މޭޑޭ ނުވަތަ ބައިނަލްއަގުވާމީ ގޮތުން ފާހަގަކުރާ މަސައްކަތްތެރިންގެ ދުވަހަކީ އެ މީހުންގެ ހައްގުތަކުގެ ވާހަކަ ދެކެވޭ ދުވެހެވެ. މި ދުވަސް ފާހަގަކުރުމަށް ދުނިޔޭގެ އެކި ކަންކޮޅުތަކުގައި ބޮޑެތި އެއްވުންތައް ބާއްވައެވެ.

ޓޯކިޔޯއިން ފެށިގެން ތައިވާން އަދި މެނީލާ އާއި ހަމައަށް، އޭޝިޔާގެ އެކި ކަންކޮޅުތަކުގައި މީހުން މޭ ޑޭ ފާހަގަކުރީ މާރޗްތަކާއި އިހުތިޖާޖުތަކާ އެކުގައެވެ. މީގެ ތެރެއިން ގިނަ އިހުތިޖާޖުތައް އަމާޒުކޮށްފައިވަނީ އެމެރިކާގެ ރައީސް ޑޮނަލްޑް ޓްރަމްޕްގެ ސިޔާސަތުތަކަށާއި ދުނިޔޭގެ އިޤްތިޞާދީ ހާލަތުގެ ދަށަށްދާ ދިއުމާއި ގުޅިގެން އުފެދިފައިވާ ބިރުވެރި ކަމާއި ގުޅިގެން ވަނީ އަޑު އުުފުލާފައެވެ. އެމެރިކާގެ ޝިކާގޯ، ލޮސް އެންޖެލެސް، ނިއު ޔޯކް ފަދަ ސަރަހައްދުތަކުގައި މޭޑޭ ފާހަގަކުރުމަށް ބޮޑެތި ރެލީތައް ވަނީ ބާއްވާފައެވެ.

މީގެ އިތުރުން ތައިވާނު، ސައުތު ކޮރެއާ، އިންޑޮނީޝިއާ، ފިލިޕީންސްގައި، ނޭޕާލް، ޕާކިސްތާން، ތުރުކީ އަދި އިންޑިޔާގައި ވަނީ މިދުވަސް ފާހަގަކުރުމުގެ ގޮތުން ރެލީތައް ބާއްވާފައިވެ އެވެ. މޭ ޑޭ ފާހަގަކުރުމަށް އިސްތަންބޫލުގައި ކުރިއަށްދިޔަ ރެލީގެ ތެރެއިން ހިނގި ހަމަނުޖެހުމުގައި 200 އަށްވުރެ ގިނަ މީހުން ހައްޔަރުކޮށްފައިވެ އެވެ.

މޭޑޭގެ އެންމެ ބޮޑު އެއްވުމެއް ކުރިއަށްދިޔަ މެނީލާގައި، އެތައް ހާސް ފިލިޕީނޯ މަސައްކަތްތެރިން ހިނގާލުން ކުރިއަށް ގެންގޮސްފައިވަނީ ރިޔާސީ ގަނޑުވަރާ ކައިރިންނެވެ. އެތަނުގައި ފުލުހުން ބެރިކޭޑްތަކާއެކު ބައެއް މަގުތައް ބަންދުކޮށްފައިވެ އެވެ.

މީގެ އިތުރުން މިދުވަސް ފާހަގަކުރުމަށް އިންޑޮނޭޝިޔާގައި، ރައީސް ޕްރަބޯވޯ ސުބިއަންޓޯ ވަނީ ޖަކާޓާގެ ނޭޝަނަލް މޮނިއުމަންޓް ޕާކުގައި އޭނާއަށް ހިތްވަރުދިން ހާސްތަކެއްގެ މަސައްކަތްތެރިންނާ މަރުޙަބާ ވިދާޅުވެފައެވެ. އަދި އެއްވެ ތިބި މީހުންނާއި ވާހަކަދައްކަވަމުން ވިދާޅުވެފައިވަނީ ވެރިކަންކުރާ އޭނާގެ ސަރުކާރުން އިންޑޮނޭޝިޔާއިން ފަޤީރުކަން ނައްތާލުމަށް ވީހާވެސް ބޮޑަށް މަސައްކަތްކުރާނެ ކަމަށެވެ.

ކޮންފެޑެރޭޝަން އޮފް އިންޑޮނޭޝިއަން ޓްރޭޑް ޔޫނިއަންސްގެ ރައީސް ސައީދު އިޤްބާލް ވިދާޅުވާ ގޮތުގައި، ދެކުނު އޭޝިޔާގެ އެންމެ ބޮޑު އިޤްތިޞާދުގެ އެކި ކަންކޮޅުތަކުގައި ބޭއްވޭ މޭ ޑޭ މާރޗްތަކުގައި 200،000 އަށްވުރެ ގިނަ އިންޑޮނޭޝިއަން މަސައްކަތްތެރިން ވަނީ ބައިވެރިވެފައެވެ. އެމީހުން ގޮވާލާފައިވަނީ އައުޓްސޯސިންގ ގަވާއިދުތައް ނިމުމަކަށް ގެނައުމަށާއި، މުސާރަ ބޮޑުކުރުމަށާއި، އަދި ގޭތެރޭގެ މަސައްކަތްތެރިންނާއި ބޭރުގައި މަސައްކަތްކުރާ ބިދޭސީ މަސައްކަތްތެރިން ހިމާޔަތްކުރުމަށެވެ.

ރާއްޖޭގައި މި ދުވަސް އެންމެ ފުރަތަމަ ކުލަގަދަ ގޮތެއްގައި ފާހަގަކުރަން ފެށީ 2009 ގައި އެމްޑީޕީ ސަރުކާރުންނެވެ. މަސައްކަތްތެރިންގެ ދުވަސް ފާހަގަކުރަން ބޭއްވި ހިނގާލުންތަކަކީ މިހާތަނަށް ރާއްޖޭގައި ބޭއްވި އެންމެ ބޮޑެތި ހިނގާލުންތައް ކަމަށް ވަނީ ވެފައެވެ. އޭގެ ތެރޭގައި 2015 ވަނަ އަހަރު އިދިކޮޅު ފަރާތްތަކުން ގުޅިގެން ބޭއްވި ބިޔަބޮޑު މުޒާހަރާ ފާހަގަކޮށްލެވެއެވެ. އެއީ މިހާތަނަށް ބޭއްވި އެންމެ ބޮޑު އެއްވުމަށް ވަނީ ވެފައެވެ. އެއްވެ އުޅުމާއި ހިޔާލުފާޅުކުރުމުގެ މިނިވަންކަމަށް ހުރަސް އަޅައި މާލޭގައި ކާނިވާ ސަރަހައްދުގައި ނޫނީ ސިޔާސީ އެއްވުމެއް ނުބޭއްވޭ ގޮތަށް ވެސް ކަނޑައެޅިއެވެ.

ރާއްޖޭގައިވެސް މަސައްކަތްތެރިންގެ ދުވަހެއް ފާހަގަކުރާ އިރު މިއަދު މަސައްކަތްތެރިންގެ އެތައް ހައްގެއް ވަނީ ގެއްލިފައެވެ. މަސައްކަތްތެރިން ތިބީ ބިރުވެރިކަމެއްގެ ތެރޭގައެވެ. ސިޔާސީ ގޮތުން ބޭނުން ފިކުރެއް ގެންގުޅުމުގެ މިނިވަންކަމެއް ނެތެވެ. ސަރުކާރު ހިންގާ ޕާޓީން ބާއްވާ ޖަލްސާތަކަށް ދިއުން ލާޒިމުކުރެއެވެ. އިދިކޮޅު ޕާޓީ އަށް ނިސްބަތްވާ މެންބަރެއް ނަމަ ވަޒީފާ ގެއްލުމުގެ ބިރު އޮވެއެވެ. ހާއްސަކޮށް އިދިކޮޅު ޕާޓީތަކުގެ ޖަލްސާތަކުގައި ބައިވެރިވެ ނުވަތަ މިނިވަންކަމާ އެކު ހިޔާލު ފާޅުކުރާ ނަމަ ވަޒީފާ ގެއްލެއެވެ. ނުވަތަ ވަޒީފާ ދައްކުރެއެވެ. ނުވަތަ ތިމާ އުޅޭ ރަށް ނޫން އެހެން ރަށަކަށް ނުވަތަ މާ ދުރު ސަރަހައްދަކަށް ބަދަލުކުރެއެވެ. މިފަދަ އެތައް މަންޒަރެއް ދަނީ ފެންނަމުންނެވެ.

މިފަދަ އެތައް ދަތިތަކެއް މަސައްކަތްތެރިންނަށް ކުރިމަތިވެފައިވާ އިރު މިކަންކަމާ މެދު އަޑު އުފުލޭނެ ގޮތެއް ނެތެވެ. ހަޅުތާލުކުރުމާއި މުޒާހަރާކުރުމަކީ ގާނޫނުއަސާސީ ކަށަވަރުކޮށްދޭ ކަމަކަށްވީ ނަމަވެސް ގާނޫނުއަސާސީގެ މައްޗަށް ގާނޫނުތައް ހަދައި އެ ހައްގުތައް ވަނީ ހަނިކުރެވިފައެވެ. ނުވަތަ ނިގުޅައިގެންފައެވެ. އެކަމާ މެދު ބަހެއް ބުނެލާނެ އިދާރާއެއް ނެތެވެ. ގާނޫނުއަސާސީގެ މައްޗަށް ގާނޫނުތައް ބާރު ހިންގަމުންދާ އިރު އެއީ ގާނޫނާ ހިލާފް ނިންމުންތަކެއްކަން ބުނެދޭން އޮތް އިދާރާތަކާއި ސުޕްރީމް ކޯޓުން ބަހެއް ނުކިޔައެވެ. އެ ވާހަކަ ދައްކަން އިދިކޮޅު ފަރާތްތަކަށް އޮތް ހުރިހާ ދޮރެއް ވަނީ ބަންދުކޮށްފައެވެ. މަސައްކަތްތެރިންނަށް ވެސް އެ ވާހަކަ ދެއްކުމުގެ ހައްގެއް މި ސަރުކާރުގައެއް ނެތެވެ. އެހެން ކަމުން މަސައްކަތްތެރިންގެ ހައްގުތަކައިގެން އަޑު އުފުލޭނެ އެއްވެސް ގޮތެއް މިހާރަކު ނެތެވެ.