2018 ވަނަ އަހަރުގެ ވޯލްޑްކަޕް ކޮލިފައިންގައި ކުޅުނު މެޗުތަކުން ސްޕެއިން ތަފާތު ބޮޑު ނަތީޖާއަކުން މޮޅުވިއިރު އިޓަލީއާ ވޭލްސް ވެސް މޮޅުވެއްޖެއެވެ.

ޔޫރަޕުގެ ވޯލްޑްކަޕް ކޮލިފައިންގެ ގްރޫޕް ޖީގައި ސްޕެއިން އިން ކުޅުނު މެޗު އެ ޓީމުން ކާމިޔާބު ކޮށްފައިވަނީ ލިޗްޓެންސްޓައިންއާ ވާދަކޮށް 8-0 ގެ ތަފާތު ބޮޑު ނަތީޖާއަކުންނެވެ. ލިޗްޓެންސްޓައިންގައި ކުޅުނު މި މެޗުގެ ފުރަތަމަ ހާފުގައި ސްޕެއިން އިން ވަނީ ހަތަރު ލަނޑު ޖަހާފައެވެ. އެގޮތުން މި ލަނޑުތައް އެ ޓީމަށް ކާމިޔާބު ކޮށްދީފައިވަނީ ކެޕްޓަން ސާޖިއޯ ރާމޯސްއާ އަލްވާރޯ މޮރާޓާއާ ހުނަރުވެރި މިޑްފީލްޑާ އިސްކޯގެ އިތުރުން ޑޭވިޑް ސިލްވާއެވެ.

މުޅި މެޗު ވެސް ކޮންޓްރޯލްކޮށް މޮޅު ކުޅުމެއް ދެއްކި ސްޕެއިންގެ ޓީމަށް ދެވަނަ ހާފުގައި އެ ޓީމުގެ ފޯވާޑް އިއާގޯ އަސްޕާސްވަނީ ދެ ލަނޑު ޖަހައިދީފައެވެ. އޭނާގެ އިތުރުން މޮރާޓާވެސް ވަނީ މި ހާފުގައި ލަނޑެއް ކާމިޔާބު ކޮށްފައެވެ. ސްޕެއިން އިން މެޗުގައި ކާމިޔާބުކުރި އަށްވަނަ ލަނޑަކީ ލިޗްޓެންސްޓައިންގެ ކުޅުންތެރިޔެއް އަތުން ބައިކޮޅަށް ވަން ގޯލެކެވެ.  

އިޓަލީއިން އަމިއްލަ ގައުމުގައި އިޒްރާއިލް ބަލިކޮށްފައިވަނީ 1-0 ގެ ނަތީޖާ އަކުންނެވެ. އިޓަލީއިން މެޗުގައި ގިނަ ހަމަލާތަކެއް އުފެއްދި ނަމަވެސް އިޒްރާއިލް އިން ވަނީ ކައުންޓާ އެޓޭކުގައި އިޓަލީގެ ގޯލަށް ނުރައްކާ ކޮށްފައެވެ. މެޗުގެ ހަމައެކަނި ލަނޑު މެޗުގެ 53 ވަނަ މިނުޓުގައި އިޓަލީއަށް ކާމިޔާބު ކޮށްދިނީ އެ ޓީމުގެ ފޯވާޑް ސިރޯ އިމޯބިލޭއެވެ.

މި މޮޅާއެކު އިޓަލީއޮތީ ކުޅުނު ހަތް މެޗުން ލިބުނު 16 ޕޮއިންޓާއެކު ގްރޫޕް ޖީގެ ދެވަނައިގައެވެ. މި ގްރޫޕްގެ އެއްވަނައިގައި 19 ޕޮއިންޓާއެކު އޮތީ ސްޕެއިންއެވެ.

ޔޫރަޕުގެ ވޯލްޑްކަޕް ކޮލިފައިންގެ ގްރޫޕް ޑީގައި ވޭލްސްއާ މޮލްޑޯވާ ބައްދަލުކުރި މެޗު ވޭލްސްއިން ކާމިޔާބު ކޮށްފައިވަނީ 2-0 ގެ ނަތީޖާއަކުންނެވެ. އެ ޓީމަށް މި މެޗުގައި ލަނޑު ޖަހައިދީފައިވަނީ ހާލްރޮބްސަން ކާނޫގެ އިތުރުން އާސެނަލްގެ އާރޮން ރެމްސީއެވެ. މި ގްރޫޕުގައި ސާބިއާއިން ވަނީ ގައުމުން ބޭރުގައި 1-0 އަކުން އަޔަލޭންޑް ބަލިކޮށްފައެވެ. އަދި އޮސްޓްރިއާއާ ޖޯޖިއާ ބައްދަލުކުރި މެޗު ނިމުނީ 1-1 އަކުން އެއްވަރު ވެގެންނެވެ.

މި މެޗުން މޮޅުވި ނަމަވެސް ވޭލްސްއޮތީ 11 ޕޮއިންޓާއެކު ގްރޫޕް ޑީގެ ތިންވަނައިގައެވެ. މި ގްރޫޕުގެ އެއްވަނައިގައި 15 ޕޮއިންޓާއެކު ސާބިއާ އޮތްއިރު ދެވަނައިގައި އަޔަލޭންޑް އޮތީ 13 ޕޮއިންޓާއެކުއެވެ. ޔޫރަޕުގެ ވޯލްޑްކަޕް ކޮލިފައިންގައި ކޮންމެ ޓީމަކަށްވެސް ބާކީ އޮތީ އެންމެ ދެ މެޗެވެ.