ހުނަރުވެރި ކުޅުންތެރިޔާ ޔަޝްމު، ހޭންޑުބޯޅަ ޤައުމީ ޓީމުން ވަކި ކޮށްފި

ރާއްޖޭގެ ޒުވާން ހުނަރުވެރި ހޭންޑްބޯޅަ ކުޅުންތެރިޔާ މުޙައްމަދު ޔަޝްމު، ޤައުމީ ހޭންޑު ބޯޅަ ޓީމުން ވަކި ކޮށްފި އެވެ.

އެކަން ހާމަކޮށްފައި ވަނީ ޔަޝްމު، އޭނާގެ ސޯޝަލް މީޑިއާގައި ކޮށްފައިވާ ޕޯސްޓެއްގަ އެވެ. އެގޮތުން އެ ޕޯސްޓުގައި ޔަޝްމު ބުނެފައި ވަނީ، ބައިނަލްއަޤުވާމީ ފެންވަރުގައި މެލޭޝިޔާގައި ތަމްރީނުތައް ހަދައި، ހޭންޑު ބޯޅަ ކުޅެމުން ދަނިކޮށް ޤައުމީ ޓީމުން އޭނާ ވަކި ކޮށްފައިވާ ކަމަށެވެ.

ޔަޝްމު އަކީ ބޭރު ޤައުމެއްގައި ހޭންޑު ބޯޅަ ކުޅެ އަދި، ހޭންޑު ބޯޅަ ތަމްރީނު ފުރިހަމަ ކުރި ފުރަތަމަ ދިވެހި ކުޅުންތެރިޔާ އެވެ. ޔަޝްމުގެ ޕޯސްޓުގައި އޭނާ ބުނެފައި ވަނީ، މެލޭޝިޔާގައި އޭނާ ހޭދަ ކުރި ދެ މަސް ދުވަހާއި ބައިގެ މުއްދަތުގެ ތެރޭގައި ތަމްރީނު ތަކަށް ފުރިހަމަ އަށް ޙާޟިރުވެފައި ވާނެ ކަމަށާއި، ޙާޟިރީގެ ރެކޯޑުތައް ހޭންޑު ބޯޅަ އެސޯސިއޭޝަަން އޮފް މޯލްޑިވްސްގެ ރައީސްއާ ވެސް ހިއްސާ ކޮށްފައި ވާނެ ކަމަށެވެ.

އެ މުއްދަތުގެ ތެރޭގައި ޔަޝްމުގެ ޙާޟިރީ ރަނގަޅު ވުމުގެ ސަބަބުން، ޤައުމީ ޓީމުގެ ކުޅުންތެރިންނަށް ދެމުން އަންނަ މުސާރަ އެ ދެ މަސް ދުވަހު އޭނާ އަށް ދީފައިވާ ކަމަށް ޔަޝްމު ވަނީ ފާހަގަ ކޮށްފަ އެވެ.

ޔަޝްމުގެ ޕޯސްޓުގައި އޭނާ ބުނެފައި ވަނީ މާލޭގައި ހޭންޑު ބޯޅަ ޤައުމީ ޓީމުގެ ފަރިތަ ކުރުމުގައި ބައިވެރިވުމަށް އޭނާ އަށް އަންގާފައި ނުވާ ކަމަށާއި، އެއީ ވަރަށް ހިތާމަކުރާ ކަމެއް ކަމަށެވެ. އަދި މާލެ އައީ ވިސާގެ މުއްދަތު ހަަމަވާތީކަން ފާހަގަކޮށް ޔަޝްމު ބުނީ، މާލެ އައިތާ ގިނަ އިރުތަކެއް ނުވަނީސް ހޭންޑު ބޯޅަ އެސޯސިއޭޝަން އަށް އައުމަށް އެދުނު ކަމަށެވެ.

އެސޯސިއޭޝަން އިން އެދުނީ ޓެސްޓަކަށް އަންނަން ކަމަށާއި، ނަމަވެސް ދަތުރު ކޮށްފައި އައިތާ މާ ގިނައިރު ނުވާތީ، އެ ވަގުތު ޓެސްޓު ހަދަން ދާން ފަސޭހަ ނުވި ކަމަށް ޔަޝްމު ބުންޏެވެ. އެ ދުވަހުގެ ފަހުން، ޤައުމީ ހޭންޑު ބޯޅަ ޓީމުން ޔަޝްމު ވަކި ކޮށްފައިވާ މައްސަލައިގައި އެކި ވާހަކަތައް އިވެމުން ދިޔަ ކަމަށް ޔަޝްމު ވަނީ ބުނެފަ އެވެ. އެގޮތުން ބައެއް ކޯޗުން ބުނެފައި ވަނީ ޔަޝްމު ޓެސްޓަށް ނުދިޔުމުގެ ސަބަބުން ޤައުމީ ޓީމުން ވަކި ކުރީ ކަމަށާއި، އަނެއްބައި ކޯޗުން ދައްކަނީ އެހެން ވާހަކައެއް ކަމަށް ޔަޝްމު ފާހަގަ ކުރި އެވެ.

ޤައުމީ ޓީމުން ޔަޝްމު ވަކި ކޮށްފައިވާއިރު، ޔަޝްމު ބުނީ އެއީ އޭނާ އަށް ބޮޑު ހިތާމަ އަކާއި، ހިތްދަތި ކަމެއް ލިބޭ ކަމެއް ކަމަށެވެ. ޚާއްސަކޮށް އަމިއްލަ ޤައުމު ތަމްސީލު ކުރުމަކީ އަބަދު ވެސް ލިބޭ ފަޚުރެއް ކަމަށާއި، ކޮންމެ ތަނެއްގައި އޭނާ ކުޅުނު ނަމަވެސް، ދިވެހި ހޭންޑު ބޯޅަ ކުރިއެރުވުމަށްޓަކައި މަސައްކަތް ކުރުމަށް އަބަދު ވެސް ސާބިތުކަމާ އެކު ހުރި ކަމަށް ޔަޝްމު ބުންޏެވެ.

ޕޯސްޓު ނިންމާލަމުން ޔަޝްމު ބުނެފައި ވަނީ، އޭނާ އަށް ދިމާވި ހުރިހާ ކަމެއްގެ ތެރޭގައި ވެސް، އޭނާގެ އާއިލާ އާއި، ރަޙުމަތްތެރިން އަދި ހެޔޮ އެދޭ އެންމެހާ ފަރާތްތަކުން ދެމުން އަންނަ ސަޕޯޓަށް ވަރަށް ބޮޑަށް ޝުކުރު އަދާ ކުރަން ބޭނުންވާ ކަމަށެވެ.

ފާއިތުވި ދެ އަހަރަށް ބަލާއިރު، 2023 ވަނަ އަހަރާއި، 2024 ވަނަ އަހަރު ވެސް ޔަޝްމު ވަނީ ގިނަ ކާމިޔާބީ ތަކެއް ހޯދައިފަ އެވެ. އަދި ރާއްޖެ އިން ބޭރުން ތަމްރީނު ފުރިހަމަކޮށް، ހުނަރުވެރިކަމާ އެކު ހޭންޑު ބޯޅަ ކުޅެމުން އައި ކުޅުންތެރިޔަކު ޤައުމީ ޓީމުން ވަކި ކުރުމުން، ގިނަ ބަޔަކު އަންނަނީ ހޭންޑު ބޯޅަ އެސޯސިއޭޝަން އަށް ފާޑު ކިޔަމުންނެވެ.