ފަހު ވަގުތު ގްރީން އަތުން އީގަލްސް ބަލިވެއްޖެ

ދިރާގު ދިވެހި ޕްރިމިއާ ލީގުގައި ކުލަބު އީގަލްސްއާ ދެކޮޅަށް ކުޅުނު މެޗުން، ފަހު ވަގުތު ކުލަބު ގްރީން ސްޓްރީޓްސް މޮޅުވެއްޖެ އެވެ.

ބުދަ ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ގްރީން އިން ކާމިޔާބު ކުރީ 3-2 އިންނެވެ. މެޗުގައި ގްރީން އިން ދެ ލަނޑު ޖަހައި ކުރި ހޯދާފައި ވަނިކޮށް، އީގަލްސް އިން ފަހަތުން އަރައި ނަތީޖާ ހަމަހަމަ ވެސް ކުރި އެވެ. ނަމަވެސް، ފަހު ވަގުތު ލަނޑު ޖަހައިގެން ގްރީން ވަނީ މެޗުން މޮޅުވެފަ އެވެ.

މެޗުގެ ފުރަތަމަ ހާފުގެ 11 ވަނަ މިނެޓުގަައި ގްރީން އަށް ލީޑު ނަގައިދިނީ އެ ޓީމުގެ ބިދޭސީ ކުޅުންތެރިޔާ އޮބައިދާ ޚާދިމް އަޙުމަދު އެވެ. އޭގެ ފަހުން މެޗުގެ 31 ވަނަ މިނެޓުގައި ގްރީން އަށް ލީޑު ފުޅާ ކޮށްދިނީ ރިޟްވާން ވަޙީދު އެވެ.

އޭގެ ތިން މިނެޓު ފަހުން އީގަލްސް އިން ވަނީ ލަނޑު ޖަހައި ފަރަގު ކުޑަ ކޮށްފަ އެވެ. އެ ލަނޑު އީގަލްސް އަށް ޖަހައިދިނީ ބިދޭސީ ކުޅުންތެރިޔާ ކަޓްސުޔޯޝީ ކިމިޝީމާ އެވެ. ދެ ވަނަ ހާފުގައި އީގަލްސް އިން ނަތީޖާ ހަމަހަމަ ކުރުމަށް ކުރި މަސައްކަތް ކާމިޔާބު ކުރެވުނީ މެޗުގެ ފުރިހަމަ ވަގުތު ހަމަވާން ހަ މިނެޓަށް ވެފައި ވަނިކޮށެވެ. އެއީ އަޙުމަދު ރިޒްވާން (ރިޒޭ) ޖެހި ލަނޑުންނެވެ.

ނަމަވެސް މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގައި ގްރީން އިން ވަނީ ތިން ވަނަ ލަނޑެއް ޖަހައި މެޗުން މޮޅުވެފަ އެވެ. އެ ލަނޑު ވެސް ގްރީން އަށް ޖަހައިދިނީ ބިދޭސީ ކުޅުންތެރިޔާ އޮބައިދާ އެވެ.

މިއީ ލީގުގައި ގްރީން އިން ހޯދި ފުރަތަމަ މޮޅެވެ. ގްރީންގެ ފުރަތަމަ މެޗުގައި ވެލެންސިއާ އަދި ދެ ވަނަ މެޗުގައި ވިކްޓްރީ ސްޕޯޓްސް ކުލަބު އަތުން ވެސް ވަނީ ބަލިވެފަ އެވެ. އީގަލްސް އަތުން ހޯދި މޮޅާއެކު، އެ ޓީމަށް ވަނީ އުންމީދެއް ލިބިފަ އެވެ. ލީގުގައި ގްރީން އަށް ދެން އޮންނާނީ ބުރު ސްޕޯޓްސް ކުލަބާ ދެކޮޅަށް ކުޅޭ މެޗެވެ.

ލީގުގައި އީގަލްސްގެ ފުރަތަމަ މެޗުގައި މާޒިޔާ ސްޕޯޓްސް އެންޑް ރެކްރިއޭޝަން އަތުން ބަލިވެފައިވާއިރު، ދެ ވަނަ މެޗުގައި ބުރު ސްޕޯޓްސް ކުލަބު އަތުން ވަނީ އެއްވަރުވެފަ އެވެ. ތިން ވަނަ މެޗުގައި ގްރީން އަތުން ބަލިވީއިރު، މި ސީޒަންގައި އީގަލްސް އަށް އަދި މޮޅެއް ހޯދިފައި ނުވެ އެވެ. ލީގުގައި އީގަލްސްގެ ހަތަރު ވަނަ މެޗުގައި ނިކުންނާނީ އޮޑި ސްޕޯޓްސް ކުލަބާ ދެކޮޅަށެވެ.