ޣައްޒާ ހަނގުރާމަ ހުއްޓާލުމަށް އެއްބަސްވުމަށްފަހު، ފާއިތުވި 44 ދުވަހުގެ ތެރޭގައި އިޒްރޭލުން މަދުވެގެން 497 ފަހަރު އެ އެއްބަސްވުމާ ޚިލާފުވެއްޖެ

ޢައްޒާގެ ސަރުކާރުގެ މީޑިއާ އޮފީހުން ބުނާ ގޮތުގައި، ޙަމާސް އާއި އިޒްރޭލް އާ ދެމެދު އޮކްޓޯބަރު މަހުގެ 10 ވަނަ ދުވަހު ޤާއިމުކުރި ހަނގުރާމަ ހުއްޓާލުމުގެ އެއްބަސްވުމަށްފަހު، ފާއިތުވި 44 ދުވަހުގެ ތެރޭގައި އިޒްރޭލުގެ އަސްކަރިއްޔާއިން މަދުވެގެން 497 ފަހަރު އެ އެއްބަސްވުމާ ޚިލާފުވެއްޖެ އެވެ. މި ޙަމަލާތަކުގައި އެތައް ސަތޭކަ ފަލަސްޠީނުގެ ރައްޔިތުން ޝަހީދުކޮށް، އެތައް ބަޔަކު ޒަޚަމްކޮށްލާފައިވެއެވެ.

ހޮނިހިރު ދުވަހު ނެރުނު ބަޔާނެއްގައިވާ ގޮތުން، މި ޙަމަލާތަކުގައި އާންމުންގެ 342 މީހުން ޝަހީދުވެ، 875 މީހުން ޒަޚަމްވެފައިވެއެވެ. އަދި ޝިކާރައަކަށްވި މީހުންގެ ތެރޭގައި ގިނައީ ކުޑަކުދިންނާއި، އަންހެނުންނާއި، ދުވަސްވީ މީހުންނެވެ.

މި ބަޔާނުގައި، މީހުން މެރުމުގެ ނުރައްކާތެރި ޙަމަލާތަކާއި ހުއްޓުމެއްނެތި ބިމަށް އަރައިގަތުމުގެ ޒަރީއާއިން، ސިސްޓަމެޓިކް ގޮތެއްގައި އެއްބަސްވުމާ ޚިލާފުވަމުންދާތީ އިސްރާއީލު ކުށްވެރިކޮށްފައެވެ.

އަދި ހޮނިހިރު ދުވަހު އެކަނިވެސް އެއްބަސްވުމާ ޚިލާފުވި 27 ޢަމަލެއް ރެކޯޑުކުރެވިފައިވާ ކަމަށާއި، އޭގެ ސަބަބުން 24 މީހުން ޝަހީދުވެ 87 މީހުން ޒަޚަމްވެފައިވާ ކަމަށް އެ އޮފީހުން ބުނެއެވެ.

މިކަންކަމަކީ ބައިނަލްއަޤްވާމީ އިންސާނީ ޙައްޤުތަކާބެހޭ ޤާނޫނާއި، ހަނގުރާމަ ހުއްޓާލުމުގެ އެއްބަސްވުމާ "ފާޅުކަން ބޮޑު ގޮތެއްގައި ޚިލާފުވުން" ކަމަށް މީޑިއާ އޮފީހުން ސިފަކޮށްފައިވެއެވެ.

އޮކްޓޯބަރު 10 ވަނަ ދުވަހުން ފެށިގެން އިސްރާއީލުން ވަނީ، އާންމުންނަށާއި، ގެތަކަށާއި، ގެދޮރު ގެއްލިފައިވާ މީހުންނަށް ޖަހާފައިވާ ފޭލިގެތަކަށް އަމާޒުކޮށް 142 ފަހަރު ބަޑިޖަހާފައެވެ. އަދި 'ޔެލޯ ލައިން'ގެ ނަމުން ނަންދީފައިވާ ސަރަޙައްދު ހުރަސްކޮށް އެއްގަމު މަގުން 21 ފަހަރު އަރައިގަނެ، ވައިގެ މަގުންނާއި ބޮޑުބަޑީގެ ޙަމަލާތަކާއި އެއްގަމު ސިފައިންގެ 228 ޙަމަލާ ދީފައިވެއެވެ. މީގެ އިތުރުން، އާންމުންގެ 100 އިމާރާތްތައް ތަޅާލާފައިވާ ކަމަށާއި، މިއީ "ޖަމާޢީ އަދަބެއް" ކަމަށާއި މިއީ ފަނާ ކުރުން އިތުރު ކުރުމުގެ މަސައްކަތެއް ކަމަށްވެސް އެ ބަޔާނުގައި ފާހަގަކޮށްފައިވެއެވެ.