ކުރީގެ ނައިބު ރައީސް ފައިސަލް ނަސީމް، އިންޑޮނޭޝިއާ ގެ ޤާނޫނު ހަދާ މަޖިލީހަށް ޒިޔާރަތް ކުރައްވައިފި

ކުރީގެ ނައިބު ރައީސް ފައިސަލް ނަސީމް، އިންޑޮނޭޝިއާ ގެ ޤާނޫނު ހަދާ މަޖިލީހަށް ޒިޔާރަތް ކުރައްވައިފި އެވެ.

އިންޑޮނޭޝިއާ ގެ ޤާނޫނު ހަދާ މަޖިލީހުގެ ސްޕީކާ ޕުއާން މަހާރާނީ ގެ ދައުވަތަށް، ކުރީގެ ނައިބު ރައީސް ފައިސަލް ނަސީމް ކުރެއްވި މި ޒިޔާރަތުގައި އެކަމަނާ އާއި ބައްދަލު ކުރައްވާ ފުޅާ ދާއިރާ އެއްގައި ވަނީ މަޝްވަރާ ކުރައްވާފަ އެވެ.

ހޯމަ ދުވަހު އިންޑޮނޭޝިއާ ގެ ޤާނޫނު ހަދާ މަޖިލީހު ގައި ބޭއްވި، މި ބައްދަލު ކުރެއްވުމު ގައި ރާއްޖެ އާއި އިންޑޮނޭޝިއާ އާއި ދެމެދު އޮތް 50 އަހަރުވީ ގާތް ގުޅުމާ ގުޅޭ ގޮތުން ވާހަކަ ދައްކައި މަޝްވަރާކޮށް ހިޔާލު ބަދަލުކޮށްފައިވެ އެވެ.

މީގެ އިތުރުން ރާއްޖެ އާއި އިންޑޮނޭޝިއާ އާއި ގުޅިގެން ކުރެވޭނެ ކަންތައްތަކާ މެދު ވާހަަކަ ދެކެވުނު އިރު، ތަފާތު ގިނަ ދާއިރާތަކުން ދެ ގައުމުގެ ދެމެދު ގައި ގުޅުން ބަދަހި ކުރެވިދާނެ ކަންކަމާއި ގުޅޭ ގޮތުން ވަނީ ވާހަކަ ދައްކާފަ އެވެ.

އެގޮތުން ތައުލީމީ ދާއިރާ އާއި، ޞިއްޙީ ދާއިރާ އާއި، މޫސުމީ ދާއިރާ އާއި، އިޤްތިޞާދީ ދާއިރާ އަދި ގުޅިގެން އެކުގައި ކުރިއަށް ދެވޭނެ އެހެން ދާއިރާތަކާ މެދު ވެސް މަޝްވަރާ ކުރެވުނެ އެވެ.

އަދި ދެ ގައުމުގެ ދެމެދު ގައިވާ ޒަމާންވީ ގުޅުމާ އެކު، ދެ ޤައުމު އެކުގައި ކުރިއަށް ދިޔުމުގެ މުހިންމު ކަމާ މެދު ވެސް މި ބައްދަލުވުމުގައި ދެ ފަރާތުން ވަނީ މަޝްވަރާ ކޮށްފަ އެވެ.

ދިވެހި ސަރުކާރާއި ގުޅިގެން، މަޝްވަރާ ކުރެވުނު ދާއިރާތަކުން އެކުގައި ކުރިއަށް ދިއުމާއި މެދު ޝައުގުވެރިވާ ކަމަށް އިންޑޮނޭޝިއާ ގެ ޤާނޫނު ހަދާ މަޖިލީހުގެ ސްޕީކަރ ވަނީ ވިދާޅުވެފަ އެވެ.

ދިވެހިރާއްޖޭ ގައި ހުރި ވިފަޔާރީގެ ފުރުޞަތުތައް އިންޑޮނެޝިއާގެ ވިޔަފާރި ވެރިންނަށް ހިއްސާކޮށް އަދި ރާއްޖޭގެ އިންވެސްޓަރ ފޯރަމް އެއް އިންޑޮނޭޝިއާ ގައި ބޭއްވުމަށް ސްޕީކަރ އެދިވަޑައިގެންނެވި އެވެ. މިކަމުގެ ސަބަބުން ރާއްޖޭގައި ހުރި ފުރުޞަތު ތަކަށް އިންވެސްޓަރުންގެ ޝައުގުވެރިކަން އިތުރުވެ ދެ ގައުމުގެ އިޤްތީޞާދީ ގޮތުން ބާރުވެރިވެގެންދާނެ ކަމަށް ވެސް ސްޕީކަރ ވިދާޅުވި އެވެ.

މިބައްދަލުވުމަށް ކުރީގެ ނައިބް ރައީސް ފައިސަލް ނަސީމް އިންޑޮނޭޝިއާ ގެ ޤާނޫނު ހަދާ މަޖިލީހަށް ވަޑައިގަތުމުން، އެމަނިކުފާނަށް ވަނީ ވަރަށް ހޫނު މަރުހަބާ އެއް ދަންނަވާފަ އެވެ.