ވިކްޓްރީ ބަލިކޮށް ނިއު ރޭޑިއަންޓް އެއް ވަނަ އަށް، ސެންޓޭ އަށް ހެޓްރިކެއް

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ވިކްޓަރީ ސްޕޯޓްސްް ކުލަބާ ދެކޮޅަށް ކުޅުނު މެޗުން މޮޅުވެ، ނިއު ރޭޑިއަންޓް ސްޕޯޓްސް ކުލަބުން ލީގު ތާވަލްގެ އެއް ވަނަ މަގާމަށް ޖެހިލައިފި އެވެ.

ގަލޮޅު ރަސްމީ ދަނޑުގައި އަންގާރަ ދުވަހުގެ ހަވީރު ކުޅުނު މެޗު ނިއު އިން ކާމިޔާބު ކުރީ 4-0 އިންނެވެ. މެޗުގެ ފުރަތަމަ ހާފުގައި ނިއު އިން ދެ ލަނޑު ޖެހިއިރު، އަނެއް ދެ ލަނޑު އެ ޓީމުން ޖެހީ ދެ ވަނަ ހާފުގަ އެވެ.

މެޗު ފަށައިގެން އަށް ވަނަ މިނެޓުގައި ނިއު އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު ޖަހައި ނިއު އަށް ކުރި ހޯދައިދިނީ އަލީ ފާޞިރު (ސެންޓޭ) އެވެ. އޭގެ ފަސް މިނެޓު ފަހުން ސެންޓޭ ވަނީ ދެ ވަނަ ލަނޑެއް ވެސް ޖަހައި ނިއުގެ ލީޑު ފުޅާ ކޮށްފަ އެވެ.

ދެ ވަނަ ހާފު ފަށައިގެން ވެސް ނިއު އިން ދިޔައީ ރަނގަޅަށް ކުޅެމުންނެވެ. އެގޮތުން މެޗުގެ 60 ވަނަ މިނެޓުގައި ސެންޓޭ ވަނީ ނިއުގެ ތިން ވަނަ ލަނޑު ޖަހައި މެޗުގައި އޭނާގެ ހެޓްރިކް ހަމަ ކޮށްފަ އެވެ. މެޗުގައި ނިއުގެ ހަތަރު ވަނަ ލަނޑު އަޙުމަދު ހުސާމް ޖެހީ 79 ވަނަ މިނެޓުގަ އެވެ.

ނިއު ރޭޑިއަންޓާއި ވިކްޓަރީ ބައްދަލު ކުރާ މެޗު އަބަދު ވެސް ޚާސްވެފައި އޮންނަނީ "ރަސްވާދަ"ގެ ނަމުންނެވެ. ފުޓުބޯޅައިގެ ފޯރި ގެއްލިފައި އޮންނަތާ އެތައް ދުވަހެއް ވެފައިވާއިރު، މި ފަހަރުގެ ރަސްވާދަ މެޗާ ދިމާކޮށް ފޯރި ގެނައުމަށް ނިއު އާއި ވިކްޓަރީ އިން ވަނީ ގިނަ ޙަރަކާތްތަކެއް ވެސް ކުރިއަށް ގެންގޮސްފަ އެވެ.

މީގެ އިތުރުން ނިއު ރޭޑިއަންްޓާއި ވިކްޓަރީ ބައްދަލު ކުރި މެޗު ބެލުމަަށް ކުރީގެ މަޝްހޫރު ބައެއް ކުޅުންތެރިން ވެސް ވަނީ ދަނޑަށް ގޮސްފަ އެވެ. މީގެ އިތުރުން ނިއު ރޭޑިއަންޓްގެ ބާނީ އަޙުމަދު ވަޙީދު (ކުއީން ވަޙީދު) ވެސް ވަނީ އެ މެޗު ބައްލަވާލެވުމަށް ދަނޑަށް ގޮސްފަ އެވެ.

ވިކްޓަރީ އަތުން ހޯދި މޮޅާއެކު، މިހާތަނަށް ލީގުގައި ނިއު ރޭޑިއަންޓް އިން ކުޅުނު ހަތަރު މެޗުން ވެސް އެ ޓީމު ވަނީ މޮޅުވެފަ އެވެ. މިވަގުތު ލީގު ތާވަލްގެ އެއް ވަނައިގައި ނިއު ރޭޑިއަންޓް އޮތީ 12 ޕޮއިންޓާ އެކު އެވެ.