މިއަހަރުގެ ބަޖެޓަކީ ބޯހިޔާވަހިކަމުގެ ބަޖެޓޭ ވިދާޅުވި އިރު މިއަހަރު ނިމިގެންދާއިރު ބޯހިޔާވަހިކަމަށް ގާބުރިއެއްވެސް ބާއްވާފައި ނުވާ ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.

އެމްޑީޕީގެ ބޯހިޔާވަހިކަމުގެ ކޮމިޓީއިން ބޭއްވި ނޫސްވެރިންގެ ބައްދަލުވުމުގައި މައުރޫފް ވިދާޅުވީ ރައީސް މުއިއްޒު ވިދާޅުވެފައިވަނީ ކުރީގެ ރައީސް އިބްރާހިމް މުހައްމަދު ޞާލިހުގެ ވެރިކަމުގައި ދީފައި އޮތްތަނަކުން އެމީހަކު ބުނި އުސްމިނެއްގައި އިމާރާތް ކޮށްދޭނެ ކަމަށެވެ. އަދި ވެރިކަމަށް ވަޑައިގެން ވިދާޅުވެފައި ވަނީ ވައުދުވެވަޑައިގެންނެވި ގޮތަށް ހުރިހާ ފުލެޓަކާއި ގޯއްޗެއް ދެއްވާނެ ކަމަށާއި، ތަކުރާރުކޮށް އެވާހަކަ ވިދާޅުވިކަމަށެވެ.

މައުރޫފް ވިދާޅުވީ ރިޔާސީ ބަޔާން އިއްވަމުން ރައީސް މުއިއްޒު ވިދާޅުވެފައިވަނީ 2025 ވަނަ އަހަރުގެ ބަޖެޓަކީ މިއީ ބޯހިޔާވަހިވަކަމުގެ ބަޖެޓް ކަމަށާއި، ނަމަވެސް ބަޖެޓް ހުސްވެ އަހަރު ނިމި އަންނަ އަހަރުގެ ބަޖެޓް ހުށަޅަން ތައްޔާރުވެފައި ވާއިރު ރާއްޖޭގައި ބޯހިޔާވަހިކަމަށްޓަކައި ގާބުރިއެއް ވެސް ބާއްވާފައި ނުވާ ކަމަށެވެ.

މައުރޫފް ވިދާޅުވީ ހުޅުމާލޭ ފޭސް 3 އިން ގޯތި ހޯދުމަށްޓަކައި ފޯމް ފުރާ ފޯމުލައި، އަދި އެމްޑީޕީ ސަރުކާރުން އިއުލާންކޮށްފައި ހުރި ގޯތިތައް އެ ލިބުނު ތަކަނަކުން ދީ ގެދޮރު އަޅައިދޭނެކަމަށް ރައީސް މުއިއްޒު ވިދާޅުވީތި ރައްޔިތުން އެމަނިކުފާނަށް ވޯޓު ދިން ކަމަށެވެ. ނަމަވެސް ހުޅުމާލެ ފޭސް 3 އޮތީ އަދިވެސް އޮތްގޮތަށް ކަމަށާއި، އެމްޑީޕީ ސަރުކާރުން ބަޖެޓް ހަމަޖައްސައި ހިއްކުމުގެ މަސައްކަތް ފެށި ތަނެއް ނަމަވެސް މިހާރު ހިއްކުމުގެ މަސައްކަތެއް އެތަނުގައި ކުރިއަށް ނުދާކަމަށް މައުރޫފް ވިދާޅުވިއެވެ.

އެމްޑީޕީ ސަރުކާރުން ގޯތި ދީފައި އޮތީ އެތަންތަން ހިއްކުމުގެ މަސައްކަތް ފަށާ އަދި ހިއްކޭނެ ކަމުގެ ޔަގީންކަން އޮވެގެން އެ މަސައްކަތް ކޮންޓްރެކްޓަރުންނާއި ހަވާލުކޮށްގެންނެވެ. އަދި ހިއްކުމަށް ބޭނުންވާ ފައިސާ ހަމަޖައްސާފައި ހުރިނަމަވެސް މި ސަރުކާރުން އެ ފައިސާ ބޭނުންކުރީ އެހެން ކަންތައްތަކަށެވެ.