އޮކްޓޫބަރު ހަތެއްގެ އެއްވުމުގައި ބަައިވެރި ނުވުމަށް ދަރިވަރުންނަށް ސްޓާމާ ގޮވާލައްވައިފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ އަށް ދެ އަހަރު ފުރުން ފާހަގަ ކުމުގެ ގޮތުން އެއްވާ އެއްވުމުގައި ބައިވެރި ނުވުމަށް، އިނގިރޭސިވިލާތުގެ ދަރިވަރުންނަށް އެ ޤައުމުގެ ބޮޑު ވަޒީރު ކިއާ ސްޓާމާ ގޮވާލައްވައިފި އެވެ.

އިސްރާއީލް އިން ޣައްޒާގެ ހަނގުރާމަ ފަށާފައި ވަނީ 2022 ވަނަ އަހަރުގެ އޮކްޓޫބަރު މަހުގެ ހަތް ވަނަ ދުވަހު އެވެ. އެހެންކަމުން އެ ހަނގުރާމަ އަށް އަންގާރަ ދުވަހު ވަނީ ދެ އަހަރު ފުރިފަ އެވެ. އެ މުއްދަތުގެ ތެރޭގައި އިސްރާއީލް އިން ޣައްޒާގައި ގިނަ ހަމަލާތަކެއް ދީފައިވާއިރު، އެތައް ހާސް ބަޔަކު ވަނީ ޝަހީދު ކޮށްލައިފަ އެވެ.

އެކަމާ ގުޅިގެން އިނގިރޭސިވިލާތުގެ ބޮޑު ވަޒީރު ސްޓާމާ ވިދާޅުވެފައި ވަނީ، ފަލަސްޠީނަށް ތާއީދު ކުރާ ފަރާތްތަކުން ބާއްވާ އިހުތިޖާޖުގައި ބައިވެރި ނުވުމަށް ދަރިވަރުންނަށް ގޮވާލައްވާ ކަމަށެވެ. އޭނާ ވިދާޅުވެފައި ވަނީ، އެ ފަދަ އިހުތިޖާޖު ތަކުން ޔަހޫދީންނާ ދެކޮޅު ރޭވުންތެރި ޙަރަކާތްތައް އިތުރުވަމުން ދާކަން ފާހަަގަ ކުރެވިފައިވާ ކަމަށެވެ.

މެންޗެސްޓަރގެ ސިނަގޯގަކަށް ފާއިތުވި ހަފުތާގައި ދެވުނު ހަމަލާއާ ގުޅިގެން، އިނގިރޭސިވިލާތުގައި ދިރިއުޅޭ ޔަހޫދީ މުޖުތަމައު ރައްކާތެރި ކުރުމަށް ސަލާމަތީ ފިޔަވަޅުތައް ޚަރުދަނާ ކޮށްފަ އެވެ. އެ ހަމަލާގައި ދެ މީހަކު މަރުވެފައިވާއިރު، ސްޓާމާ ވަނީ އެކަން ކުށްވެރި ކުރައްވައި ވާހަކަ ދައްކަވައިފަ އެވެ.

ޣައްޒާ ހަނގުރާމަ އަށް ދެ އަހަރު ފުރުން ފާހަގަ ކުރުމަށް މެންޗެސްޓަރގެ އިތުރުން، ގްލާސްގޯ، އެޑިންބަރާ އަދި ބްރިސްޓޯލް ފަދަ ސިޓީ ތަކުގައި އަންގާރަ ދުވަހު ދަރިވަރުން އިސް ނަގައިގެން އިހުތިޖާޖު ކުރުމަށް ޙަރަކާތްތައް ބޭއްވުމަށް ވަނީ ރާވައިފަ އެވެ.

އެކަމާ ގުޅޭ ގޮތުން ސްޓާމާ ވިދާޅުވެފައި ވަނީ އޮކްޓޫބަރު މަހުގެ ހަތް ވަނަ ދުވަހު ހިނގި އަނިޔާވެރި އަމަލު ތަކުގެ ނުބައިކަން އެންމެނަށް ވެސް ފެންނަން އޮންނާނެ ކަމަށެވެ. އެހެން ނަމަވެސް، އަނެއްކާ މިއަދު އެ ހަމަލާ ތަކުގެ އަހަރީ ދުވަސް ފާހަގަ ކުރުމަށް ދަރިވަރުން އިހުތިޖާޖު ކުރަން ރާވަމުންދާ ކަމީ އިނގިރޭސިވިލާތުގެ އަސްލާ ޚިލާފު ކަމެއް ކަމަށް ސްޓާމާ ވަނީ ވިދާޅުވެފަ އެވެ.

ސްޓާމާގެ އިތުރުން، އިދިކޮޅު ކޮންޒަވޭޓިވް ޕާޓީގެ ލީޑަރު ކެމީ ބަޑެނޯޗް ވެސް ވަނީ މަގު މަތީގައި ކުރެޗޭ ނަފުރަތުގެ އިހުތިޖާޖު ތަކާމެދު ކަންބޮޑުވުން އޮތް ކަމަށް ވިދާޅުވެފަ އެވެ. އަދި ގްރޭޓަރ މެންޗެސްޓަރގެ މޭޔަރު އެންޑީ ބާންހަމް ވަނީ ސަރަހައްދުގެ ސަލާމަތާއި ރައްކާތެރިކަން ކަށަވަރު ކުރުމަށް، ފުލުހުންނަށް އިތުރު ފައިސަގެ އެހީތެރިކަން ފޯރުކޮށްދިނުމަށް ސަރުކާރަށް ގޮވާލައްވައިފަ އެވެ.

ބާންހަމް ވިދާޅުވީ ލަންޑަން އިން ބޭރުގައި އެންމެ ބޮޑު ޔަހޫދީ އާބާދީ އޮތް ސަރަހައްދަކީ މެންޗެސްޓަރ ކަމަށެވެ. ނަމަވެސް، އިތުރު ސަލާމަތީ ބޭނުން ތަކަށް ލަންޑަން އަށް ލިބޭ ފަދަ ޚާއްސަ ފަންޑެއް އޭނާގެ ސަރަހައްދަށް ނުލިބޭ ކަމުގައި ވެސް ބާންހަމް ވަނީ ވިދާޅުވެފަ އެވެ.