ޔުއެފާ ޗެމްޕިއަންސް ލީގުގައި ބޮޑު ތަފާތަކުން ބާސެލޯނާ ބަލިކުރުމަށް ފަހު، ޕެރިސް ސެއިންޓް ޖާމަން (ޕީއެސްޖީ) ކުއާޓާ ފައިނަލްގެ އުންމީދު އާކޮށްފި އެވެ.

އަންގާރަ ދުވަހުގެ ރޭ ކުޅުނު މެޗު ބާސާއާ ވާދަކޮށް ޕީއެސްޖީން މެޗު ކާމިޔާބުކުރީ 0-4 ގެ ނަތީޖާއަކުންނެވެ.

ޕީއެސްޖީ ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ ވެސް ޕީއެސްޖީންނެވެ. އެގޮތުން އެޓީމުން ވަނީ ބާސާގެ ހާފަށް ބާރުބޮޑުކޮށް ލަނޑު ޖެހުމަށް ފުރުސަތުތަކެއް ތަނަވަސްކޮށްފައެވެ.

ޕީއެސްޖީން މެޗުގެ ލީޑު ނެގީ 18 ވަނަ މިނެޓުގައި އެންހަލް ޑިމަރިއާ ކާމިޔާބުކުރި ލަނޑަކުންނެވެ. މި ލަނޑު އޭނާ ކާމިޔާބުކުރީ ބާސާގެ ޕެނަލްޓީ އޭރިއާ ކައިރިން ޕީއެސްޖީ އަށް ލިބުނު ހިލޭ ޖެހުމަކުންނެވެ.

މި ލަނޑަށް ފަހު ވެސް ޕީއެސްޖީން ދިޔައީ ބާސާގެ ގޯލަށް ނުރައްކާ ކުރަމުންނެވެ. އެގޮތުން 40 ވަނަ މިނެޓުގައި އެޓީމުން ވަނީ ލީޑު ފުޅާކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ މާކޯ ވެރާޓީގެ އެހީތެރިކަމާއެކު ޖޫލިއަން ޑްރެސްލާ އެވެ.

މި ލަނޑުތަކާއެކު ފުރަތަމަ ހާފް ނިމުނީ 0-2 ގެ ނަތީޖާއިން ބާސާގެ މައްޗަށް ޕީއެސްޖީ ކުރިހޯދައިގެންނެވެ.

ދެވަނަ ހާފް ފެށިގެން ވެސް ރަނގަޅަށް ކުޅެމުންދިޔައީ ޕީއެސްޖީއެވެ. އެގޮތުން އެޓީމުން ވަނީ ދެވަނަ ހާފް ފެށިގެން 10 މިނެޓު ތެރޭގައި ލީޑު އިތުރަށް ފުޅާކޮށްފައެވެ. މި ލަނޑުވެސް އެޓީމަށް ކާމިޔާބުކޮށްދިނީ ޑިމަރިއާއެވެ.

ބާސާގެ ގޯލަށް ފުލުފުލުގައި ނުރައްކާ ކުރަމުންދިޔަ ޕީއެސްޖީގެ ހަތަރުވަނަ ލަނޑު 71 ވަނަ މިނެޓުގައި އެޓީމަށް ކާމިޔާބުކޮށްދިނީ އެޑިންސަން ކަވާނީ އެވެ. މި ލަނޑަށްފަހުވެސް ޕީއެސްޖީ އަށް ވަނީ ލަނޑު ޖެހުމަށް ފުރުސަތުތަކެއް ލިބި ބޭކާރުވެފައެވެ.

މި ދެޓީމު ބައްދަލުކުރި ފުރަތަމަ ލެގު ބޮޑު ތަފާތަކުން ޕީއެސްޖީ ކާމިޔާބުކުރިއިރު، ދެވަނަ ލެގުގެ ކުޅުން އޮންނާނީ އަންނަ މަހުގެ 8 ވަނަ ދުވަހު ބާސާ ދަނޑުގައެވެ. ކުއާޓާގެ ޖާގަ ކަށަވަރުކުރުމަށް ބާސާ އިން އެ މެޗު ފަސް ލަނޑުގެ ތަފާތުން ކާމިޔާބުކުރަން ޖެހޭނެއެވެ.