ދިރާގު ދިވެހި ޕްރިމިއާ ލީގުގައި ނިއު ރޭޑިއަންޓް ސްޕޯޓްސް ކުލަބާއި، ވިކްޓްރީ ސްޕޯޓްސް ކުލަބު ބައްދަލު ކުރާ މެޗާ ދިމާކޮށް، އެ ކުލަބު ގުޅިގެން ޚާއްސަ ޙަރަކާތެއް ބާއްވަން ނިންމައިފި އެވެ.

ނިއު އާއި ވިކްޓްރީ ބައްދަލު ކުރާ މެޗު ޚާއްސަ ވެފައި އޮންނަނީ "ރަސްވާދަ"ގެ ނަމުންނެވެ. މިއީ ޒަމާނުއްސުރެ މި ދެ ކުލަބުގެ ދެ މެދުގައި އޮންނަ ފޯރި އާއި ޖޯޝު އަދި ދެ ކުލަބަކީ ފުޓުބޯޅައިގެ ގަދަ ބާރަކަށް ވާތީ އޮންނަ ފޯރި އެކެވެ.

"ރާއްޖެ އެމްވީ"އާ ވާހަކަ ދައްކަވަމުން ނިއު ރޭޑިއަންޓްގެ ޗެއާމަން އަޙުމަދު މުބީން ވިދާޅުވީ، އާދީއްތަ ދުވަހުގެ ހަވީރު އާޓިފިޝަލް ބީޗުގައި އޮންނަ އެ ޙަކަރާތުގައި ގިނަ ކަންތައްތަކެއް ކުރިއަށް ދާނެ ކަމަށެވެ. އެގޮތުން ދެ ޓީމުގެ ޖާޒީ ވިއްކުމާއި، ދެ ޓީމުގެ ކުރީގެ ކުޅުންތެރިން ވެސް އެ ޙަރަކާތުގައި ބައިވެރިވާނެ ކަމަށް މުބީން ވިދާޅުވި އެވެ.

އެގޮތުން ކުރީގެ ކުޅުންތެރިންގެ ޝުއޫރު ފާޅު ކުރުމާއި، މެޗުގެ ފޯރި ގެނައުމަށް ގިނަ ޙަރަކާތްތަކެއް ރޭވިފައިވާ ކަމަށް ވެސް މުބީން ވަނީ ވިދާޅުވެފަ އެވެ. މި ޙަރަކާތުގައި ކުރީގެ ކުޅުންތެރިން ކަމަށްވާ އަޙުމަދު ޙަލީމް (ދޮންބިލެތް)، އިބްރާހީމް ޙަމީދު (ލެއްބެ)، ޕެރިސް ޝާކިރު، މައުރޫފް އަޙުމަދު (މާއްޓޭ) ފަދަ ކުރީގެ މަޝްހޫރު ކުޅުންތެރިން އެ ޙަރަކާތުގައި ބައިވެރިވާނެ އެވެ.

ނިއު އާއި ވިކްޓްރީ ބައްދަލު ކުރާ މެޗު އޮންނާނީ އަންގާރަ ދުވަހު އެވެ. މުބީން ވިދާޅުވީ އެ މެޗުގައި ނިއު ރޭޑިއަންޓް އިން ބޭނުން ކުރާނީ ހުދާއި ފެހި ކުލައިގެ ޖާޒީ ކަމަށެވެ. އެއީ ނިއު ރޭޑިއަންޓްގެ ވަރަށް ތާރީޚީ ޖާޒީއެއް ކަމަށް ވެސް މުބީން ވަނީ ފާހަގަ ކުރައްވައިފަ އެވެ.

މީގެ އިތުރުން ނިއު އާއި ވިކްޓްރީ ބައްދަލު ކުރާ މެޗު ބަލާލުމުގެ ދައުވަތު ކުރީގެ ކުޅުންތެރިންނަށް ދީފައިވާނެ ކަމަށް މުބީން ވަނީ ވިދާޅުވެފަ އެވެ. ޚާއްސަކޮށް ކުރީގެ ކުޅުންތެރިން ކޮންމެ ވެސް ވަރަކަށް ދޫކޮށްލެވިފައިވާ ކަމަށާއި، ބޭނުން ވަނީ އެ ކުޅުންތެރިން ވެސް ޝާމިލު ކޮށްގެން ފުޓުބޯޅައިގެ ފޯރި ގެންނަން ކަމަށް މުބީން ވިދާޅުވެފައިވެ އެވެ.

ނިއު އާއި ވިކްޓްރީ ބައްދަލު ކުރާ މެޗު އޮންނާނީ އަންގާރަ ދުވަހުގެ ހަވީރު އެވެ.