މިވަގުތު ފަލަސްޠީނުގެ މިނިވަން ދައުލަތް ބަލައި ނުގަންނަން ނިއުޒިލެންޑް އިން ނިންމައިފި

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ސަބަބުން، ދެ ދައުލަތުގެ ޙައްލު ހޯދުމަށް ގިނަ ޤައުމު ތަކަކުން ފަލަސްޠީނުގެ މިނިވަން ދައުލަތް ބަލައިގަތް ނަމަވެސް، މިވަގުތު ފަލަސްޠީނުގެ މިނިވަން ދައުލަތް ބަަލައި ނުގަންނަން ނިއުޒިލެންޑް އިން ނިންމައިފި އެވެ.

އެކަން ހާމަ ކުރައްވައި ވާހަކަ ދައްކަވަމުން ނިއުޒިލެންޑްގެ ފޮރިން މިނިސްޓަރު ވިންސްޓަން ޕީޓާސް ވިދާޅުވެފައި ވަނީ، މިވަގުތު ފަލަސްޠީނުގެ މިނިވަން ދައުލަތް ބަލައި ނުގަންނަން ނިންމާފައިވާ ކަމަށެވެ. ނަމަވެސް، ދެ ދައުލަތުގެ ޙައްލު ހޯދުމަށް ތާއީދު ކުރާ ކަަމަށް އޭނާ ހާމަ ކުރެއްވި އެވެ.

ހުކުރު ދުވަހު އދ ގެ ޖެނަރަލް އެސެމްބްލީގައި ވާހަކަ ދައްކަވަމުން ޕީޓާސް ވިދާޅުވީ، މިހާރު ހިނގަމުން އަންނަ ހަނގުރާމަ އާއި، ޣައްޒާގެ ވެރި ކަމުގައި ހަމާސް ޖަމާއަތް އޮތުމާއި، ކުރިއަށް އޮތް ދުވަސް ތަކުގައި ކަންތައް ވާނެ ގޮތުގެ ސާފު މަންޒަރެއް ފެންނަން ނެތުމާ އެކު، މިވަގުތު ފަލަސްޠީނުގެ މިނިވަން ދައުލަތް ބަަލައި ގަތުމަކީ ބުއްދިވެރި ކަމެއް ނޫން ކަމަށެވެ.

އެކަން ފާހަގަ ކުރައްވައި އޭނާ ވިދާޅުވީ، ފަލަސްޠީނުގެ މިނިވަން ދައުލަތް ބަލައި ގަތުމަށް މިވަގުތު އިސްކަން ދީފި ނަމަ، އިސްރާއީލް އާއި ހަމާސްގެ މައްޗަށް އިތުރު ބާރު ތަކެއް ފޯރުވި، ހަނގުރާމަ ހުއްޓުވުމަށް ކުރެވޭ މަސައްކަތްތަކަށް ހުރަސްތަކެއް ކުރިމަތި ވެދާނެ ކަމުގެ ކަންބޮޑުވުން އޮތް ކަމަށެވެ.

ފަލަސްޠީނުގެ މިނިވަން ދައުލަތް ބަލައި ނުގަންނަން ނިއުޒިލެންޑް އިން ނިންމާފައިވާއިރު، މިއީ އިނގިރޭސިވިލާތް، ކެނެޑާ އަދި އޮސްޓްރޭލިއާ ފަދަ އެއް އަމާޒަށް މަސައްކަތް ކުރާ ޤައުމުތަކާ ތަފާތު ނިންމުމެކެވެ. މި ޤައުމު ތަކުން ވަނީ ފަލަސްޠީނުގެ މިނިވަން ދައުލަތް ރަސްމީކޮށް ބަަލައި ގަނެ، އެކަން އިއުލާން ކޮށްފަ އެވެ. އެއާއެކު، މިހާރު 140 އަށް ވުރެ ގިނަ ޤައުމަކުން ވަނީ ފަލަސްޠީނުގެ މިނިވަން ދައުލަތް ޤާއިމު ކުރުމަށް ތާއީދު ކޮށްފަ އެވެ.

ނިއުޒިލެންޑްގެ ސަރުކާރުން ހުކުރު ދުވަހު ނެރެފައިވާ ބަޔާނެއްގައި ބުނެފައި ވަނީ، މިހާރަށް ވުރެ ސުލްޙަ އާއި މަޝްވަރާގެ ފުރުސަތު ވެސް ބޮޑު ދަނޑި ވަޅެއްގައި ފަލަސްޠީނުގެ މިނިވަން ދައުލަތް ބަަލައި ގަތުމުގެ އުންމީދު އޮތް ކަމަށެވެ.

ފަލަސްޠީނުގެ މިނިވަން ދައުލަތް ބަަލައި ގަތުން ފަސް ކުރުމަށް ނިއުޒިލެންޑްގެ ސަރުކާރުން ނިންމި ނިންމުމާ މެދު، އެ ޤައުމުގެ އިިދިކޮޅު ލޭބާ ޕާޓީ އިން ވަނީ ކަންބޮޑުވުން ފާޅުކޮށް، އެކަމަށް ފާޑު ކިޔައިފަ އެވެ. ލޭބާ ޕާޓީ އިން ބުނެފައި ވަނީ، ސަރުކާރުގެ ނިންމުމަކީ ތާރީޚުގެ ނުބައި ފަޅީގައި ތިބުމުގެ ނިންމުމެއް ކަމަށެވެ.

މީގެ އިތުރުން އެ ނިންމުމާ މެދު ނިއުޒިލެންޑްގެ ރައްޔިތުން ހިތްހަމަ ނުޖެހޭނެ ކަަމަށާއި، ފަލަސްޠީނުގެ މިނިވަން ދައުލަތް ބަލައިގަނެގެން މެނުވީ، މެދު އިރުމަތީގެ ސުލްޙަ އާއި ދެ ދައުލަތުގެ ޙައްލު ނުގެނެވޭނެ ކަމަށް ވެސް އެ ޕާޓީ އިން ވަނީ ބުނެފަ އެވެ.