އިންޑޮނީޝިޔާ ގެ ގާނޫނު ހަދާ މަޖިލިސް މެމްބަރުންނަށް ދޭން ނިންމި އެލަވަންސް މައްސަލައިގައި އެ ގައުމުގައި ސަރުކާރާ ދެކޮޅަށް ފެށި މުޒާހަރާތައް ހޫނު ވެއްޖެ އެވެ.

އިންޑޮނޭޝިއާގެ ގައުމީ ފެންވަރުގައި ކުރެވެމުންދާ މުޒާހަރާތައް މައިތިރި ކުރުމުގެ ގޮތުން، ބޮޑުކުރި ބައެއް އިނާޔަތްތައް އަނބުރާ ގެނައުމަށް ސިޔާސީ ޕާޓީތަކުން އެއްބަސްވެއްޖެ ކަމަށް އެގައުމުގެ ރައީސް ވަނީ ވިދާޅުވެފައެވެ.

ވޭތުވެދިޔަ ހަފްތާގައި، ވެރިރަށް ޖަކާރޓާ ހިމެނޭގޮތަށް އެގައުމުގެ އެކި ސިޓީތަކުގައި ސަރުކާރާ ދެކޮޅު މުޒާހަރާތައް އަންނަނީ ކުރަމުންނެވެ.

ރިޕޯޓުތައް ބުނާ ގޮތުގައި މުޒާހަރާކުރާ ފަރާތްތަކާއި ފުލުހުންނާ ދެމެދު ކުރިމަތިލުންތައް ހިނގާފައިވެއެވެ.

މުޒާހަރާ ކުރަން ޖެހުނު އެތައް ސަބަބެއް ހިމެނޭ ކަމަށް މުޒާހަރާ ކުރާ މީހުން ބުނަމުން ގެންދާއިރު، މައިގަނޑު ޝަކުވާއަކީ މަޖިލިސް މެންބަރުންނަށް އަލަށް ދޭން ފަށާފައިވާ މަހު އެލަވަންސްއާ ގުޅޭ މައްސަލައެވެ.

ރައީސް ޕްރަބޯވޯ ސުބިއާންތޯ އާދީއްތަ ދުވަހު އިއުލާނު ކުރެއްވި ގޮތުގައި، ބައެއް އިނާޔަތްތަކާއި އެލަވަންސްތައް ކުޑަކުރެވޭނެއެވެ. މި ހަމަނުޖެހުންތަކާ ގުޅިގެން ޗައިނާ އަށް ކުރުމަށް ހަމަޖެހިފައިވާ ދަތުރެއް ކެންސަލްކުރަން ޖެހިފައިވާ އިންޑޮނޭޝިއާގެ ރައީސް ވިދާޅުވި ގޮތުގައި، ބައެއް މުޒާހަރާތައް ސުލްހަވެރި ކަން ފަހަނަ އަޅާ ގޮސް، "ޣައްދާރުވުމާއި ޓެރަރިޒަމް" ގެ ސިފަ ޖެހިފައިވެއެވެ.

އޭ.އެފް.ޕީ ނިއުސް އެޖެންސީން ރިޕޯޓުކުރި ގޮތުގައި، އާދީއްތަ ދުވަހު އިންޑޮނޭޝިއާގެ މާލީ ވަޒީރު ސްރީ މުލްޔާނީ އިންދްރަވަތީގެ ގެކޮޅު ހިމެނޭގޮތަށް އެތައް ތަނެއްގައި ލޫޓުވުމުގެ ހާދިސާތައް ހިނގާފައިވެއެވެ. މި އިހުތިޖާޖުތައް މައިގަނޑު ގޮތެއްގައި އަމާޒުވެފައި ވަނީ ގާނޫނު ހަދާ މަޖިލިހުގެ މެމްބަރުންގެ އެލަވަންސް 50 މިލިއަން ރުޕިޔާ (3,030 ޑޮލަރު) އަށް ބޮޑުކުރި މައްސަލައަށެވެ - މިއީ ޖަކާރޓާގެ އެންމެ ދަށް މުސާރައަށްވުރެ 10 ގުނަ ބޮޑު އަދަދެކެވެ.

ބުރާސްފަތި ދުވަހު ވެރިރަށުގައި ބޭއްވުނު މުޒާހަރާއެއްގައި 21 އަހަރުގެ ޑްރައިވަރަކު ފުލުހުންގެ އުޅަނދަކުން އަރައި މަރުވުމާ ގުޅިގެން މުޒާހަރާތައް އިތުރަށް ގޯސްވެގެން ދިޔައެވެ. ހުކުރު ދުވަހުގެ ރޭ ސަރަހައްދީ ޕާލިމެންޓް އިމާރާތެއް ގައި އަލިފާން ޖެހުމުގެ ސަބަބުން ތިން މީހުން މަރުވިއެވެ. ހަފްތާ ބަންދުގައި މުޒާހަރާތައް ކުރިއަށް ދިޔައިރު، ޖަކާރޓާގެ މަގުމަތީގައި މުޒާހަރާ ކުރަމުން ދިޔަ މީހުންގެ ގަޔަށް ފުލުހުން ކަރުނަގޭސް ޖެހިއެވެ. އަދި މުޒާހަރާކުރާ ބައެއް ފަރާތްތަކުން ފުލުހުންގެ މަރުކަޒަކަށް މޮލޮޓޯވް ކޮކްޓެއިލް އާއި ފަޓާސް އުކާފައިވެއެވެ.

ރައީސް ޕްރަބޯވޯ މެންބަރުންގެ އެލަވަންސް ކުޑަކުރާނެ ކަމަށާއި، ބޭރު ދަތުރުތައް ވަގުތީގޮތުން ހުއްޓާލެވޭނެ ކަމަށް ވިދާޅުވި ނަމަވެސް، ފުޅާ ދާއިރާއެއްގައި ފެތުރިފައިވާ ނުރުހުން މަޑުޖެހިދާނެކަމާ މެދު ސުވާލު އުފެދޭ ކަމަށް ރިޕޯޓުތައް ބުނެއެވެ.

އެ ގައުމުގެ އެންމެ ބޮޑު ދަރިވަރުންގެ ޖަމްއިއްޔާ ކަމުގައިވާ އޯލް އިންޑޮނޭޝިއަން ސްޓޫޑެންޓްސް ގެ އެގްޒެކެޓިވްސް ބޮޑީގެ އިސްވެރިޔާ މުޒައްމިލް އިހްސާން ރޮއިޓަރސް އަށް ވާހަކަ ދައްކަމުން ބުނި ގޮތުގައި ސަރުކާރުން އެޅި ފިޔަވަޅު "ފުދޭވަރެއް ނޫން" ކަމަށާއި އިތުރު މުޒާހަރާތަކެއް ކުރުމަށް ވިސްނަމުންދާ ކަމަށެވެ.

"ސަރުކާރުން އަސްލު މައްސަލަތައް ހައްލުކުރަންޖެހޭ،" އޭނާ ބުންޏެވެ. "މަގުމަތީގައި ފާޅުކުރެވޭ ރުޅިވެރި ކަމަކީ ސަބަބެއް ނެތި އުފެދޭ އެއްޗެއް ނޫން." މުޒާހަރާ ކުރާ ފަރާތްތަކުން އެދެނީ މުވައްޒަފުންގެ މުސާރަ ބޮޑުކުރުމަށާއި، ޓެކްސް ކުޑަކުރުމަށާއި، ކޮރަޕްޝަނާ ދެކޮޅު ފިޔަވަޅުތައް ހަރުދަނާ ކުރުމަށެވެ.