އެތައް މޭލެއް ދުރުން ޣައްޒާއަށްޓަކައި ސޯފިއާންގެ ވާހަކަތައް، ފަލަސްޠީނުގެ ކުލަތަކުން!
ޣައްޒާގައި އިޒްރޭލުން ހިންގަމުންދާ ޤަތުލުޢާންމު ހުއްޓާލުމަށް ގޮވާލާ ކުރެހުންތަކުން އިންޑޮނޭޝިއާގެ މަގުފާރުތަކުގައި މެސެޖުތައް ދޭން ފެށި
ސޯފިއާންގެ ކުރެހުންތައް ކުރަހަމުންދާ ސަރަޙައްދުގައި ދިރިއުޅޭ ޢާންމުންވެސް އޭނާގެ މަސައްކަތަށް ތަޢުރީފުކުރޭ
ކަމަކާ މެދު ތިބާ ދެކޭ ގޮތް އަނެކާއަށް އަންގައި ދިނުމަށްޓަކައި ކޮންމެ ފަހަރަކު، އަނގައިން ވާހަކަތަކެއް ދައްކާކަށް ނުޖެހެއެވެ. ހަޅުތާލު ކުރާކަށް ނުޖެހެއެވެ. މަގުތަކަށް ނުކުމެ، އިޖުތިހާދުތަކާއި މުޒާހަރާތައްވެސް ކުރިއަށް ގެންދާކަށް ނުޖެހެއެވެ. އެކަމުގެ އެންމެ ރީތި މިސާލު ދައްކައިދެމުން ދާ އެކަކީ އިންޑޮނޭޝިއާގެ ފަންނުވެރި ކުރެހުންތެރިޔާ އައިވާން ސޯފިއާންއެވެ.
ބޮޑެތި ކުރެހުންތައް ކުރެހުމުގެ ރޮނގުން ކުރިއެރުންތައް ހޯދާފައިވާ ސޯފިއާން މިހާރު ކުރަމުން ދާ މަސައްކަތަކީ، އިންޑޮނޭޝިއާގެ ހުޅަނގު ޖާވާގެ ޑެޕޮކް ޕްރޮވިންސްގެ ހަލަބޮލި މަގަކަށް ވާ ގޮތަށް ހުރި ފާރެއްގައި ކުރެހުމުގެ މަސައްކަތެވެ. އެ ކުރެހުމުން ފެނިގެންދަނީ ކުޑަ ކުއްޖެއްގެ މޫނެވެ. އެ މޫނާ ގުޅުވާލާފައި ވަނީ، ޔަހޫދީ އިޒްރޭލުގެ މުއްދަށުލާފައި އޮތް ފަލަސްޠީނުގެ ޤައުމީ ދިދައިގެ ކުލަތަކެވެ.
އޮކްޓޯބަރ 7 ވަނަ ދުވަހުން ފަށައިގެން ޣައްޒާއަށް ޢަމާޒުކޮށްގެން ޔަހޫދީން ހިންގަމުންދާ ޖަރީމާތައް ފެނި، އެހެން އެންމެނެކޭވެސް އެއްފަދައިން، ސޯފިއާންވެސް ހުރީ ސިހުމެއްގައެވެ.
ޤަތުލުޢާންމުގެ މައިދާނާ އެތައް ސަތޭކަ މޭލެއް ދުރުގައި ދިރިއުޅެން ޖެހިފައި އޮތް އިރު، ޖަރީމާ ހުއްޓުވަން އޭނާއަށް ކޮށްދެވޭނެ މާ ބޮޑު ކަމެއް ނެތް ކަމުގެ އިޙްސާސް، ސޯފިއާންއަށް ކުރެވެން ފެށިއެވެ. ޚަބަރުތަކުން ފެންނަމުންދާ މަންޒަރުތައް ފެނި، މާޔޫސް ވާ ގޮތްވިއެވެ.
ކުރެހުމުގެ ތެރެއިން، ފަލަސްޠީނުގެ އަޑު، މުޅި ދުނިޔެއަށް އިއްވުމުގެ ޚިޔާލު އައީ އެހާ ހިސާބުންނެވެ. އޭނާވެސް ހުރީ ފަލަސްޠީނުގެ ޙައްޤުގައިކަން ސާބިތުކޮށް ދިނުމަށް ސޯފިއާންގެ ފެށި ފަންނުވެރި މަޝްރޫޢުގައި، އިންޑޮނޭޝިއާގެ އެހެން ކުރެހުންތެރިންވެސް ބައިވެރިވާން ފެށިއެވެ. ޣައްޒާގައި އިޒްރޭލުން ހިންގަމުންދާ ޤަތުލުޢާންމު ހުއްޓާލުމަށް ގޮވާލާ ކުރެހުންތަކުން އިންޑޮނޭޝިއާގެ މަގުފާރުތަކުގައި މެސެޖުތައް ދޭން ފެށިއެވެ.
ސޯފިއާންގެ ކުރެހުންތައް ކުރަހަމުންދާ ސަރަޙައްދުގައި ދިރިއުޅޭ ޢާންމުންވެސް އޭނާގެ މަސައްކަތަށް ތަޢުރީފުކުރެއެވެ. އެކަމަށް ތަރުޚީބުވެސް ދެއެވެ.
މިފަދަ ގޮތަކަށް މަސައްކަތްކޮށްގެން، ފަންނުވެރި ކުރެހުންތެރިންގެ މަސައްކަތުން، ޣައްޒާއަށް ފޯރުކޮށްދިނުމަށް މާލީ އެހީވެސް ހޯދިދާނެ ކަމަށް ސޯފިއާން ޤަބޫލު ކުރެއެވެ.
އިންޑޮނޭޝިއާގެ ރައީސް ޖޯކޯ ވިޑޯޑޯ، ނޮވެމްބަރު 13 ވަނަ ދުވަހު، އެމެރިކާގެ ރައީސް ޖޯ ބައިޑަންއާ ބައްދަލު ކުރައްވާފައި ވާ އިރު، އިޒްރޭލުން ޣައްޒާގައި ހިންގަމުންދާ ޖަރީމާތައް ހުއްޓުވުމަށް އެމެރިކާއިން އިތުރަށް މަސައްކަތް ކުރުމަށް، ބައިޑަންގެ ކިބައިން އެދިވަޑައިގެންނެވިއެވެ.
