ހަތިޔާާރާ ގުޅޭ ގޮތުން ހަމާސްގެ ވިސްނުން ސާފުކޮށް ބުނެދޭން ޖެހޭ: ފަލަސްޠީނުގެ ބޮޑު ވަޒީރު

ފަލަސްޠީނުގެ މިނިވަން ކަމަށް މަސައްކަތް ކުރަމުން އަންނަ ހަމާސް ޖަމާއަތުން، ހަތިޔާރާ ގުޅޭ ގޮތުން ސާފުކޮށް ޖަވާބެއް ދޭން ޖެހޭ ކަމަށް، ފަލަސްޠީނުގެ ބޮޑު ވަޒީރު މުޙައްމަދު މުސްޠަފާ ވިދާޅުވެއްޖެ އެވެ.

ފަލަސްޠީނުގެ ބޮޑު ވަޒީރު އެހެން ވިދާޅުވީ އަންގާރަ ދުވަހު އަލް އަރަބިއްޔާ އަށް ދެއްވި އިންޓަވިޔުގަ އެވެ. އެގޮތުން އޭނާ ވިދާޅުވީ ޣައްޒާގެ ވެރިކަމާ ގުޅޭ ގޮތުން ހަމާސްގެ ވިސްނުން ސާފުކޮށް ބުނެދޭން ޖެހޭ ކަމަށެވެ. ހަމަ އެހެންމެ، ހަތިޔާރު ބެހެއްޓުމުގެ މައްސަލައިގައި ވެސް، އެ ޖަމާއަތުގެ ވިސްނުން ބުނެދޭން ޖެހޭ ކަމަށް ބޮޑު ވަޒީރު ވަނީ ވިދާޅުވެފަ އެވެ.

އިތުރަށް ބޮޑު ވަޒީރު މުސްޠަފާ ވިދާޅުވީ، އަމިއްލަ ނަަފްސަށް އިޙުތިރާމް ކުރާ ކޮންމެ ދައުލަތަކުން ވެސް ހަތިޔާރާއި، ޤާނޫނު އަދި ޤާނޫނުގެ ވެރިކަމުގެ ބާރުތައް އެތައް ފަރާތްތަކެއްގެ އަތުގައި އޮތުމަކީ ޤަބޫލު ކުރެވޭނެ ކަމެއް ނޫން ކަމަށެވެ. އޭނާ ވިދާޅުވީ ހަތިޔާރު އަދި ޤާނޫނީ ގޮތުން ވެސް ޣައްޒާގެ ސަލާމަތާއި ރައްކާތެރިކަން ފުރިހަމަ އަށް އޮންނަން ވާނީ ފަލަސްޠީނުގެ ދައުލަތުގެ އަތް މަތީގައި ކަމަށެވެ.

ނަމަވެސް، ފަލަސްޠީނު އޮތޯރިޓީ އިން ޣައްޒާގެ ވެރިކަމާ ހަވާލުވާން އިސްރާއީލް އިން ބޭނުން ނުވާ ކަމަށް އޭނާ ފާހަގަ ކުރެއްވި އެވެ. އޭނާ ވިދާޅުވީ ބައި ކުޅަ ދައުލަތެއް ފަލަސްޠީނުން ޤަބޫލު ނުކުރާނެ ކަމަށާއި، ޣައްޒާގެ ވެރިކަން ފުރިހަމަ އަށް ހިންގަން ވާނީ ފަލަސްޠީނުގެ އޮތޯރިޓީ އިން ކަމަށެެވެ.

އިތުރަށް އޭނާ ވިދާޅުވެފައި ވަނީ ފަލަސްޠީނު ސަރުކާރުން، ޢަރަަބި ޤައުމުތަކާ އެކު ޣައްޒާގައި ފަލަސްޠީނު އޮތޯރިޓީ އިން އަދާ ކުރާ ވާޖިބު ތަކަށް ތާއީދު ކުރުމުގެ މަސައްކަތުގައި އެއްބާރުލުން ހޯދިފައިވާ ކަމަށެވެ. ޚާއްސަކޮށް ފަލަސްޠީނުގެ ދައުލަތަށް ތާއީދު ހޯދުމަށް ސައުދީ އަރަބިއްޔާ އިން އަދާ ކުރަމުން އަންނަ މުހިންމު ދައުރު އޭނާ ވަނީ ފާހަގަ ކުރައްވައިފަ އެވެ.

އެގޮތުން ފަލަސްޠީނުގެ ސަލާމަތީ ބާރުތަކުން، މިޞްރު އަދި އުރުދުންގައި ތަމްރީނު ހޯދަމުން އަންނަނީ ޣައްޒާގައި އެ ވާޖިބުތައް އަދާ ކުރުމަށް ކަމަށާއި، ޣައްޒާގައި 18،000 ސަލާމަތީ މުވައްޒަފުން ތިބި ކަމަށް ވެސް އޭނާ ވަނީ ވިދާޅުވެފަ އެވެ. އަދި އެ މުވައްޒަފުން ތިބީ އެ މީހުންގެ ވާޖިބުތައް އަލުން ފެށުމަށް ތައްޔާރަށް ކަމަށް ވެސް އޭނާ ވަނީ ވިދާޅުވެފަ އެވެ.

މީގެ އިތުރުން އެމެރިކާގެ ރައީސް ޑޮނަލްޑް ޓްރަމްޕްގެ ޕްލޭންގެ ދަށުން ޣައްޒާގެ ސަލާމަތާއި ރައްކާތެރިކަން ކަށަވަރު ކުރުމަށް އުފައްދަން މަސައްކަތް ކުރަމުން އަންނަ ބައިނަލްއަޤުވާމީ ސަލާމަތީ ބާރާ ގުޅޭ ގޮތުން ވާހަކަ ދައްކަވަމުން މުސްޠަފާ ވިދާޅުވީ، އެ މައްސަލައިގައި ފަލަސްޠީނުގެ އޮތޯރިޓީ އިން ބައިވެރިވެ ގޮތް ނިންމަން ޖެހޭނެ ކަމަށެވެ.

އެ ބާާރަކީ ފަލަސްޠީނު އޮތޯރިޓީ އިން ހުއްދަ ލިބިގެން މަސައްކަތް ކުރާ ބަޔަކަށް ވާން ޖެހޭނެ ކަމަށާއި، އެ ބާރުގެ މަސައްކަތް ވާން ޖެހޭނީ ވަގުތީ މަަސައްކަތަކަށް ކަމަށް ވެސް އޭނާ ވަނީ ވިދާޅުވެފަ އެވެ. އަދި އެ ބާރުގެ ދައުރަކީ ތާއީދު ކުރުމުގެ ދައުރަކަށް ވާން ޖެހޭ ކަމަށާއި، އެކަން އެހެން ގޮތަކަށް ބަދަލު ވެގެން ނުވާނެ ކަމަށް ވެސް އޭނާ ވަނީ ވިދާޅުވެފަ އެވެ.