ވެލެންސިއާ ބަލިކޮށް، ނިއުގެ ފޯމު ކުރިއަށް

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ނިއު ރޭޑިއަންޓް ސްޕޯޓްސް ކުލަބުން ކުޅުނު ތިން ވަނަ މެޗުގައި ކުލަބު ވެލެންސިއާ ބަލިކޮށް، އެ ޓީމުގެ ފޯމު ދަމަހައްޓައިފި އެވެ.

ބުދަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ނިއު ރޭޑިއަންޓް އިން ކާމިޔާބު ކުރީ 2-0 އިންނެވެ. މެޗުގައި ނިއު ރޭޑިއަންޓް އިން އެ ޓީމުގެ ދެ ލަނޑު ވެސް ޖެހީ މެޗުގެ ދެ ވަނަ ހާފުގަ އެވެ.

މެޗުގެ ފުރަތަމަ ހާފުގައި ވެސް ނިއު ރޭޑިއަންޓް އަށް ވަނީ ލަނޑު ޖަހާނެ ފުރުސަތު ލިބިފަ އެވެ. އެގޮތުން ނިއު ރޭޑިއަންޓްގެ އަލީ ފާޞިރު (ސެންޓޭ) އަދި ޙަސަން ރާއިފު އަޙުމަދަށް ލިބުނު ފުރުސަތުގެ ބޭނުން ކުރެވޭ ގޮތެއް ނުވި އެވެ.

މެޗުގެ ދެ ވަނަ ހާފުގައި، ނިއު ރޭޑިއަންޓް އިން ވަނީ ލަނޑު ޖަހައި ލީޑު ނަގައިފަ އެވެ. އެގޮތުން މެޗުގެ 60 ވަނަ މިނެޓުގައި ނިއު ރޭޑިއަންޓް އަށް ލީޑު ނަގައިދިނީ ސެންޓޭ އެވެ. އޭގެ ފަހުން މެޗުގެ 83 ވަނަ މިނެޓުގައި ސެންޓޭ ވަނީ އިތުރު ލަނޑެއް ޖަހައި ނިއު ރޭޑިއަންޓްގެ ލީޑު ފުޅާ ކޮށްފަ އެވެ. އެއީ ވެލެންސިއާގެ ކުޅުންތެރިޔެއްގެ އަތުގައި ބޯޅަ ޖެހުމުން ނިއު ރޭޑިއަންޓް އަށް ލިބުނު ޕެނަލްޓީ ކާމިޔާބު ކޮށްގެން ސެންޓޭ ޖެހި ލަނޑެވެ.

މިއީ ލީގުގައި ނިއު ރޭޑިއަންޓްގެ ތިން ވަނަ މޮޅެވެ. ފުރަތަމަ މެޗުގައި ނިއު ރޭޑިއަންޓް އިން ޓީސީ ސްޕޯޓްސް ކުލަބުގެ މައްޗަށް ކުރި ހޯދިއިރު، ދެ ވަނަ މެޗުގައި ވަނީ ޔުނައިޓެޑު ވިކްޓްރީ (ޔޫވީ)ގެ މައްޗަށް ވެސް ކުރި ހޯދައިފަ އެވެ. ތިން މެޗުން ވެސް މޮޅުވެ ނިއު ރޭޑިއަންޓް އަށް ނުވަ ޕޮއިންޓު ލިބޭއިރު، އެ ޓީމު އޮތީ ދެ ވަނައިގަ އެވެ. އެއް ވަަައިގައި އޮތް އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އަށް ވެސް ލިބެނީ ތިން މެޗުން ނުވަ ޕޮއިންޓެވެ.

ލީގުގައި ނިއު ރޭޑިއަންޓް އަށް ދެން އޮންނާނީ ވިކްޓްރީ ސްޕޯޓްސް ކުލަބާ ދެކޮޅަށް ކުޅޭ މެޗެވެ. ހަތް އަހަރަށް ފަހު ނިއު ރޭޑިއަންޓް އިން ފުރަތަމަ ޑިވިޝަންގައި ވާދަ ކުރަމުން އަންނައިރު، އެ ޓީމު ފެންނަނީ ވަރަށް ވަރުގަދަ ކޮށެވެ. ލީގުގައި މިހާތަނަށް އައި ނިއު ރޭޑިއަންޓް ކޮޅަށް ލަނޑެއް ވަދެފައި ނުވާއިރު، އެ ޓީމުގައި ރާއްޖޭގެ މަޝްހޫރު ގިނަ ކުޅުންތެރިން އެބަ ތިއްބެވެ.