ފޯނުން ގުޅުއްވައި ޓްރަމްޕް އާއި ނަތަންޔާހޫ މަޝްވަރާ ކުރައްވައިފި

އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އާއި، އެމެރިކާގެ ރައީސް ޑޮނަލްޑް ޓްރަމްޕް ފޯނުން ގުޅުއްވައި މަޝްވަރާ ކުރުންތައް ކުރިއަށް ގެންގޮސްފި އެވެ.

ހޯމަ ދުވަހު ދެ ބޭފުޅުން ފޯނުން ގުޅުއްވައި މަޝްވަރާ ކޮށްފައި ވަނީ، އިސްރާއީލް އިން ސީރިއާގައި ހިންގަމުން އަންނަ އަސްކަރީ އޮޕަރޭޝަން ނިމުމަކަށް ގެނައުމަށް ޓްރަމްޕް ގޮވާލައްވާފައި ވަނިކޮށެވެ.

އިސްރާއީލްގެ ބޮޑު ވަޒީރު ނަތަންޔާހޫގެ އޮފީހުން ބުނެފައި ވަނީ، އެ ފޯނު ކޯލުގައި ދެ ބޭފުޅުން މަޝްވަރާ ކުރައްވާފައި ވަނީ ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތުގެ ހަތިޔާރުތައް ނައްތާލުމާއި، ޣައްޒާ އިން ސިފައިން ބޭލުމުގެ ކަންތައްތަކާ ގުޅޭ ގޮތުން ކަމަށެވެ. އަދި އިސްރާއީލް އިން ރަސްމީކޮށް ގުޅުން ޤާއިމު ކޮށްފައި ނުވާ ޤައުމުތަކާ އެކު، ގުޅުން ޤާއިމު ކުރުމުގެ މައްސަލަ އަށް ވެސް މަޝްވަރާ ކޮށްފައިވާ ކަމަށް ބުނެފައިވެ އެވެ.

މީގެ އިތުރުން، އަވަސް ތާރީޚެއް ގައި އެމެރިކާގެ ރިޔާސީ ގަނޑުވަރު ވައިޓް ހައުސް އަށް ވަޑައިގެންނެވުމުގެ ދައުވަތު، ޓްރަމްޕް ނަތަންޔާހޫ އަށް ދެއްވާފައިވާ ކަމަށް އެ އޮފީހުން ވަނީ ބުނެފަ އެވެ. ވައިޓް ހައުސް އަށް ވަޑައިގެން ޓްރަމްޕްއާ ބައްދަލު ކުރެއްވުމުގެ ދައުވަތު ދެއްވާފައިވާ ކަމަށް ބުނި ނަމަވެސް، އެކަމާ ގުޅޭ އިތުރު ތަފްސީލެއް އެ އޮފީހުން ހާމަ ކޮށްފައި ނުވެ އެވެ.

އެ ފޯނު ކޯލުގެ ކުރިން ޓްރަމްޕް ވަނީ، އިސްރާއީލް އިން ސީރިއާ އަށް އަމާޒުކޮށް ދެމުން އަންނަ ހަމަލާތައް ހުއްޓާލައި، ސީރިއާގެ ކަންކަމުގެ ތެރެއަށް އިސްރާއީލް ނުވަނުމަށް ގޮވާލައްވައިފަ އެވެ. އަދި ސީރިއާގެ އައު ސަރުކާރަށް އިސްރާއީލް އިން އެއްބާރުލުންދީ، އެ ޤައުމާ އެކު ގުޅުން ޤާއިމު ކުރުމަށް ވެސް ޓްރަމްޕް ގޮވާލައްވާފައިވެ އެވެ.

އެމެރިކާ އާއި އިސްރާއީލް އަކީ އަބަދު ވެސް ގާތް ގުޅުމެއް އޮންނަ ދެ ޤައުމަށް ވާއިރު، ޓްރަމްޕް އާއި ނަތަންޔާހޫ އަކީ ވަރަށް ގާތް ދެ ބޭފުޅުންނެވެ. އެމެރިކާގެ ރައީސް ކަމުގެ ދެ ވަނަ ދައުރުގެ ހުވާ މިއަހަރުގެ ޖަނަވަރީ މަހުގެ ތެރޭގައި ޓްރަމްޕް ކުރެއްވި ފަހުން، މިހާތަނަށް ވައިޓް ހައުސް އަށް އެންމެ ގިނައިން ވަޑައިގެންނެވި ބޭފުޅަކީ ވެސް ނަތަންޔާހޫ އެވެ.

ޓްރަމްޕް ގެންދަވަނީ އެކި އެކި ދުވަސް ތަކުގައި ނަތަންޔާހޫގެ ދިފާއުގައި ވެސް ވާހަކަ ދައްކަވަމުންނެވެ. ޚާއްސަކޮށް އިސްރާއީލްގައި ނަތަންޔާހޫގެ މައްޗަށް ކޮރަޕްޝަންގެ ދައުވާތައް އުފުލި، އެ މައްސަލައިގެ ޝަރީއަތް ވެސް ފަށާފައިވާއިރު، އެ މައްސަލަ ބޭރުކޮށްލުމަށް ވެސް ޓްރަމްޕް ގޮވާލައްވާފައިވެ އެވެ. އަދި ނަތަންޔާހޫ އަށް މައާފު ދެއްވުމަށް ވެސް، ޓްރަމްޕް ވަނީ އިސްރާއީލްގެ ރައީސް އިސްހާގް ހާޒޮޒް އަށް ގޮވާލައްވައިފަ އެވެ.