ޣައްޒާ ގެ ދެކުނުގައިވާ ހާން ޔޫނިސް ގައި ބުރާސްފަތި ދުވަހު އިޒްރޭލުން ދިން ވައިގެ ހަމަލާތަކުގައި 5 މީހުން ޝަހީދުވެ 18 މީހުން ޒަހަމްވި ކަމަށް ޣައްޒާ ގެ ސިއްހީ އޮފިޝަލުން ބުނެފި އެވެ.

މިއީ ހަމާސް އާއި އިޒްރޭލް އާ ދެމެދު ހަނގުރާމަ ހުއްޓާލުމަށް ވީ އެއްބަސްވުމަށް ވީ 6 ހަފްތާ ގެ ތެރޭގައި ހިނގި މިފަދަ އިތުރު ހާދިސާ އެކެވެ. މިއާއެކު އެއްބަސްވުން ބަލިކަށި ވަމުންދާ ކަމުގެ ނިޝާންތައް އިތުރުވެފައިވާ ކަން ރިޕޯޓުތަކުގައި ވަނީ ފާހަގަ ކޮށްފައެވެ.

ހާން ޔޫނިސްގެ ބަނީ ސުހައިލާ ޓައުންގައި ހުންނަ ގެއަކަށް އިސްރާއީލުން ދިން ހަމަލާއެއް ގައި ކުޑަ އަންހެން ކުއްޖެއް ހިމެނޭ ގޮތުން 3 މީހުން ޝަހީދުވެ 15 މީހުން ޒަހަމްވި ކަމަށާއި އެހެން ހަމަލާ އެއް ގައި ކައިރީގައިވާ އަބައްސާން ޓައުން ގައި ފިރިހެނެއް ޝަހީދުވެ 3 މީހުން ޒަހަމްވި ކަމަށް ޑޮކްޓަރުންނާ ހަވާލާދީ ރިޕޯޓުތައް ބުނެއެވެ.

އިޒްރޭލުގެ ސިފައިންގެ ފަރާތުން ހަމަލާތައް ދިން ކަމަށް އެއްބަސްވި ނަމަވެސް ހަމަލާ ގައި ގެއްލުންވި މީހުންގެ މައުލޫމާތު ނޭނގޭ ކަމަށް ބުނެފައިވެއެވެ.

ބުރާސްފަތި ދުވަހު ފަހުން، އަލް-ނާސިރު ހޮސްޕިޓަލުގެ އޮފިޝަލުން ބުނީ އަބައްސާން ޓައުންގައި އިޒްރޭލުން ދިން ބަޑީގެ ހަމަލާ އެއް ގައި ފަސްވަނަ ފަލަސްތީނު މީހާ މަރުވި ކަމަށެވެ.

ބުދަ ދުވަހު، ފަލަސްތީނުގެ ހަތިޔާރުއެޅި ގުރޫޕުގެ މެމްބަރުން އެމީހުންގެ ސިފައިންނަށް ބަޑީގެ ހަމަލާދިނުމަށް ފަހު އެ ސަރަހައްދުގެ އެކި ހިސާބުތަކަށް ހަމަލާދިން ކަމަށް އިޒްރޭލުން ބުނެފައިވާއިރު، ޣައްޒާ ގެ ޑޮކްޓަރުން ބުނީ މަދުވެގެން ފަލަސްތީނުގެ 25 މީހުން ޝަހީދުވެފައިވާ ކަމަށެވެ. މިއީ އޮކްޓޯބަރު 29 ވަނަ ދުވަހުން ފެށިގެން އެންމެ ގިނަ އަދަދެއްގެ މީހުން މަރުވި ހަމަލާއެވެ.

ހަމާސް އިން ބުނެފައި ވަނީ އިޒްރޭލުގެ ހަމަލާތައް އިތުރުވުމަކީ ނުރައްކަލެއް ކަމަށާއި، ހަނގުރާމަ ހުއްޓުވުމަށް މެދުވެރިވީ ގަތަރާއި ތުރުކީން މައްސަލައިގެ ތެރެއަށް ވަނުމަށެވެ.

ހަމާސް-އިޒްރޭލު ހަނގުރާމައިގައި މައިގަނޑު މެދުވެރިއެއްގެ ގޮތުގައި ހަރަކާތްތެރިވި ގަތަރުން، ޣައްޒާ ސަރަހައްދަށް އިޒްރޭލުން ދިން އާ ވައިގެ ހަމަލާތައް ކުށްވެރިކޮށް، މި ހަމަލާތަކުގެ ސަބަބުން ހަފްތާތަކެއް ވަންދެން ދެމިއޮތް އެއްބަސްވުން ނިމުމަކަށް އަތުވެދާނެ ކަމަށް ބުންޏެވެ.

ދެ އަހަރު ދުވަހަށް ދިގުދެމިގެން ދިޔަ ޣައްޒާގެ ހަނގުރާމަ އޮކްޓޯބަރު މަހުގެ 10 ވަނަ ދުވަހު އަމަލު ކުރަން ފެށި ހަނގުރާމަ ހުއްޓާލުމުގެ އެއްބަސްވުމާ ގުޅިގެން، ހަނގުރާމައިގެ ހޫނު ކަމަށް ކޮންމެވެސް ވަރެއްގެ ލުޔެއް ލިބިފައިވެއެވެ. އޭގެ ނަތީޖާ އެއްގެ ގޮތުން އެތައް ސަތޭކަ ހާސް ފަލަސްޠީނުގެ ރައްޔިތުންނަށް އަނބުރާ އެމީހުންގެ ވަޒަނަށް އާދެވޭނެ މަގު ތަނަވަސްވެ، އެހީގެ ގާފިލާތައް ޣައްޒާ އަށް ވަނުމަށް މަގު ފަހިވި އެވެ. އަދި އިސްރާއީލުން ވަނީ ޣައްޒާގެ މައި ސަރަޙައްދުތަކުން އެ ޤައުމުގެ ސިފައިން އަނބުރާ ގެންގޮސްފައެވެ.

ނަމަވެސް، އަދިވެސް ހަމަނުޖެހުންތައް މުޅިން ހުއްޓިފައެއް ނުވެއެވެ. އެ ސަރަޙައްދުގެ ޙާލަތު އޮތީ ވަރަށް ދަށު ދަރަޖައެއްގައެވެ. ފަލަސްޠީނުގެ ޞިއްޙީ އިދާރާތަކުން ބުނާ ގޮތުގައި، ހަނގުރާމަ ހުއްޓާލި ފަހުން އިސްރާއީލުގެ ސިފައިން ޣައްޒާ އަށް ދިން ޙަމަލާތަކުގައި 312 މީހުން ޝަހީދުކޮށްލާފައިވެއެވެ.

އިސްރާއީލުން ބުނާ ގޮތުގައި، ހަނގުރާމަ ހުއްޓާލި ފަހުން އެ ޤައުމުގެ ތިން ސިފައިން މަރުވެފައިވާއިރު، އެތައް ސަތޭކަ ހަނގުރާމަވެރިންނަށް އެ ޤައުމުން ވަނީ ޙަމަލާދީފައެވެ.

ޣައްޒާގެ ހަނގުރާމަ ފެށުނީ 7 އޮކްޓޯބަރ 2023 ގައެވެ. އިސްރާއީލުން ދެމުން ގެންދާ ޙަމަލާތަކުގައި 69,000 އަށް ވުރެ ގިނަ ފަލަސްޠީނުގެ ރައްޔިތުން ޝަހީދުވެފައިވާ ކަމަށް ޣައްޒާގެ ޞިއްޙީ އިދާރާތަކުން ބުނެއެވެ.

ހަނގުރާމަ ހުއްޓާލުމުގެ އެއްބަސްވުމުގެ ދަށުން، އިސްރާއީލުގެ ބަންދުގައި ތިބި ފަލަސްޠީނުގެ ގާތްގަނޑަކަށް 2,000 ގައިދީންނާއި ހަނގުރާމައިގެ ތެރޭގައި ހައްޔަރުކުރި މީހުން ދޫކޮށްލާފައި ވާއިރު، ހަމާސް އިން ވަނީ ޣައްޒާގައި ރަހީނުކޮށްފައި ދިރިތިބި 20 މީހުން ވެސް ދޫކޮށްލާފައެވެ.