ސެމީ ފައިނަލް އިން ބަލިވެ، ރާއްޖެ ތިން ވަނަ ހޮވާ މެޗަށް

ރާއްޖޭގައި ކުރިއަށްދާ ކޮމަންވެލްތު ބީޗު ހޭންޑު ބޯޅަ މުބާރާތުގެ ސެމީ ފައިނަލްގައި ސްރީ ލަންކާއާ ދެކޮޅަށް ކުޅުނު މެޗުން ބަލިވެ، ތިން ވަނަ ހޮވަން ކުޅޭ މެޗުގައި ވާދަ ކުރަން ރާއްޖެ އަށް ޖެހިއްޖެ އެވެ.

އާދީއްތަ ދުވަހުގެ ހަވީރު ކުޅުނު ސެމީ ފައިނަލްގައި ސްރީ ލަންކާ އިން ވަނީ ސީދާ ދެ ސެޓުން ރާއްޖޭގެ މައްޗަށް ކުރި ހޯދައިފަ އެވެ. މެޗުގެ ސެޓުތައް ސްރީ ލަންކާ އިން ކާމިޔާބު ކޮށްފައި ވަނީ 14-12 އަދި 24-14 އިންނެވެ. މުބާރާތުގެ ލީގު ބުރުގައި ވެސް ރާއްޖެ އާއި ސްރީ ލަންކާ ބައްދަލު ކޮށްފައިވާއިރު، ރާއްޖެ އިން ވަނީ އެ މެޗުން މޮޅުވެފަ އެވެ.

މުބާރާތުގެ ލީގު ބުރުގައި ރާއްޖެ އިން ކުޅުނު ފަސް މެޗުގެ ތެރެއިން ތިން މެޗުން ވަނީ މޮޅުވެފަ އެވެ. އެއީ ސްރީ ލަންކާ، ދެކުނު އެފްރިކާ އަދި އިންޑިއާ އަތުންނެވެ. ލީގު ބުރުގައި ޕާކިސްތާން އަދި ބަންގްލަދޭޝްއާ ދެކޮޅަށް ކުޅުނު މެޗުން ރާއްޖެ ވަނީ ބަލިވެފަ އެވެ.

މުބާރާތުގެ އަނެއް ސެމީ ފައިނަލްގައި ޕާކިސްތާން އިން ވަނީ ބަންގްލަދޭޝްގެ މައްޗަށް ކުރި ހޯދައިފަ އެވެ. ޕާކިސްތާން އިން އެ މެޗު ކާމިޔާބު ކުރީ ސީދާ ދެ ސެޓުންނެވެ.

މުބާރާތުގެ ފައިނަލްގައި ޕާކިސްތާން އާއި ސްރީ ލަންކާ ބައްދަލު ކުރާއިރު، ރާއްޖެ އިން ކުޅެން ޖެހޭނީ ތިން ވަނަ ހޮވާ މެޗުގަ އެވެ. އެ މެޗުގައި ރާއްޖެ އިން ނިކުންނާނީ ބަންގްލަދޭޝްއާ ދެކޮޅަށެވެ.