މަދު މަދުން ހަމަލާ ދިން ނަމަވެސް، ހަނގުރާމަ ހުއްޓާލުމުގެ އެއްބަސްވުން އެބަ އޮތް: ވޭންސް

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓާލުމުގެ އެއްބަސްވުމެއް އެކުލަވާފައި އޮތްއިރު، މަދު މަދުން ޣައްޒާގައި ހަމަލާތައް ދެމުން އައި ނަމަވެސް، ހަނގުރާމަ ހުއްޓާލުމުގެ އެއްބަސްވުން އަދިވެސް ދެމި އޮތް ކަމަށް އެމެރިކާގެ ނައިބު ރައީސް ޖޭޑީ ވޭންސް ވިދާޅުވެއްޖެ އެވެ.

ޣައްޒާ ގައި އިސްރާއީލް އިން ހިންގަމުން އައި ހަނގުރާމަ ހުއްޓުމަކަށް ގެެނެސްފައި ވަނީ، އެމެރިކާގެ ރައީސް ޑޮނަލްޑް ޓްރަމްޕް ހުށަހެޅުއްވި ޕްލޭންގެ ދަށުންނެވެ. އެއްބަސްވުމުގެ ފުރަތަމަ މަރުޙަލާ ނިމިފައިވާ ކަމަށާއި، ދެން އޮތީ ދެ ވަނަ މަރުޙަލާ ތަންފީޒު ކުރުން ކަމަށް އެމެރިކާ ސަރުކާރުން ވަނީ ހާމަ ކޮށްފަ އެވެ.

އަންގާރަ ދުވަހު ނޫސްވެރިންނާ ވާހަކަ ދައްކަވަމުން ވޭންސް ވިދާޅުވީ، ޣައްޒާގައި މިހާރު ވެސް ކޮންމެ ވެސް މިންވަރަކަށް ހަމަލާތައް ދެމުން އަންނަ ކަމަށާއި، އެކަމަކު އެއީ ވަރަށް ކުދި ކުދި ހަމަލާ ތަކެއް ކަމަށެވެ. ޣައްޒާގެ އިދާރާ ތަކުން ހާމަ ކޮށްފައިވާ ގޮތުގައި އަދިވެސް އިސްރާއީލް އިން ގެންދަނީ ޣައްޒާގެ އެކި ސަރަހައްދު ތަކުގައި ހަމަލާތައް ދެމުންނެވެ.

އިސްރާއީލް އިން ޣައްޒާގެ އެކި ސަރަހައްދު ތަކަަށް ހަމަލާތައް ދެމުން އަންނައިރު، އިސްރާއީލް އާއި ހަމާސް އިން ވެސް ވަނީ އެއްބަސްވުމާ ޚިލާފުވެފައިވާ ކަމަށް ބުނެ، އެއް ބަޔަކު އަނެއް ބަޔަކަށް ތުހުމަތުތައް އަމާޒު ކުރަމުންނެވެ. އެހެން ނަމަވެސް ވޭންސް ވިދާޅުވެފައި ވަނީ، ހަގީގަތުގައި އެއްބަސްވުން މިހާރު ވެސް ދެމި އޮތް ކަަމަށާއި، އެއްބަސްވުން އަދި ވެސް ކުރިއަށް ދާނެ ކަމަށެވެ.

އެކަން ފާހަގަކޮށް ވޭންސް ވިދާޅުވެފައި ވަނީ، ޣައްޒާގައި ހަމާސް ނުވަތަ އެހެން ފަރާތަކުން ވެސް، އިސްރާއީލްގެ ސިފައިންނަށް އަމާޒުކޮށް ހަމަލާ ދީފި ނަމަ، އެކަމުގެ ރައްދުގައި އިސްރާއީލް އިން ހަމަލާ ދޭނެ ކަމަށް އެމެރިކާ އިން ލަފާ ކޮށްފައިވާ ކަމަށެވެ. ނަމަވެސް، އެ ފަދަ ކަންކަން ހިނގި ނަމަވެސް ރައީސް ޓްރަމްޕްގެ މަސައްކަތުން ޣައްޒާގައި ޤާއިމު ކޮށްފައިވާ ސުލްޙަ އާއި، ހަމަޖެހުން އަދި ވެސް ދެމި އޮންނާނެ ކަމުގެ ޔަގީންކަން ދެއްވާ ކަމަށް ވޭސް ވިދާޅުވި އެވެ.

ބައިނަލްއަޤުވާމީ މީޑިއާ ތަކުގައި ރިޕޯޓު ކޮށްފައިވާ ގޮތުން، އެމެރިކާ އިން އަންނަނީ އެއްބަސްވުމާ އެއްގޮތަށް ކަންކަން ކުރިއަށް ދޭތޯ ވަރަށް ގާތުން ބަލަމުންނެވެ. މީގެ އިތުރުން އެމެރިކާގެ އެންމެ އިސް އަމާޒަކީ މެދު އިރުމަތީގައި ސުލްޙަ ޤާއިމު ކުރުން ކަމަށް މީގެ ކުރިން އެތައް ފަހަރެއްގެ މަތިން ޓްރަމްޕް ވިދާޅުވެފައިވާއިރު، އެ މަސައްކަތުގެ އެންމެ މުހިންމު އެއް ކަމަކީ ޣައްޒާގައި ހިނގަމުން އައި ހަނގުރާމަ ހުއްޓުމަކަށް ގެނައުން ކަމަށް ވަނީ ފާހަގަ ކޮށްފަ އެވެ.

އިސްރާއީލް އިން ޣައްޒާގައި ހިންގި ހަނގުރާމައިގައި ބައި ލައްކަ އަށް ވުރެ ގިނަ މީހުން ޝަހީދު ކޮށްލާފައިވާއިރު، އެތައް ބަޔަކު ވަނީ ގެދޮރު ދޫކޮށް ހިޖުރަ ކުރަން މަޖުބޫރުވެފަ އެވެ. ހަމަލާ ތަކުގައި ޣައްޒާ މުޅިން ސުންނާފަތި ވެފައިވާއިރު، އަލުން ޣައްޒާ އާރާސްތު ކުރުމުގެ މަސައްކަތް ކުރަމުން އަންނަ ކަމަށް ސަރަހައްދުގެ ޤައުމު ތަކުން ވަނީ ފާހަގަކޮށްފަ އެވެ.

ސިޔާސީ މާހިރުން ފާހަގަ ކޮށްފައިވާ ގޮތުގައި އެމެރިކާގެ ނައިބު ރައީސް ވޭންސްގެ ވާހަކަ އިން ދޭހަ ވަނީ، ޣައްޒާގައި ހަމަޖެހުން ޤާއިމު ކުރުމާއި، ސުލްޙަ ދެމެހެއްޓުމަށް އެމެރިކާ އިން ފުރިހަމަ ސަމާލު ކަމެއް ދެމުން އަންނަ ކަމަށެވެ. އަދި އެއްބަސްވުމާ ޚިލާފަށް ކަންތައްތަކެއް ހިނގި ނަމަވެސް، އެކަން ޙައްލު ކުރުމަށް އެމެރިކާ އިން ބޭނުންވާކަން ސާފުވާ ކަމަށް ވަނީ ފާހަގަ ކޮށްފަ އެވެ.