ޓީސީ ބަލިކޮށް، މާޒިޔާ އަށް ދެ ވަނަ މޮޅު

މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި އެންމެ ފަހުގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަން އިން ކުޅުނު ދެ ވަނަ މެޗުގައި ޓީސީ ސްޕޯޓްސް ކުލަބުގެ މައްޗަށް ވެސް ކުރި ހޯދައިފި އެވެ.

ލީގުގައި ބުދަ ދުވަހުގެ ރޭ ކުޅުނު މެޗު މާޒިޔާ އިން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި މާޒިޔާ އިން ދެ ލަނޑު ޖެހިއިރު، އަނެއް ލަނޑު އެ ޓީމުން ޖެހީ ފަހު ހާފުގަ އެވެ.

މެޗު ފަށައިގެން އަށް ވަނަ މިނެޓުގައި މާޒިޔާ އަށް ލީޑު ނަގައިދިނީ އެ ޓީމަށް ކުޅެމުން އަންނަ ބިދޭސީ ކުޅުންތެރިޔާ، ސާޖިއޯ މެންޑީގުޗިއާ އިގްލީސިއަސް އެވެ. އޭގެ ފަހުން ފުރަތަމަ ހާފުގެ ފުރިހަމަ ވަގުތު ހަމަވާން ދެ މިނެޓަށް ވެފައި ވަނިކޮށް، ޙަސަން ނަޒީމް ވަނީ މާޒިޔާގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގައި މާޒިޔާ އިން އެ ޓީމުގެ ފަހު ލަނޑު ޖެހީ މެޗުގެ ފަހު ވަގުތުގެ ތެރޭގަ އެވެ. އެގޮތުން މެޗުގެ ފުރިހަމަ ވަގުތު ހަމަވާން ތިން މިނެޓަށް ވެފައި ވަނިކޮށް، މާޒިޔާގެ ތިން ވަނަ ލަނޑު ޖެހީ އެ ޓީމުގެ ޒުވާން ކުޅުންތެރިޔާ މުޙައްމަދު އިލާން އިމްރާން އެވެ.

ލީގުގައި މާޒިޔާ އިން ކުޅުނު ފުރަތަމަ މެޗުގައި އެ ޓީމުން ވަނީ އީގަލްސްގެ މައްޗަށް ކުރި ހޯދައިފަ އެވެ. މި ފަހަރުގެ ސީޒަން ފެށުމުގެ ގޮތުން ކުޅުނު ޗެރިޓީ ޝީލްޑު ވެސް މާޒިޔާ އިން ކާމިޔާބު ކުރީ އީގަލްސްގެ މައްޗަށް ކުރި ހޯދައިފަ އެވެ.

މީގެ އިތުރުން، މިއަހަރު އެފްއޭއެމް އިން ބޭއްވި އެފްއޭއެމް ލީގު ކަޕް ވެސް މާޒިޔާ އިން ވަނީ ކާމިޔާބު ކޮށްފަ އެވެ. ލީގުގައި މާޒިޔާގެ ތިން ވަނަ މެޗުގައި އެ ޓީމު ނިކުންނާނީ ބުރު ސްޕޯޓްސް ކުލަބާ ދެކޮޅަށެވެ.