ރައީސްގެ ސެކިއުރިޓީ އަށް ހުޅުދޫ އިން ކުއްޔަށް ނެގި ކާރަށް ލިބުނު ގެއްލުމަށް އެމްއެންޑީއެފް އިން ޒިންމާ އެއް ނުވި!

ސ. ހުޅުދޫ ގައި ރައީސް ޑރ. މުހައްމަދު މުއިއްޒުގެ ސެކިއުރިޓީ އަށް އެމްއެންޑީއެފް އިން ކުއްޔަށް ނަގައިގެން ދުއްވި ވެހިކަލް އަކުން ޖެހި ނުރައްކާތެރި އެކްސިޑެންޓެއް މައްސަލައިގައި، ކުއްޔަށް ނެގި ކާރު ހަދަން އެމެއެންޑީއެފް އިން ފައިސާ ނުދިން މައްސަލައެއް ފެންމަތި ވެއްޖެ އެވެ.

މި މަހުގެ 5 ވަނަ ދުވަހުގެ މެންދުރު ފަހުގެ ވަގުތެއްގައި ހިނގި މި އެކްސިޑެންޓާ ގުޅިގެން ދެމަފިރި އަކަށް ވަނީ އަނިޔާ ވެސް ވެފަ އެވެ. މި ހާދިސާއާ ދެ ކާރަށް ވެސް ވަނީ ބޮޑެތި ގެއްލުން ތަކެއް ލިބިފަ އެވެ.

އެކަމާ ގުޅިގެން ރައީސްގެ ސެކިއުރިޓީ އިން ކުއްޔަށް ނަގައިގެން ދުއްވި ކާރުގެ ވެރި ފަރާތުން ވަނީ ސޯޝަލް މީޑިއާގައި ކަންބޮޑުވުން ފާޅުކޮށްފަ އެވެ. އޭނާ ކުރި ޕޯސްޓުގައި ބުނީ ރައީސްގެ ސެކިއުރިޓީ އަށް އެމްއެންޑީއެފް އިން ކުއްޔަށް ގެންދިޔައީ އޭނާގެ ކާރު ކަމަށާ އެ އެކްސިޑެންޓު ވުމުން ކާރު ހަދަން ބޭނުންވާ ފައިސާ ދޭނެ ކަމަށް ބުނެ މޮޅު ވާހަަކަތަކެއް އެމްއެންޑީއެފް އިން ދެއްކި ކަމަށެވެ.

އެމްއެންޑީއެފް ގެ ޓީމު އެ ރަށުން ފުރައިގެން ދިޔަތާ އެތައް ދުވަހެއް މިހާރު ފާއިތުވެފައިވާ ކަން ފާހަގަކޮށް އެ ޕޯސްޓުގައި ބުނީ ކާރު ހަދަން ދާ ޚަރަށް ވާ ފައިސާ އެނގޭނެ ހެން ގަރާޖުން ދީފައިވާ ކޯޓޭޝަން ވެސް އެ ކާރު ދުއްވަން އިން އެމްއެންޑީއެފް އޮފިސަރަށް ފޮނުވާފައިވާ ކަމަށެވެ.

އޭގެ ފަހުން ކާރު ހެދުމަށް އެއްވެސް މަސައްކަތެއް ކުރަން ކާރު ދުއްވި އޮފިސަރު ވެސް އެމްއެންޑީއެފް ގެ އެހެން ބޭފުޅަކު ވެސް އެއްބާރު ލުން ދީފައި ނުވާކަމަށް އެ ކާރުގެ ވެރިފަރާތުން ވަނީ ބުނެފަ އެވެ. އަދި އެ ހާދިސާ އަށް ގާތްގަނޑަކަށް މަހެއް ވެފައިވީއިރު ކާރު ހެދޭނެ ގޮތެއް ނެތި، އާއިލާ އަށް ދިމާވާ އުނދަގުލާ، ވާ ގެއްލުމުގެ ޒިންމާ ނަގާނީ ކޮން ފަރާތަކުން ތޯ އޭނާގެ ޕޯސްޓުގައި ވަނީ ސުވާލު އުފައްދާފަ އެވެ.

މިހާރު މިކާރަށް ލިބުނު ގެއްލުމަށް އެމްއެންޑީއެފުން ޒިންމާވާން ބޭނުން ނުވާގޮތަކަށް މި ކަމާ ބެހޭ ގޮތުން އެމްއެންޑީއެފް އިން ވާހަކަ ދެއްކި އޮފިޝަލުގެ ބަހުން ހާމަވެއެވެ.

މިކަމާ ގުޅިގެން ރާއްޖެއެމްވީ އިން އެމްއެންޑީއެފް އަށް ގުޅުމުން އެމްއެންޑީއެފް އިންފޮމޭޝަން އޮފިސަރު ވިދާޅުވީ އެކަމުގައި މީޑިއާ އަށް މައުލޫމާތު ދޭނީ އެ މުއައްސަސާ އަކުން ނޫން ކަމަށެވެ. އަދި އެ މައްސަލަ ކާރުގެ ވެރިފަރާތުން ފުލުހުންނަށް ހުށަހަޅާފައިވާ ނަމަ އެ މައްސަލަ ބަލާނީ ފުލުހުން ކަމަށާ އެކަމުގެ އިތުރު ތަފްސީލު ހޯދަން ޖެހޭނީ ވެސް ފުލުހުންގެ އިދާރާ އިން ކަމަށް އިންފޮމޭޝަން އޮފިސަރު ވިދާޅުވި އެވެ.

މި އެކްސިޑެންޓްގެ ސަބަބުން ސެކިއުރިޓީ އިން ކުއްޔަށް ނަގައިގެން ދުއްވި ކާރުގެ އިތުރުން އިތުރު ކާރަކަށް ވެސް ގެއްލުން ލިބިފައި ވެއެވެ.