުރިމަތިވާ ކަމަށެވެ.
ޑޮކްޓަރުން ނަގާއިރު ހަމައެކަނި ބޭސް ސިޓީ ލިޔެލާފައި ފޮނުވާލާ ޑޮކްޓަރުން ނަގަން ބޭނުންނުވާކަން ފާހަގަކުރައްވާ ޑރ ސާލިހް ވިދާޅުވީ ރައްޔިތުންނަށް އިތުބާރު ހިފޭ ޑޮކްޓަރުން ހޮސްޕިޓަލަށް ނަގަން ބޭނުންވާ ކަމަށެވެ.
ނަރުހުންނާއި އެޓެންޑެންޓުން ލިބުމުގައި ވެސް ދަތިކަން ހުރިކަން ފާހަގަކުރައްވާ ޑރ ސާލިހު ވިދާޅުވީ އާންމުކޮށް ނަރުހުން ކަނޑައަޅަނީ ބެޑް ކެޕޭސިޓީއަށް ބެލުމަށްފަހު ކަމަށެވެ. މިހާރުގެ ހާލަތަށް ބަލާއިރު 160 ނަރުހުން ބޭނުންވާ ކަމަށާއި ކޮވިޑް ހޮސްޕިޓަލަށް ވެސް 12 ނަރުހުން ރިލީޒް ކޮށްފައިވާ ކަމަށް އޭނާ ވިދާޅުވިއެވެ.
އެކަށީގެންވާ އަދަދަކަށް މުވައްޒަފުން ލިބިފައި ނެތް ކަމަށާއި އެޓެންޑެންޓުން ވެސް މަދު ކަމަށް ޑރ ސާލިހް ފާހަގަކުރެއްވިއެވެ.
ކަސްޓަމަރ ކެއަރގައި މަސައްކަތް ކުރާ މުވައްޒަފުން ވެސް ހޯދުމަށް ދަތިވާ ކަމަށް ވިދާޅުވިއެވެ. ހޮސްޕިޓަލް ހިންގުމަށް ބޭނުންވާ އަދަދަށް މުވައްޒަފުން ލިބިފައި ނެތް ކަމަށާއި އެހެންކަމުން މަގާމުތަކަށް މީހުން ނުނެގިވާ ކަމަށް ވެސް ވިދާޅުވިއެވެ.
ހޮސްޕިޓަލުގައި އަދިވެސް ރަނގަޅު ކުރަންޖެހޭ ކަންތައްތައް އެބަހުރި ކަމަށާއި އަމާޒަކީ މިކަންތައްތަކަށް ހައްލު ހޯދައި، އެހެން އެއްވެސް ހޮސްޕިޓަލަކުން ޚިދުމަތް ލިބެން ނެތް ފެންވަރަށް އައްޑޫ ހޮސްޕިޓަލުގެ ޚިދުމަތް މައްޗަށް ގެންދިޔުމަށް ކަމަށް ޑރ ސާލިހް ވިދާޅުވިއެވެ.
