ބަންގްލަދޭޝް ބަލިކޮށް، ރާއްޖެ އިން ލޯ މެޑަލް ކާމިޔާބު ކޮށްފި

ރާއްޖޭގައި ކުރިއަށް ދިޔަ ކޮމަންވެލްތު ބީޗު ހޭންޑު ބޯޅަ މުބާރާތުގެ ތިން ވަނަ ހޮވަން ކުޅުނު މެޗުގައި ބަންގްލަދޭޝް ބަލިކޮށް، ދިވެހި ރާއްޖެ އިން މުބާރާތުގެ ލޯ މެޑަލް ކާމިޔާބު ކޮށްފި އެވެ.

ހދ.ކުޅުދުއްފުށި ސިޓީގައި ކުރިއަށް ދިޔަ މުބާރާތުގެ ތިން ވަނަ ހޮވަން ހޯމަ ދުވަހުގެ ހަވީރު ކުޅުނު މެޗުގައި ރާއްޖެ އިން ވަނީ ބަންގްލަދޭޝް ބަލިކޮށްފަ އެވެ. މުބާރާތުގެ ލީގު ބުރުގައި ވެސް ރާއްޖެ އިން ބަންގްލަދޭޝްއާ ދެކޮޅަށް ކުޅުނުއިރު، އެ މެޗުން މޮޅުވީ ބަންގްލަދޭޝް އެވެ.

ތިން ވަނަ ހޮވަން ކުޅުނު މެޗު ރާއްޖެ އިން ކާމިޔާބު ކުރީ ދެ ސެޓު އެއް ސެޓުންނެވެ. މެޗުގެ ފުރަތަމަ ސެޓު ބަންގްލަދޭޝް އިން ކާމިޔާބު ކުރީ 25-20 އިންނެވެ. ނަމަވެސް، ރާއްޖެ އިން ވަނީ 12-22 އިން ދެ ވަނަ ސެޓު ކާމިޔާބު ކޮށްފަ އެވެ. ސެޓުގެ ގޮތުން އެއްވަރުވުމުން ޝޫޓް އައުޓުގައި ރާއްޖެ އިން ވަނީ 4-7 އިން ބަންގްލަދޭޝްގެ މައްޗަށް ކުރި ހޯދައިފަ އެވެ.

މުބާރާތުގެ ތިން ވަނަ ހޮވާ މެޗުގައި ރާއްޖެ އިން ކުޅެން ޖެހުނީ ސެމީ ފައިނަލްގައި ބަލިވުމުންނެވެ. ސެމީ ފައިނަލްގައި ރާއްޖެ އިން ސްރީ ލަންކާއާ ވާދަކުރިއިރު، ލަންކާ ވަނީ ސީދާ ދެ ސެޓުން ރާއްޖެ ބަލިކޮށްފަ އެވެ. އޭގެ ކުރިން ލީގު ބުރުގައި ރާއްޖެ އިން ސްރީ ލަންކާގެ މައްޗަށް ކުރި ހޯދި އެވެ.

މުބާރާތުގެ ލީގު ބުރުގައި ރާއްޖެ އިން ކުޅުނު ފަސް މެޗުގެ ތެރެއިން ތިން މެޗުން މޮޅުވެފައިވާއިރު، ދެ މެޗުން ވަނީ އެއްވަރުވެފަ އެވެ. ރާއްޖެ މޮޅުވެފައި ވަނީ ސްރީ ލަންކާ، ދެކުނު އެފްރިކާ އަދި އިންޑިއާ އަތުންނެވެ. ބަލިވެފައި ވަނީ ބަަންގްލަދޭޝް އަދި ޕާކިސްތާން އަތުންނެވެ.

މުބާރާތުގެ ތިން ވަނަ ރާއްޖެ އިން ހޯދިއިރު، ޖުމުލަ ގޮތެއްގައި މުބާރާތުގައި ރާއްޖޭގެ ކުޅުންތެރިން ވަނީ ރަނގަޅު ކުޅުމެއް ދައްކައިފަ އެވެ. ޚާއްސަކޮށް ލީގު ބުރުގައި ރާއްޖެ އިން މޮޅަށް ކުޅެފައިވާއިރު، ސެމީ ފައިނަލްގައި ރާއްޖެ އިން ރަނގަޅު ވާދައެއް ކުރި އެވެ.