ދިރާގު ދިވެހި ޕްރިމިއާ ލީގުގައި ކުލަބު އީގަލްސްއާ ދެކޮޅަށް ކުޅުނު މެޗުގައި، ފަހަތުން އަރައި ބުރު ސްޕޯޓްސް ކުލަބުން އެއްވަރު ކޮށްފި އެވެ.

ބުދަ ދުވަހުގެ ހަވީރު ގަލޮޅު ރަސްމީ ދަނޑުގައި ކުޅުނު މެޗު ނިމުނީ ދެ ޓީމު ވެސް 2-2 އިން އެއްވަރު ވެގެންނެވެ. މެޗުގައި އީގަލްސް އިން ދެ ލަނޑު ޖަހައިގެން ކުރި ހޯދާފައި ވަނިކޮށް، ބުރުން ވަނީ ފަހަތުން އަރައި ނަތީޖާ ހަމަހަމަ ކޮށްފަ އެވެ.

މެޗު ފަށައިގެން ހަ ވަނަ މިނެޓުގައި އީގަލްސް އިން ލަނޑު ޖަހައި ލީޑު ނެގި އެވެ. އެ ލަނޑު އެ ޓީމަށް ޖަހައިދިނީ އިބްރާހިމް މަހުދީ ޙުސެއިން (ފޭދޫ އިއްބެ) އެވެ. އޭގެ ފަހުން ފުރަތަމަ ހާފުގެ 20 ވަނަ މިނެޓުގައި ފޭދޫ އިއްބެ ވަނީ އީގަލްސްގެ ދެ ވަނަ ލަނޑު ޖަހައި ލީޑު ފުޅާ ކޮށްފަ އެވެ.

މެޗުގެ ފުރަތަމަ ހާފުގައި ބުރުން ވަނީ ލަނޑެއް ޖަހައި ފަރަގު ކުޑަ ކޮށްފަ އެވެ. ފުރަތަމަ ހާފުގެ 38 ވަނަ މިނެޓުގައި ބުރުގެ ފުރަތަމަ ލަނޑު ޖެހީ މުޙައްމަދު ނާއިމް އެވެ. މެޗުގެ ދެ ވަނަ ހާފު ފަށައިގެން ބާރަ ވަނަ މިނެޓުގައި ޢަބްދުﷲ ޖުނައިދު ވަނީ ބުރުގެ ދެ ވަނަ ލަނޑު ޖަހައި ނަތީޖާ ހަމަހަމަ ކޮށްދީފަ އެވެ.

ލީގުގައި ބުރުން ކުޅުނު ފުރަތަމަ މެޗުގައި ވަނީ ވިކްޓްރީ ސްޕޯޓްސް ކުލަބު އަތުން މޮޅުވެފަ އެވެ. އީގަލްސްގެ ފުރަތަމަ މެޗުގައި ވަނީ މާޒިޔާ ސްޕޯޓްސް އެންޑް ރެކްރިއޭޝަން އަތުން ބަލިވެފަ އެވެ.

ލީގުގައި ބުރަށް ދެން އޮންނާނީ މާޒިޔާއާ ދެކޮޅަށް ކުޅޭ މެޗެވެ. އަދި އީގަލްސް އަށް އޮންނާނީ ކުލަބު ގްރީން ސްޓްރީޓްސްއާ ދެކޮޅަށް ކުޅޭ މެޗެވެ.