އިންޑޮނޭޝިއާގެ ސަރުކާރާ ދެކޮޅު މުޒާހަރާތަކަށް އަވައްޓެރި ޤައުމުތަކުގެ މީހުން އެހީވަނީ

އިންޑޮނޭޝިއާ ގައި ކުރިއަށް ދާ ސަރުކާރާ ދެކޮޅު މުޒާހަރާ ތަކަށް އަވައްޓެރި ގައުމުތަކުގެ މީހުން އެހީވާން ފަށައިފިއެވެ.

ޑެލިވަރީ ޚިދުމަތުގައި އުޅެމުން ދިޔަ ޑްރައިވަރެއް ފުލުހުން މަރާލުމާ ގުޅިގެން އިތުރަށް ގޯސްވެގެން ދިޔަ އިންޑޮނޭޝިއާގެ މުޒާހަރާތަކަށް ޑެލިވަރީ އެޕްތައް މެދުވެރިކޮށް އެހީތެރިވުމުގެ މަސައްކަތް ދެކުނު އޭޝިއާގެ ގައުމުތަކުގެ އާންމުން ވަނީ ފަށާފައެވެ.

އަވައްޓެރި މެލޭޝިއާ، ސިންގަޕޫރު، ފިލިޕީންސް އަދި ތައިލެންޑުގެ ބައެއް މީހުން ގްރެބް އަދި ގޮޖެކް އެޕްތައް ބޭނުން ކޮށްގެން އިހުތިޖާޖުތަކުގައި މުހިއްމު ދައުރެއް އަދާކުރާ ޑެލިވަރީ ރައިޑަރުންނަށް ހިތްވަރު ދިނުމުގެ ގޮތުން ގެންދަނީ އިންޑޮނޭޝިއާ އިން ކާބޯތަކެތި އޯޑަރު ކުރަމުންނެވެ.

ފާއިތުވި ހަފްތާގައި ގޮޖެކް ޑްރައިވަރު ފުލުހުން މަރާލުމާ ގުޅިގެން އާންމުންގެ ރުޅިވެރިކަން އިތުރުވެ، އިހުތިޖާޖުކުރާ ފަރާތްތަކާއި ފުލުހުންނާ ދެމެދު ވަރުގަދަ ކުރިމަތިލުންތައް ހިނގައި، ސަރުކާރުގެ އިމާރާތްތަކުގައި ހުޅުޖަހާފައި ވެއެވެ.

އިންޑޮނޭޝިއާގެ އެކި ސިޓީތަކުގައި ދިރިއުޅުމުގެ އަގުބޮޑުވުމާއި، ގާނޫނު ހަދާ މަޖިލީހުގެ މެމްބަރުންނަށް ދޭ ބޮޑެތި އިނާޔަތްތަކާއި، އިޖުތިމާޢީ ހަމަހަމަކަން ނެތުމާ ގުޅިގެން ފެށުނު މުޒާހަރާތަކުގައި މިހާތަނަށް މަދުވެގެން 10 މީހުން މަރުވެފައިވެއެވެ.

ފާއިތުވި ދުވަސްތަކުގައި ދެކުނު އޭޝިއާ ސަރަހައްދު ރަމްޒުކުރާ އަކުރުތައް ބޭނުން ކޮށްގެން ހަދާފައިވާ #SEAblings ހޭޝްޓެގް ސޯޝަލް މީޑިއާގައި ވައިރަލްވެ، އަވައްޓެރި ޤައުމުތަކުގެ ބައެއް މީހުން އިންޑޮނޭޝިއާގެ އިހުތިޖާޖު ކުރާ މީހުންނާއި ޑެލިވަރީ ރައިޑަރުންނަށް އެހީތެރިވާން ވަނީ ފަށާފައެވެ.

މުޒާހަރާގައި ބައިވެރިވާ މީހުންނަށް އެހީތެރިވާނެ ގޮތުގެ ގައިޑްތައް ސޯޝަލް މީޑިއާ ގައި ވަނީ ޝާއިޢުކޮށްފައެވެ. މިގޮތުން އިންޑޮނޭޝިއާ ގައި ގްރެބް އަދި ގޮޖެކް މެދުވެރިކޮށް އަވައްޓެރި ގައުމުތަކުގެ މީހުން ކާބޯތަކެތި އޯޑަރުކޮށް، ޑެލިވަރީ ރައިޑަރުންނަށް އެ ކާބޯތަކެތި ބޭނުން ކުރުމަށް ނުވަތަ އެމީހުންގެ އާއިލާއާއި ރަހުމަތްތެރިންނަށް ބަހާލުމަށް ދަނީ ބުނަމުންނެވެ.

ވައިރަލްވި އެއް ވީޑިއޯގައި ޑެލިވަރީ ކުރާ މީހަކަށް ކާނާގެ އޯޑަރު ދިން ސިންގަޕޫރުގެ ފަރާތަކަށް ޝުކުރު އަދާކުރަމުން މީހަކު ރޮމުން އަސަރާއެކު ވާހަކަ ދައްކައިފައިވެއެވެ.

"ގިނަ މަގުތައް ބަންދުކޮށްފައި، ގިނަ ރެސްޓޯރަންޓްތައް ބަންދުކޮށްފައި، ސްކޫލްތައް ބަންދުކޮށްފައި، އޮފީސްތައް ބަންދުކޮށްފައި، އަހަރެމެންނަށް ލިބޭ އޯޑަރުތައް ވަރަށް މަދު. އެކަމަކު އަހަންނަށް ވަރަށް އިހުސާސްވޭ، އަހަރެމެންނާ މެދު ވިސްނާ ރަނގަޅު މީހުން އަދިވެސް ތިބިކަން - މިސާލަކަށް މިކަހަލަ މީހުން." އޭނާ އެ ވީޑިއޯ ގައި ބުނެފައިވެއެވެ.

"މިއަދު މިކަހަލަ ގިނަ އޯޑަރުތައް އައިސްފައިވޭ - މީހުން ކާނާ ނުވަތަ ބުއިންތައް އޯޑަރުކޮށްފައި އެތަކެތި ޑެލިވަރީ ނުކުރުމަށް އަންގައި، އެހެން ޑްރައިވަރުންނާ ހިއްސާކުރުމަށް ވަނީ ބުނެފައި. އަހަރެންގެ ރަހުމަތްތެރިއަކަށްވެސް ކުރިން ލިބުނު އަދި އޭނާ އެހެން މީހުންނާ ހިއްސާކުރި. މިހާރު އަހަރެން ވެސް އަހަރެންގެ ރަހުމަތްތެރިންނާ ހިއްސާ ކުރާނަން."

ރޮއިޓަރސްގެ ރިޕޯޓުގައިވާ ގޮތުން، އިންޑޮނޭޝިއާ އިން ބޭރުގެ ޔޫސަރުންގެ ފަރާތުން - ޚާއްޞަކޮށް ދެކުނު އަދި އިރުމަތީ އޭޝިއާ އިން - އޯޑަރުތައް އިތުރު ވަމުންދާ ކަމަށް ގްރެބް އިން ބުނެފައިވެއެވެ.

ދިރިއުޅުމުގެ އަގުބޮޑުވުމާއި ސިޔާސީ އިސްވެރިންނާ މެދު އާންމުންގެ ހިތްހަމަނުޖެހުންތައް ބޮޑުވުމުގެ ސަބަބުން ބޮޑެތި މުޒާހަރާތައް ވެރިރަށް ޖަކާޓާ ގައި އޯގަސްޓް 25 ގައި ފެށުނީ، ޕާލަމެންޓް މެންބަރުންނަށް ދޭ މުސާރަ އާއި ހައުސިންގ އެލަވަންސް ބޮޑުކަމަށް ގިނަ ބަޔަކު ދެކޭތީ އެކަމާ ދެކޮޅު ހެދުމުގެ ގޮތުންނެވެ.

ހަފްތާ ނިމުނުއިރު، 21 އަހަރުގެ އައްފާން ކުރުނިއަވާން އޯޑަރެއް ޑެލިވަރީ ކުރަން ދަނިކޮށް މުޒާހަރާތަކާ ދެކޮޅަށް ހަރަކާތްތެރިވަމުން ދިޔަ ފުލުހުންގެ އުޅަނދަކުން އަރައި މަރުވުމާ ގުޅިގެން މުޒާހަރާތައް ހޫނުވެގެން ދިޔައެވެ.

ރައީސް ޕްރަބޯވޯ ސުބިއަންޓޯ އަދި ޕޮލިސް ޗީފް އޭނާގެ މަރަށް މަޢާފަށް އެދުނު ނަމަވެސް - އެކަމުން އިތުރު ނުރުހުން އުފެދި، ވެސްޓް ޖާވާ އިން ފެށިގެން ބާލީ އަދި ލޮމްބޮކް ޖަޒީރާތަކަށް މުޒާހަރާތައް ފެތުރިގެން ދިޔައެވެ.

އާންމުންގެ ރުޅިވެރިކަން މައިތިރިކުރުމަށް ޕްރަބޯވޯ ވަނީ ގާނޫނު ހަދާ މަޖިލިހުގެ މެމްބަރުންގެ ބައެއް އިނާޔަތްތައް ކުޑަކުރާނެ ކަމަށް އިޢުލާނު ކުރައްވާފައެވެ.

ނަމަވެސް މުޒާހަރާތައް ހުއްޓުމެއް ނެތި ދަނީ ކުރިއަށެވެ. އެގޮތުން ބުދަ ދުވަހު އެތައް ސަތޭކަ އަންހެނުން އިސްވެ ހިންގި ބޮޑު މުޒާހަރާ ފާހަގަ ކުރެވެއެވެ.