ޚިޔާނާތުގެ މައްސަލައެއްގައި ހޭންޑުބޯޅައިގެ ޖީއެސް މަޤާމުން ވަކިކޮށްފި
އަންވަރު މަޤާމުން ވަކިކޮށްފައި ވަނީ ހޭންޑުބޯޅަ އެސޯސިއޭޝަން އޮފް މޯލްޑިވްސްގެ ފައިސާ އަށް ޚިޔާނާތްތެރިވެފައިވާ މައްސަލައެއްގަ އެވެ.
ހޭންޑުބޯޅަ އެސޯސިއޭޝަންގެ ޖީއެސް އަކަށް ހުރި އަންވަރު
ހޭންޑުބޯޅަ އެސޯސިއޭޝަން އޮފް މޯލްޑިވްސްގެ ޖެނަރަލް ސެކްރެޓަރީގެ މަޤާމުގައި ހުރި ޢަބްދުﷲ އަންވަރު އެ މަޤާމުން ވަކިކޮށްފި އެވެ.
އަންވަރު މަޤާމުން ވަކިކޮށްފައި ވަނީ ހޭންޑުބޯޅަ އެސޯސިއޭޝަން އޮފް މޯލްޑިވްސްގެ ފައިސާ އަށް ޚިޔާނާތްތެރިވެފައިވާ މައްސަލައެއްގަ އެވެ. އެ ނިންމުން ނިންމާފައި ވަނީ ހޭންޑުބޯޅަ އެސޯސިއޭޝަންގެ ހިންގާ ކޮމެޓީގެ ބައްދަލުވުމެއްގަ އެވެ. އޭނާ މަޤާމުން ވަކި ކުރަން ނިންމިތާ މިހާރު ހަފުތާއެއްހާ ދުވަސް ވެދާނެ އެވެ.
އަންވަރާ ގުޅޭ މައްސަލަ ހޭންޑުބޯޅަ އެސޯސިއޭޝަނުން އަންނަނީ އިތުރަށް ބަލަމުންނެވެ. އެކަމާ ގުޅިގެން ބަލަން ޖެހޭ އިތުރު ކަންކަން ކުރިއަށްދާއިރު، އިތުބާރު ހިފޭ މަޤާމެއްގައި ހުރެ، ޚިޔާނާތުގެ އަމަލެއް ކޮށްފައިވާތީ އެސޯސިއޭޝަނުން ނިންމީ އޭނާ މަޤާމުން ވަކި ކުރުމަށެވެ. އެ ނިންމުން އެ އެސޯސިއޭޝަނުން ނިންމީ، އެސޯސިއޭޝަން ހިންގުމުގައި ޚަރުދަނާ ގޮތްތަކެއް ގެންގުޅެ، ހިންގުމުގެ އެންމެހާ ކަންކަން ރަނގަޅު ކުރަން ވެސް ބޭނުންވާތީ އެވެ.
އެންމެ ފަހުން މިދިޔަ ހަފުތާގައި އޮތް މޯލްޑިވްސް ސްޕޯޓްސް އެވޯޑްސް 2024ގެ އެންމެ ރަނގަޅު އެސޯސިއޭޝަނަކަށް ހޮވުނީ ވެސް ހޭންޑުބޯޅަ އެސޯސިއޭޝަން އެވެ. އެ މަޤާމުން ހޭންޑުބޯޅަ އެސޯސިއޭޝަނުން ހޯދީ، ޓޭބަލް ޓެނިސް (ޓީޓީ) އެސޯސިއޭޝަނާ ވާދަކޮށެވެ.
