ބޯހިޔާވަހިކަމަށް މި ސަރުކާރުން ގާބުރިއެއް ވެސް ބާއްވާފައި ނުވޭ، މި އަހަރުގެ ބަޖެޓް ހުސްވެއްޖެ: މައުރޫފް
ރައީސް މުއިއްޒު ވިދާޅުވެފައިވަނީ ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައި ދީފައި އޮތްތަނަކުން އެމީހަކު ބުނި އުސްމިނެއްގައި އިމާރާތްކޮށްދޭނެކަމަށް
ކެންދޫ ދާއިރާގެ މެމްބަރު މައުރޫފް ޒާކިރު
މިއަހަރުގެ ބަޖެޓަކީ ބޯހިޔާވަހިކަމުގެ ބަޖެޓޭ ވިދާޅުވި އިރު މިއަހަރު ނިމިގެންދާއިރު ބޯހިޔާވަހިކަމަށް ގާބުރިއެއްވެސް ބާއްވާފައި ނުވާ ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
އެމްޑީޕީގެ ބޯހިޔާވަހިކަމުގެ ކޮމިޓީއިން ބޭއްވި ނޫސްވެރިންގެ ބައްދަލުވުމުގައި މައުރޫފް ވިދާޅުވީ ރައީސް މުއިއްޒު ވިދާޅުވެފައިވަނީ ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައި ދީފައި އޮތްތަނަކުން އެމީހަކު ބުނި އުސްމިނެއްގައި އިމާރާތް ކޮށްދޭނެ ކަމަށެވެ. އަދި ވެރިކަމަށް ވަޑައިގެން ވިދާޅުވެފައި ވަނީ ވައުދުވެވަޑައިގެންނެވި ގޮތަށް ހުރިހާ ފުލެޓަކާއި ގޯއްޗެއް ދެއްވާނެ ކަމަށާއި، ތަކުރާރުކޮށް އެވާހަކަ ވިދާޅުވިކަމަށެވެ.
މައުރޫފް ވިދާޅުވީ ރިޔާސީ ބަޔާން އިއްވަމުން ރައީސް މުއިއްޒު ވިދާޅުވެފައިވަނީ 2025 ވަނަ އަހަރުގެ ބަޖެޓަކީ މިއީ ބޯހިޔާވަހިވަކަމުގެ ބަޖެޓް ކަމަށާއި، ނަމަވެސް ބަޖެޓް ހުސްވެ އަހަރު ނިމި އަންނަ އަހަރުގެ ބަޖެޓް ހުށަޅަން ތައްޔާރުވެފައި ވާއިރު ރާއްޖޭގައި ބޯހިޔާވަހިކަމަށްޓަކައި ގާބުރިއެއް ވެސް ބާއްވާފައި ނުވާ ކަމަށެވެ.
ވެރިކަމަށް ވަޑައިގަންނަވަމުން ވިދާޅުވީ މި 5 އަހަރު ތެރޭގައި ނުވަތަ ތިމަންނާގެ ވެރިކަމުގެ ތެރޭގައި 65000 ފުލެޓް އަޅައިދޭނެ ކަމަށް ނުވަތަ ބޯހިޔާވަހިކަން ފޯރުކޯށްދޭނެކަމަށް. އެހެންނަމަވެސް އެއް ކަމެއްވެސް ނުކުރޭ. މި ދެންނެވި ގޮތަށް ގޯތި ދިނުމަށްޓަކައި އެމްޑީޕީ ސަރުކާރުން އިއުލާންކޮށް ބިން ހިއްކުމުގެ ވަރަށް ބޮޑު ބައެއް ނިންމާފައި އޮތް ގުޅީ ފަޅާއި ގިރާވަރު ފަޅުގެ އެންމެ ތަންކޮޅެއްވެސް މި ވެރިން ވެރިކަމަށް އައިސް ހިއްކުން ކުރިއަކަށް ނުގެންދޭ.ކެންދޫ ދާއިރާގެ މެންބަރު މައުރޫފް ޒާކިރު
މައުރޫފް ވިދާޅުވީ ހުޅުމާލޭ ފޭސް 3 އިން ގޯތި ހޯދުމަށްޓަކައި ފޯމް ފުރާ ފޯމުލައި، އަދި އެމްޑީޕީ ސަރުކާރުން އިއުލާންކޮށްފައި ހުރި ގޯތިތައް އެ ލިބުނު ތަކަނަކުން ދީ ގެދޮރު އަޅައިދޭނެކަމަށް ރައީސް މުއިއްޒު ވިދާޅުވީތި ރައްޔިތުން އެމަނިކުފާނަށް ވޯޓު ދިން ކަމަށެވެ. ނަމަވެސް ހުޅުމާލެ ފޭސް 3 އޮތީ އަދިވެސް އޮތްގޮތަށް ކަމަށާއި، އެމްޑީޕީ ސަރުކާރުން ބަޖެޓް ހަމަޖައްސައި ހިއްކުމުގެ މަސައްކަތް ފެށި ތަނެއް ނަމަވެސް މިހާރު ހިއްކުމުގެ މަސައްކަތެއް އެތަނުގައި ކުރިއަށް ނުދާކަމަށް މައުރޫފް ވިދާޅުވިއެވެ.
އެތަން ހިއްކަން ތިބި ފަރާތްތަކުގެ އަތުން އެތަން އަތުލައި، އެމީހުން އެތަން ހިއްކުމަށްޓަކައި ކަލެކްޓްކޮށްފައި ހުރި ވެލިކޮޅު ގެންގޮސް ފުށިދިއްގަރު ފަޅަށް އަޅާ ހިއްކަން ފެށީ ތިމަންނާ 8 މަސް ދުވަހުގެ ތެރޭގައި ފުށިދިއްގަރު ހިއްކާ ނިންމާނަމޭ ވިދާޅުވެ. އެހެންވީމާ ގޯއްޗާއި ބޯހިޔާވަހިކަމާއި ފުލެޓާއި، މިކަމުގައި މި ސަރުކާރަށް ދިވެހި ރައްޔިތުންގެ އިތުބާރު ވަނީ ގެއްލިފައި. އެހެންވެ އެމްޑީޕީ އިން އިހުތިޖާޖު ކުރަނީ، އެހެންވެގެން އޮކްޓޯބަރު 3 ގައި އަދި ނޮވެމްބަރު 17 ގައި ވެސް މުޒާހަރާ ކުރަން ނިންމީ.ކެންދޫ ދާއިރާގެ މެންބަރު މައުރޫފް ޒާކިރު
އެމްޑީޕީ ސަރުކާރުން ގޯތި ދީފައި އޮތީ އެތަންތަން ހިއްކުމުގެ މަސައްކަތް ފަށާ އަދި ހިއްކޭނެ ކަމުގެ ޔަގީންކަން އޮވެގެން އެ މަސައްކަތް ކޮންޓްރެކްޓަރުންނާއި ހަވާލުކޮށްގެންނެވެ. އަދި ހިއްކުމަށް ބޭނުންވާ ފައިސާ ހަމަޖައްސާފައި ހުރިނަމަވެސް މި ސަރުކާރުން އެ ފައިސާ ބޭނުންކުރީ އެހެން ކަންތައްތަކަށެވެ.
