މިހާރު ކުރިއަށްދާ ދިރާގު ދިވެހި ޕްރިމިއާ ލީގުގައި ބުރު ސްޕޯޓްސް ކުލަބުން ކުޅުނު ފުރަތަމަ މެޗުގައި، ވިކްޓަރީ ސްޕޯޓްސް ކުލަބު ބަލިކޮށް ލީގުގައި ވަރުގަދަ ފެށުމެއް ހޯދައިފި އެވެ.

ހުކުރު ދުވަހުގެ ރޭ ގަލޮޅު ރަސްމީ ދަނޑުގައި ކުޅުނު މެޗު ބުރުން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި ބުރުން ދެ ލަނޑު ޖެހިއިރު، ފަހު ހާފުގައި އެ ޓީމުން ވަނީ ތިން ލަނޑު ޖަހައިފަ އެވެ.

މެޗު ފަށައިގެން އަށް ވަނަ މިނެޓުގައި ބުރަށް ލަނޑު ޖަހައި ލީޑު ނަގައިދިނީ ޢަބްދުﷲ ޖުނައިދު އެވެ. އޭގެ ފަހުން ފުރަތަމަ ހާފުގެ 25 ވަނަ މިނެޓުގައި ބުރުގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ އެ ޓީމުގެ ބިދޭސީ ކުޅުންތެރިޔާ، ހުޑްސަން ޑިއާޒް އެވެ. 

އޭގެ ފަހުން މެޗުގެ ދެ ވަނަ ހާފުގައި، ހުޑްސަން ވަނީ ބުރުގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްފަ އެވެ. މެޗުގައި ބުރުން އެ ޓީމުގެ ފަހު ދެ ލަނޑު ވެސް ޖެހީ، މެޗުގެ ފުރިހަމަ ވަގުތު ހަމަވެ އިތުރަށް ދެއްކި ވަގުތުގަ އެވެ.

އެގޮތުން އިތުރު ވަގުތުގައި ބުރުގެ ހަތަރު ވަނަ ލަނޑު ޖެހީ މުޙައްމަދު ނާއިމް އެވެ. އޭގެ މިނެޓެއް ފަހުން މެޗުގައި ބުރުގެ ފަސް ވަނަ ލަނޑު ޖެހީ އަޒްހާދް މުޙައްމަދު ޒާހިދު އެވެ.

ގިނަ ދުވަސް ތަކަކަށް ފަހު ދިވެހި ލީގުގެ ކުޅުން ފަށާފައިވާއިރު، ކުލަބު ތަކުން ވަނީ ސީޒަނަށް ވަރަށް ބޮޑަށް ތައްޔާރުވެފަ އެވެ. ޚާއްސަކޮށް ރާއްޖޭގައި ފުޓުބޯޅައިގެ ޙަރަކާތްތައް ހުއްޓިފައި އޮންނަތާ އެތައް ދުވަހެއް ފަހުން ފުޓުބޯޅަ ފަށާފައި ވަނީ ވެސް، ގިނަ ގޮންޖެހުންތަކާ އެކު އެވެ.

ލީގު އަލުން ފަށާފައިވާއިރު، އާދިއްތަ ދުވަހު ވެސް ލީގުގެ ކުޅުން އޮންނާނެ އެވެ.