ޓްރަމްޕްގެ ޕްލޭނަށް އިސްލާމީ ޤައުމު ތަކުގެ ތާއީދު

ޣައްޒާ ހަނގުރާމަ ނިމުމަކަށް ގެނައުމަށް، އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި ޕްލޭން އަށް، ސައުދީ އަރަބިއްޔާ ހިމެނޭހެން، އިސްލާމީ ޤައުމު ތަކުން މަރުޙަބާ ކިޔައިފި އެވެ.

އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ އާއެކު ބޭއްވި ބައްދަލުވުމުގައި ޓްރަމްޕް ވަނީ، ހަނގުރާމަ ހުއްޓުމަށް ބޭނުންވާ ޕްލޭން ހުށަހަޅުއްވައިފަ އެވެ. އަދި ނަތަންޔާހޫ ވަނީ އެ ޕްލޭން އަށް ތާއީދުކޮށް، އެ ޕްލޭން ބަަލައި ގަންނަ ކަމަށް ބުނެފަ އެވެ.

ޓްރަމްޕްގެ ހުށަހެޅުމާ ގުޅިގެން ސައުދީ އަރަބިއްޔާ، ޖޯޑަން، ޔޫއޭއީ، އިންޑޮނޭޝިއާ، ޕާކިސްތާން، ތުރުކީ، ޤަތަރު އަދި މިޞްރުގެ ފޮރިން މިނިސްޓަރުން ވަނީ ގުޅިފައިވާ ބަޔާނެއް ނެރެފަ އެވެ. އެ ބަޔާނުގައި ޣައްޒާ ހަނގުރާމަ ނިންމުމަށް ޓްރަމްޕް ކުރައްވަމުން ގެންދަވާ މަސައްކަތްތަކަށް ޤައުމު ތަކުން ވަނީ މަރުޙަބާ ކިޔައިފަ އެވެ.

ސައުދީގެ ޕްރެންސް އެޖެންސީ (އެސްޕީއޭ) އިން ހާމަ ކޮށްފައިވާ ގޮތުގައި، މިނިސްޓަރުން ވަނީ ޣައްޒާގެ ހަނގުރާމަ ނިންމުމަށް ޓްރަމްޕް ދައްކަވަމުން އަންނަ ލީޑާޝިޕާއި، އިޚުލާސްތެރި މަސައްކަތަކަށް މަރުޙަބާ ކިޔުއްވައިފަ އެވެ. އަދި ސުލްހައިގެ މަގެއް ހޯއްދެވުމުގެ ޤާބިލުކަން ޓްރަމްޕް އަށް ލިބިވަޑައިގެންފައިވާ ކަމުގެ ޔަޤީންކަން އޮތް ކަމަށް ވެސް، އެ ބަޔާނުގައި ވަނީ ބުނެފަ އެވެ.

ޣައްޒާ ހަނގުރާމަ ނިމުމަކަށް ގެނައުމަކީ އެމެރިކާގެ ރިޔާސީ އިންތިޚާބުގައި ޓްރަމްޕް ވެވަޑައިގެންފައިވާ ވައުދެކެވެ. އެގޮތުން ޣައްޒާ ހަނގުރާމަ ނިމުމަކަށް ގެނެސް، ސުލްހަވެރިކަން ޤާއިމު ކުރުމަކީ ޓްރަމްޕް ވެވަޑައިގެންފައިވާ ވައުދެކެވެ. ނަމަވެސް، ޓްރަމްޕްގެ ރިޔާސީ ދައުރަށް އަށް މަސް ދުވަސް ވެގެން ދިޔައިރު ވެސް، އެކަމުގައި ޙައްލެއް ހޯދިފައި ނުވާތީ އޭނާ އަށް ފާޑު ކިޔުން އަމާޒުވެ އެވެ.

އިސްލާމީ އަދި އަރަބި ޤައުމު ތަކުން ނެރެފައިވާ ބަޔާނުގައި ވަނީ ސަރަހައްދުގައި ސުލްހަ ޤާއިމު ކުރުމުގައި އެމެރިކާއާ އެކު އޮންނަ ގުޅުމުގެ މުހިންމުކަން ވެސް ފާހަގަ ކުރައްވައިފަ އެވެ. ހަމަ އެހެންމެ އެއްބަސްވުން ތަންފީޒުކޮށް، ބިނާ ކުރުވަނިވޮ ގޮތެއްގައި މަސައްކަތް ކުރުމަށް ޤައުމު ތަކުން އޮތީ ތައްޔާރަށް ކަމަށް ވެސް ފާހަގަ ކޮށްފައިވެ އެވެ.