އިންޑޮނީޝިއާ ގައި ފެންބޮޑުވުމުގެ ސަބަބުން އެތައް ސަތޭކަ ބަޔަކު ގެއްލިގެން ހޯދަނީ

އިނޮޑޮނޭޝިއާ އަށް ކުރިމަތިވި ތޫފާނުގެ ސަބަބުން ވެހުނު ބޯ ވާރޭ އާއެކު ފެންބޮޑުވެ، ބިންގަނޑު ކަނޑައިގެން ދިއުމުގެ ސަބަބުން ގިނަ ބަޔަކު ވަޅުލެވިފައިވާ ކަމަށް ބެލެވޭ ކަމަށާއި 400 އަށް ވުރެ ގިނަ މީހުން ހޯދުމަށް ސަލާމަތީ އޮފިޝަލުން މަސައްކަތް ކުރަމުންދާ ކަމަށް ރިޕޯޓުތައް ބުނެފި އެވެ.

ސަރުކާރުން ބުނެފައިވާ ގޮތުގައި ސުމަޓްރާ އިން މަރުވި މީހުންގެ އަދަދު 440 އަށް ވުރެ މައްޗަށް އަރާފައިވެއެވެ.

ބޯޓުފަހަރުގައްޔާއި ވައިގެ މަގުން ކާރިސާގެ އަސަރު ކޮށްފައިވާ ސަރަހައްދުތަކަށް އެހީތެރިކަން ފޮނުވާފައި ވީނަމަވެސް، ބައެއް ރަށްތަކަށް އަދިވެސް އެއްވެސް އެހީއެއް ލިބިފައި ނުވާއިރު، ކާނާ އާއި ފެން ހޯދުމަށް މީހުން ތަންތަން ލޫޓު ވަމުންދާ ކަމުގެ ރިޕޯޓު ތައް ވެސް ކޮށްފައި ވެއެވެ.

ބޯ ވާރެއާއި ތޫފާންތަކުގެ ސަބަބުން ތައިލެންޑް، މެލޭޝިއާ، ފިލިޕީންސް އަދި ސްރީލަންކާގެ ބޮޑެތި ސަރަހައްދުތަކަށް ގެއްލުންތައް ލިބި، މިލިއަނަކަށް ވުރެ ގިނަ މީހުންނަށް އަސަރުކޮށްފައިވާއިރު، މި ސަރަހައްދުގައި 900 އަށް ވުރެ ގިނަ މީހުން މަރުވެފައިވެއެވެ.

ސެންޔާރ ނަމަކަށް ކިޔާ، އާދަޔާޚިލާފު ވަރުގަދަ ތޫފާނެއްގެ ސަބަބުން އިންޑޮނޭޝިއާ ގައި ބިންގަނޑު ކަނޑައިގެން ދިއުމާއި ފެންބޮޑުވުންތައް ކުރިމަތިވެ، އެތައް ހާސް އިމާރާތްތައް ފެނުއަޑީގައި ވާ ކަމަށް ބީބީސީ އިން ބުނެފައިވެއެވެ.

ނެޝަނަލް ޑިޒާސްޓަރ މެނޭޖްމަންޓް އެޖެންސީން ބުނި ގޮތުގައި އާޗޭ، އުތުރު ސުމަޓްރާ އަދި ހުޅަނގު ސުމަޓްރާ އިން މީހުން ގެއްލިފައި ވެއެވެ.

އަސަރު ކޮށްފައިވާ ސަރަހައްދުތަކަށް ބޭރުގެ ބައެއް އެހީތެރިކަން ލިބިފައިވާއިރު، މެލޭޝިއާ އިން ވަނީ އެންމެ ބޮޑަށް ގެއްލުން ލިބިފައިވާ ސަރަހައްދުތަކުގެ ތެރޭގައި ހިމެނޭ އާޗޭ އަށް މެޑިކަލް ސާމާނު ފޮނުވާފައެވެ.

މުޅި ސަރަހައްދަށް ވަނީ ފުޅާ ދާއިރާއެއްގައި ބޮޑެތި ގެއްލުންތަކެއް ލިބިފައެވެ.

ތައިލެންޑްގައި ފެންބޮޑުވުމުގެ ސަބަބުން 170 މީހުން މަރުވެފައިވާއިރު، މެލޭޝިއާ އިން ވެސް ގިނަ ބަޔަކު މަރުވެފައިވާ ކަމުގެ ރިޕޯޓުތައް ލިބިފައިވެއެވެ.

ސްރީލަންކާ ގައި ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން 300 އަށް ވުރެ ގިނަ މީހުން މަރުވެފައިވާއިރު، އެ ގައުމު މި ވަނީ ފަހުގެ އަހަރުތަކުގެ ތެރޭގައި ކުރިމަތިވި އެންމެ ނުރައްކާތެރި މޫސުމީ ކާރިސާތަކުގެ ތެރެއިން އެއް ކާރިސާ އާ ކުރިމަތިލާން ޖެހިފައެވެ.

ބޯ ވާރޭ މިހާރު ހުއްޓިފައި ވީނަމަވެސް، ވެރިރަށް ކޮލަންބޯގެ ތިރި ސަރަހައްދުތަކުގައި އަދިވެސް ފެންބޮޑުވެފައިވާއިރު، ގައުމުގެ މެދުތެރޭގެ ގިނަ ސަރަހައްދުތަކަށް އަދިވެސް ވަނީ ދަތުރުފަތުރު ކެނޑިފައެވެ.

ފިލިޕީންސް ގައި މަސްދުވަހުގެ ތެރޭގައި ދެވަނަ ފަހަރަށް ކުރިމަތިވި ގުދުރަތީ ކާރިސާ ގައި 200 އަށް ވުރެ ގިނަ މީހުން މަރުވެފައި ވެއެވެ.