ހޭންޑުބޯޅަ އެސޯސިއޭޝަން އޮފް މޯލްޑިވްސްގެ އިސްވެރިންނާ ގުޅުން ހުރި ކޮރަޕްޝަންގެ މައްސަލައެއް، އެންޓި ކޮރަޕްޝަން ކޮމިޝަން (އޭސީސީ) އަށް ހުށަހަޅައިފި އެވެ.
އަމިއްލަ ފަރާތަަކުން އޭސީސީ އަށް ހުށަހަޅާފައިވާ އެ މައްސަލަ ރައްދު ވަނީ ހޭންޑުބޯޅަ އެސޯސިއޭޝަން އޮފް މޯލްޑިވްސްގެ ރައީސް އަޙުމަދު މުޖުތަބާ (މުޖޭ) އަދި އެ އެސޯސިއޭޝަންގެ ޖެނަރަލް ސެކްރެޓަރީ އަކަށް އެންމެ ފަހުން ހުރި ޢަބްދުﷲ އަންވަރު އަށެވެ. ދާދި ފަހުން ވަނީ އެ އެސޯސިއޭޝަންގެ ޖެނަރަލް ސެކްރެޓަރީގެ މަޤާމުން އަންވަރު ވަކި ކޮށްފަ އެވެ. ހޭންޑުބޯޅަ އެސޯސިއޭޝަންގެ ހިންގާ ކޮމެޓީން އޭނާ ވަކި ކުރަން ނިންމީ، އެ އެސޯސިއޭޝަންގެ ފައިސާ އަށް ޚިޔާނާތްތެރިވެފައިވާ މައްސަލައިގަ އެވެ.
ހޭންޑުބޯޅަ އެސޯސިއޭޝަންގެ ރައީސް މުޖޭގެ މައްޗަށް ކުރެވޭ ތުހުމަތަކީ، އެ އެސޯސިއޭޝަންގެ ރައީސްގެ ޙައިޞިއްޔަތުން ލިބެމުން އަންނަ އިނާޔަތުގެ ފައިސާ އެޑުވާންސްކޮށް ނަގާފައިވާ ކަމުގެ ތުހުމަތެވެ. ނަމަވެސް، އެ ތުހުމަތުތަކަށް މުޖޭ ވަނީ އިންކާރު ކޮށްފަ އެވެ. މީގެ އިތުރުން އެ އެސޯސިއޭޝަންގެ ކުރީގެ ޖެނަރަލް ސެކްރެޓަރީ އަންވަރުގެ މައްޗަށް ކުރާ ތުހުމަތުގައި، އެސޯސިއޭޝަންގެ 500،000 (ފަސްލައްކަ) އެއްހާ ރުފިޔާ ނަހަމަ ގޮތުގައި ބޭނުން ކޮށްފައިވާ ކަމަށް ތުހުމަތު ކޮށްފައިވެ އެވެ.
ހޭންޑުބޯޅަ އެސޯސިއޭޝަންގެ އިސްވެރިންގެ މައްޗަށް ކޮރަޕްޝަންގެ ތުހުމަތުތައް ކޮށްފައިވާއިރު، އެންމެ ފަހުން އޮތް މޯލްޑިވްސް ސްޕޯޓްސް އެވޯޑްސްގެ އެންމެ މޮޅު އެސޯސިއޭޝަނަކަށް ހޮވުނީ ވެސް ހޭންޑުބޯޅަ އެސޯސިއޭޝަން އެވެ. އެ މަޤާމުން ހޭންޑުބޯޅަ އެސޯސިއޭޝަން އިން ހޯދީ ޓޭބަލް ޓެނިސް (ޓީޓީ) އެސޯސިއޭޝަނާ ވާދަކޮށެވެ.
ރާއްޖޭގެ އެކި އެކި ކުޅިވަރު އެސޯސިއޭޝަންތަކުގެ މައްޗަށް ކޮރަޕްޝަންގެ ތުހުމަތުތައް ކުރެވޭއިރު، ދާދި ފަހުން ވަނީ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)ގެ ފައިސާ އަށް އެ އިދާރާގެ ވެރިން ޚިޔާނާތްތެރިވެފައިވާ މައްސަލަ ވެސް ފެންމަތިވެފަ އެވެ. އެކަމުގައި ބައެއް ފަރާތްތަކުގެ މައްޗަށް ދައުވާ ވެސް ވަނީ އުފުލައިފަ އެވެ. މީގެ އިތުރުން ބެޑްމިންޓަން އެސޯސިއޭޝަން އޮފް މޯލްޑިވްސްއާ ގުޅުން ހުރި މައްސަލަތަކެއް ވެސް ވަނީ ފެންމަތިވެފަ އެވެ.
