އާ އިންޖީނެއް ކެންދޫ އަށް ގެންދިޔަތާ 6 މަސް ނުވޭ: މުޅި ދުވަހު ކެންދޫގެ ބޮޑުބައިގައި ކަރަންޓެއް ނެތް!
އެ ރަށުގެ ކަރަންޓުގެ މައްސަލަ ދާއިމީ ގގޮތެއްގައި ހައްލު ނުކުރެވި އެތައް ދުވަހެއް ވަނީ ވެފަ
ކެންދޫ ކަރަންޓުގެ މައްސަލަ ދިމާވުމުން އާއްމުން ނުރުހުން ފާޅުކުރަނީ
ބ. ކެންދޫ އަށް ދިމާވެފައިވާ ކަރަންޓުގެ މައްސަލަ ހައްލުކުރުމަށް އެ ރަށަށް އައު ޖެންސެޓެއް ފޮނުވިތާ 6 މަސް ވެސް ނުވެ އަނެއްކާ ވެސް އެ ރަށުގައި ކަރަންޓުގެ މައްސަލަ ދިމާވެއްޖެ އެވެ.
ބ. ކެންދޫން ކަރަންޓު ކެނޑޭތާ ހަ މަސް ވުމުން އެޕްރީލް މަހުގެ ތެރޭގައި ކެންދޫ ދާއިރާގެ މެމްބަރު މައުރޫފް ޒާކިރު ވެސް ވަނީ އެކަމާއި މެދު ވަރަށް ބޮޑަށް ނުރުހުން ފާޅުކުރައްވާފަ އެވެ. އެ ރަށުގެ އާއްމުން ވެސް އެކަމާއި މެދު އިންތިހާ އަށް ކަންބޮޑުވުން ފާޅުކުރަމުން ދަނިކޮށް އާ ޖެނެރޭޓަރެއް އެ ރަށަށް ފޮނުވާފައި ވަނީ ނިމިދިޔަ އެޕްރިލް މަހުގެ ތެރޭގަ އެވެ.
ކެންދޫ އިން ކަރަންޓު ކެނޑުމުގެ މައްސަލަ އާއި ގުޅޭގޮތުން ރާއްޖެ އެމްވީން ސުވާލުކުރުމުން ކެންދޫ ކައުންސިލްގެ ނައިބު ރައީސް، އަހުމަދު އައްޒާމް ވިދާޅުވީ ބުރާސްފަތި ދުވަހު ހެނދުނުން ފެށިގެން ރަށުގެ ބޮޑު ބައިގައި ކަރަންޓު ނެތް ކަމަށެވެ. ރަށަށް ކަރަންޓު ދެމުން އައީ ރަށް ހަތަރު ބަޔަކަށް ބަހާލައިގެން، 30 މިނިޓުން 30 މިނިޓުން އެކި ބައިބަޔަށް ކަރަންޓު ދޭ ގޮތަށް ކަމަށް ވުމާއި އެކު ރަށުގެ ބޮޑު ބައި ކަރަންޓާއި ނުލާ ގިނަ ވަގުތުތަކެއް ހޭދަކުރަން ޖެހުނު ކަން އޭނާ ވަނީ ފާހަގަކުރައްވާފަ އެވެ.
"މިއަދު 30 މިނިޓުން 30 މިނިޓުން ކަރަންޓު ކަނޑަމުން ދިޔައީ. ކުރިން ހުރި ބާ އިންޖީނާއި، އެއްލާލާފައި ހުރި ބާ އިންޖީނުން ސްޕެއަރ ނަގައިގެން އިންޖީނުގެ މައްސަލަ ހައްލުކުރަން މަސައްކަތް ކުރަނީ. އެންމެ ފުރަތަމަ ހެނދުނު ކަރަންޓް ދިޔައީ. ސަރވިސް ކުރަން ކަރަންޓު ދާނެ ވާހަކަ އަންގާފައި އޮތީ. މުޅި ދުވަސް މިދިޔައީ ހަމަ 30 މިނިޓުން އެކި ތަންތަނުން ކަރަންޓު ކަނޑަމުން ކަނޑަމުން ކިރިޔާ އެ ހިފެހެއްޓީ. މިހާރު ދެ ސަރަހައްދެއްގައި އެބަ އޮތް." އެނާ ވިދާޅުވި އެވެ.
އޭނާ ވިދާޅުވީ އިރުއިރުކޮޅާއި ކަރަންޓު ދިއުމުގެ ސަބަބުން އެކަމުގެ ޝަކުވާ ކައުންސިލާއި އާއްމުން ހިއްސާކޮށްފައިވާ ކަަމަށެވެ. އަދި މައްސަލަ އެއްކޮށް ހައްލުކުރެވޭނެ ވަގުތެއް އަދި މުޅިން ސާފު ނުވާކަމަށް އޭނާ ފާހަގަކުރެއްވި އެވެ.
"މުދާތަކާއި އެއްޗެހި ހަލާކުވެގެން ވަރަށް ގިނަ މީހުން ކައުންސިލަށް އައި އެ ޝަކުވާ އާއި އެކު. ޒިންމާ ނަގާނެ ފަރާތެއް ނެތް. ބައެއް ގޭގޭގައި ކުދިން މަގުމަތީގައި ނިންދަވާފައި ވެސް އެބަ ތިބި. ބައެއް މީހުން ތިބީ ޖޯލީގަ. އަދި އަލަށް ގެނައި އިންޖީނަށް ނުވޭ ހަމަސް. " އޭނާ ވިދާޅުވި އެވެ.
ކެންދޫގެ ފެނަކަ މެނޭޖަރާއި ހަވާލާދީ އޭނާ ވިދާޅުވީ މައްސަލަ ހައްލުކުރުމަށް މިހާރު ވެސް ރަށުގެ ފެނަކައިގެ މުވައްޒަފުން މަސައްކަތް ކުރަމުންދާ ކަމަށެވެ.
މިކަމާއި ގުޅޭގޮތުން ކެންދޫ ދާއިރާގެ މެމްބަރު މައުރޫފް ޒާކިރު ރާއްޖެއެމްވީ އަށް ވިދާޅުވީ ކެންދޫ އަށް އާ އިންޖީނު ގެންދިޔަތާ 6 މަސް ވެސް ނުވަނީސް މި ފަދަ މައްސަލަ އެއް ދިމާވުމުން ވަރަށް ބޮޑަށް ސުވާލު އުފެދޭ ކަމަށެވެ. އަދި މިއީ ޖެއްސުމަށް ކުރާ ކަމެއްތޯ އޭނާ ސުވާލު އުފެއްދެވި އެވެ.
ކެންދޫއަކީ 1،400 މީހުންގެ އާބާދީއެއް އޮންނަ ރަށެކެވެ. އެހެންނަމަވެސް އެ ރަށުގެ ކަރަންޓުގެ މައްސަލަ ދާއިމީ ގގޮތެއްގައި ހައްލު ނުކުރެވި އެތައް ދުވަހެއް ވަނީ ވެފައެވެ. މީގެ ކުރިން އެޕްރިލް މަހު އެ ރަށަށް އާ ޖެންސެޓެއް ފޮނުވީ ވެސް އެ ރަށުގެ ކަރަންޓުގެ މައްސަލަ ހައްލު ނުވެ އޮންނަތާ 6 މަސް ދުވަސް ހޭދަވީ ފަހުންނެވެ.
