މަސްވެރިން މުޒާހަރާއަށް ނުކުތީ މަސްވެރިންވި ވައުދުތަކެއް ނުފުއްދައިގެން ނޫން، މުޒާހަރާކުރަނީ ރައީސް މުއިއްޒުގެ ވައުދުތައް ނުފުއްދައިގެން: ޒިޔާދު

ކޮންމެ އަހަރެއްގެ މަސްވެރިންގެ ދުވަސް ކަމުގައިވާ ޑިސެމްބަރު 10 ގައި ބޮޑު ކަންނެލި މަސްވެރިން މުޒާހަރާއަށް ނުކުންނަނީ އެ މަސްވެރިންވި ވައުދުތަކެއް ނުފުއްދައިގެން ނޫން ކަމަށާއި، މުޒާހަރާ ކުރަންޖެހެނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު މަސްވެރިންނަށް ވެވަޑައިގެންނެވި ވައުދުތައް ނުފުއްދައިގެން ކަމަށް ވައިކަރަދޫ ދާއިރާގެ މެންބަރު ހުސައިން ޒިޔާދު ވިދާޅުވެއްޖެއެވެ.

އެމްޑީޕީ ހަރުގޭގައި ބުދަ ދުވަހުގެ ރޭ ބޭއްވި ޖަލްސާގައި ވާހަކަ ދައްކަވަމުން މެންބަރު ޒިޔާދު ވިދާޅުވީ، ކޮންމެ އަހަރެއްގެ ޑިސެމްބަރު 10 ގައި ބޮޑު ކަންނެލި މަސްވެރިން މުޒާހަރާ ކުރާ ކަމަށާއި، އެއީ އެއް ގޮވެއްޔެއް ކަމަށެވެ. މިދިޔަ އަހަރު ވެސް އެ ގޮވެއްޔެއް ގޮވި ކަމަށާއި، މި އަހަރު ވެސް އެ ގޮވެއްޔެއް ގޮވަމުން އަންނަ ކަމަށް އޭނާ ވިދާޅުވިއެވެ.

އެހެންނަމަވެސް، އެ ގޮވެއްޔަކީ އެއްވެސް ވަރަކަށް ބޮޑު ކަންނެލި މަސްވެރިންގެ ގޮވެއްޔެއް ނޫން ކަމަށާއި، އަދި މަސްވެރިން ވެގެން އުޅޭ ވައުދެއް ވެސް ނޫން ކަމަށް މެންބަރު ޒިޔާދު ފާހަގަކުރެއްވިއެވެ. އެ ވައުދަކީ ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެރިކަމަށް ގެނެސްފި ނަމަ، މަސްވެރިންނަށް ކޮށްދޭނެ ކަމެއް ކަމަށް ވިދާޅުވެ، ރައީސުލްޖުމްހޫރިއްޔާ އަކަށް މިއަދު ހުންނެވި ބޭފުޅާ ވެވަޑައިގެންނެވި ވައުދެއް ކަމަށް އޭނާ ވިދާޅުވިއެވެ.

އަޅުގަނޑު ވެސް ގަބޫލުކުރަން، ކޮންމެ ވަޢުދެއް ވެރިކަމަށް އަންނަތާ 6 މަސް ދުވަސް ތެރޭގައި، 1 މަސް ދުވަސް ތެރޭގައި ނުފުއްދިދާނެ. އަދި އަހަރު، ދެ އަހަރު ވެސް ނުވެދާނެ. އެހެންނަމަވެސް، މީގައި މި ދައްކާ ހުއްޖަތައް ވަޢުދުނުފުއްދޭ ކަމަށް މި ބުނާ ސަބަބާ ދިމާ ނުވާތީ މަސްވެރިން އިހުތިޖާޖަށް އެ ނިކުންނަނީ. ތިން ކަމަކަށް އެދެނީ. ކަންނެލި މަސް ގަންނާނެ އަގަކީ 80 ރުފިޔާއާއި 100 ރުފިޔާ ދެމެދުކަމުގައި ހަމަޖައްސައިދޭން. މިފްކޯ އަށް މަސްގަނެވޭނެ އިންތިޒާމު ހަމަޖައްސައިދޭން. ބޭސް ރޭޓުން ތެޔޮ ލިބޭނެ ގޮތް ހަމަޖައްސައިދޭން.

ވައިކަރަދޫ ދާއިރާގެ މެންބަރު ހުސައިން ޒިޔާދު

ޒިޔާދު ވިދާޅުވީ ބޭސް ރޭޓު މިހާރު ވަނީ ބޭހަކަށް ވެފައި ކަމަށެވެ. މުޒާހަރާ ފަށާ ކޮންމެ ދުވަހަކު އެއް މަސް، ފަހަތަށް އަނެއްކާ ބޭސް ރޭޓުލާފައި ވައުދުވެވޭ ކަމަށާއި، މިއަންނަ މަހު ބޭސް ރޭޓުން ލިބޭނެ ކަމަށް ބުނެވޭ ކަމަށް އޭނާ ފާހަގަކުރެއްވި އެވެ. އެހެންވީމާ، މަސްވެރިންގެ ވެސް ނަސީބު ދެރަކަމުން ކޮންމެ އަހަރެއްގައި މި އިންނަނީ އެންމެ ޑިސެމްބަރު 10 އެއް ކަމަށާއި، އެހެންވެ މަސްވެރިންގެ މުޒާހަރާތައް މަދުވެގެންދާ ކަމަށް އޭނާ ވިދާޅުވި އެވެ.

މަސްވެރިންނަށް ވައުދު ނުފުއްދޭ ސަބަބެއް ކަމަށް ބުނަނީ، ރާއްޖޭގައި ކުރަންހުރި އެހެން އިޤްތިޞާދީ ކަންތައްތައް ގިނަވުން ކަމަށާއި، އަނެއް ސަބަބަކީ ދައުލަތުގެ ދަރަނި ކަމަށް ސަރުކާރުން ބުނަމުންދާ ކަމަށް މެންބަރު ޒިޔާދު ވިދާޅުވި އެވެ. ދައުލަތުގެ ދަރަނީގެ އަރަތް މިދިޔަ ބަޖެޓު ބަހުގައި ވެސް ކިޔައިދިން ކަމަށް އޭނާ ފާހަގަކުރެއްވި އެވެ.

ދައުލަތުގެ ބަޖެޓުގެ މިހާރު ދަރަނި އެ އޮތީ އަރަތަކަށް ވެފައި ކަމަށް މެންބަރު ޒިޔާދު ވިދާޅުވިއެވެ. މި އަހަރުގެ ބަޖެޓު ފޮތުގައި ވެސް އެ އޮތީ، އެމްޑީޕީގެ ވެރިކަން ނިމުނުއިރު 125 ބިލިއަން ރުފިޔާ ދަރަނީގެ ގޮތުގައި ކަމަށާއި، މި އަހަރު ނިމޭއިރު، ބަޖެޓު ފޮތުގައި އޮންނަނީ މި އަހަރު ދައުލަތުގެ ދަރަނި ހުންނާނީ 158 ބިލިއަންގައި ކަމަށް އޭނާ ވިދާޅުވި އެވެ.

ޒިޔާދު ވިދާޅުވީ ސަރުކާރުގެ ބޭކާރު ޚަރަދުތަކަށް ކުރަން، އަދި ޚަރަދަށް ބޭނުންވާ ފައިސާ ހޯދުމުގެ ގޮތުން މިހެން ހުރި ކަންކަން އުނިކުރެވިގެން ދާ ކަމަށެވެ. އަދި މިއީ ބިރުގަންނަން ޖެހޭ ކަމެއް ކަމަށް އޭނާ ފާހަގަކުރެއްވި އެވެ.