ނިއު ރޭޑިއަންޓްގެ ކޯޗުކަމުން ވަކިވެ، ސުޒޭން އެ ކުލަބުގެ ޓެކްނިކަލް ޑައިރެކްޓަރަކަށް

ފުރަތަމަ ޑިވިޝަންގައި ވާދަ ކުރަމުން އަންނަ ނިއު ރޭޑިއަންޓް ސްޕޯޓްސް ކުލަބަށް އިރުޝާދު ދެމުން އައި އަލީ ސުޒޭން، އެ ޓީމުގެ ކޯޗުކަމުން ވަކިވެއްޖެ އެވެ.

ނިއު ރޭޑިއަންޓް އިން ހާމަ ކޮށްފައިވާ ގޮތުގައި، އެ ކުލަބުގެ ކޯޗުކަމުން ވަކިވެ ސުޒޭން ދެން މސައްކަތް ކުރާނީ ކުލަބުގެ ޓެކްނިކަލް ޑައިރެކްޓަރގެ ގޮތުގަ އެވެ. އެ ކުލަބުން ބުނެފައި ވަނީ، ކޯޗުކަމުން ސުޒޭން ވަކިވެފައި ވަނީ އާއިލީ ސަބަބަކަށް ޓަކައި ކަމަށެވެ. ނިއު ރޭޑިއަންޓުން ވަނީ، ކޯޗުގެ ގޮތުގައި ސުޒޭން ކޮށްފައިވާ މަސައްކަތް ތަކަށް ޝުކުރު އަދާ ކޮށްފަ އެވެ.

މިފަހަރުގެ ފުރަތަމަ ޑިވިޝަންގައި ނިއު ރޭޑިއަންޓުން ވާދަ ކޮށްފައި ވަނީ ވަރަށް ބޮޑަށް ތައްޔާރު ވެގެންނެވެ. މެދު ކެނޑުމަކަށް ފަހު ނިއު ރޭޑިއަންޓަށް ފުރަތަމަ ޑިވިޝަންގެ ޖާގަ ލިބުނީ، ސުޕަ ޔުނައިޓެޑު ސްޕޯޓްސް (ސަސް) ފުރަތަމަ ޑިވިޝަނުގައި ނުކުޅެން ނިންމުންނެވެ. 

ސުޒޭންގެ އިރުޝާދުގެ ދަށުން މި ސީޒަންގެ ދިރާގު ދިވެހި ޕްރިމިއާ ލީގު ނިއު ރޭޑިއަންޓް އިން ނިންމާލީ ތިން ވަނައިގަ އެވެ. އޭގެ ފަހުން ކުޅުނު ޕްރެޒިޑެންޓްސް ކަޕްގައި ނިއު ރޭޑިއަންޓް ވަނީ ސެމީ ފައިނަލްގައި ކުޅެފަ އެވެ. ސެމީ އިން ބަލިވެ މުބާރާތުން ކެޓިއިރު، ކުރިމަތީގައި ދެން އޮތީ އެފްއޭ ކަޕް އެވެ. 

ނިއު ރޭޑިއަންޓްގެ ޗެއާމަން އަޙުމަދު މުބީން ވެސް ވަނީ، ސުޒޭނުގެ މަސައްކަތަަށް ޝުކުރު އަދާ ކުރައްވައިފަ އެވެ. ރާއްޖޭގެ ސީނިއާ ޤައުމީ ފުޓުބޯޅަ ޓީމަށް ވެސް އިރުޝާދު ދީފައިވާ ސުޒޭނަކީ، މިވަގުތު ރާއްޖޭގައި ހުރި އެންމެ ތަޖުރިބާކާރު އެއް ކޯޗެވެ. ނިއު ރޭޑިއަންޓުގެ އިތުރުން ސުޒޭން ވަނީ މީގެ ކުރިން ފުރަތަމަ ޑިވިޝަންގެ ގިނަ ކުލަބު ތަކަކަށް އިރުޝާދު ދީފަ އެވެ.