ފަލަސްޠީނުގެ ދައުލަތް ޤަބޫލު ކުރުމަކީ، ދެ ދައުލަތުގެ ޙައްލަށް ހަލުވި ކަމެއް އަންނާނެ ކަމެއް: ޒޮމްލޮޓް

ފަލަސްޠީނުގެ މިނިވަން ދައުލަތް ޤަބޫލު ކުރުމަކީ، ދެ ދައުލަތުގެ ޙައްލު ހޯދުމަށް ކުރަމުން އަންނަ މަސައްކަތް ހަލުވި ދުވެއްޔެއްގައި ކުރިއަށް ގެންދިޔުމަށް މަގު ފަހި ވާނެ ކަމެއް ކަމަށް، އިނގިރޭސިވިލާތުގެ ލަންޑަންގައި ހުންނަ ފަލަސްޠީނު މިޝަންގެ އިސްވެރިޔާ ހުސާމް ޒޮމްލޮޓް ވިދާޅުވެއްޖެ އެވެ.

މި މަހު އެމެރިކާގެ ނިއު ޔޯކުގައި ހުންނަ އދ ގެ މައި މަރުކަޒުގައި އޮންނަ، އދ ގެ ޖެނަރަލް އެސެމްބްލީގައި ފަލަސްޠީނުގެ މިނިވަން ދައުލަތް ބަލައި ގަންނަން ނިންމާފައިވާ ކަމަށް ގިނަ ޤައުމު ތަކަކުން ވަނީ އިއުލާން ކޮށްފަ އެވެ.

އެގޮތުން ފްރާންސް އާއި، އިނގިރޭސިވިލާތުގެ އިތުރުން، ކެނެޑާ، އޮސްޓްރޭލިއާ އަދި ބެލްޖިއަމް އިންް ވެސް ވަނީ ފަލަސްޠީނުގެ މިނިވަން ދައުލަތް ބަަލައި ގަންނަން ނިންމައިފަ އެވެ. އޭގެ އިތުރުން، ބައެއް އެހެން ޤައުމު ތަކުން ވެސް ވަނީ ފަލަސްޠީނުގެ މިނިވަން ދައުލަތް ޤަބޫލު ކުރަން ނިންމާފައި އެވެ.

މަސްރަޙު ދިރާސާ ކުރާ ބައެއް ފަރާތްތަކުން ބުނެފައިވާ ގޮތުގައި، ފަލަސްޠީނުގެ މިނިވަން ދައުލަތް ބަލައި ގަތުމަށް އިނގިރޭސިވިލާތުން ނިންމާފައިވާ ނިންމުން ބަދަލު ކުރުމަކީ ވެސް އެކަށީގެންވާ ކަމެކެވެ. އެއީ އިސްރާއީލް އިން، ޣައްޒާގެ އިންސާނީ ޙާލަތު ރަނގަޅުކޮށް، އަދި ދިގު މުއްދަތުގެ ސުލްޙަވެރި ކަމަކަށް އެއްބަސްވެއްޖެ ނަމަ އެވެ.

ފަލަސްޠީނުގެ މިނިވަން ދައުލަތް ބަލައި ގަންނަން ޤައުމު ތަކުން ނިންމާފައި ވަނީ، އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ހުއްޓުވުމަށާއި، ހުޅަނގު އައްސޭރީގައި ޔަހޫދީ އާބާދީތައް އިތުރު ކުރުން ހުއްޓުވުމަށް ބާރު އެޅުމުގެ ގޮތުންނެވެ.

ރޮއިޓަރސް އާއި ވާހަކަ ދައްކަވަމުން ޒޮމްލޮޓް ވިދާޅުވީ، އުންމީދަކީ މި ފެށުނު މަސައްކަތަކީ ދެ ދައުލަތުގެ ޙައްލު ހޯދުމަށް ކުރެވޭ މުހިންމު ކަމަކަށްވުން ކަމަށެވެ. އަދި މިއީ ވަރުގަދަ ފެށުމަކަަށް ވާނެ ކަމަށް އުންމީދު ކުރައްވާ ކަމަށާއި، ވަކި ހިސާބަކުން މަޑު ޖެހޭނެ ކަމެއް ކަމަށް ޤަބޫލު ނުކުރައްވާ ކަމަށް ވެސް އޭނާ ވިދާޅުވި އެވެ.

އިސްރާއީލް އިން ޣައްޒާގައި ހިންގަން ފެށި ހަނގުރާމަ އަށް ދެ އަހަރުވާން ކައިރިވެފައިވާއިރު، ބައިނަލްއަޤުވާމީ މުޖުތަމައު އަދި މުޅި ދުނިޔޭގެ ނުރުހުން ވަނީ އިސްރާއީލް އަށް އަމާޒުވެފަ އެވެ. އަދި ހަނގުރާމަ ހުއްޓާލުމަށް ގޮވާލައި، ގިނަ ޤައުމު ތަކުން އަންނަނީ އިސްރާއީލް އަށް ޕްރެޝަރު ކުރަމުންނެވެ.

ދެ ދައުލަތުގެ ޙައްލަކީ 1967 ވަނަ އަހަރު އިސްރާއީލް އިން ހިފާފައިވާ ސަރަހައްދު ތަކުގައި ފަލަސްޠީނުގެ ދައުލަތެއް ޤާއިމުކޮށް، ދެ ދައުލަތް އެކުގައި ސުލްޙަވެރިކަމާ އެކު ދިރިއުޅުމުގެ ވިސްނުމެވެ. މިދިޔަ އަހަރު އދ ގެ އެންމެ މަތީ ކޯޓުން ނިންމާފައި ވަނީ، އިސްރާއީލް އިން ފަލަސްޠީނުގެ ބިންތައް އަތުލައި ގަތުމާއި، އާބާދީތައް އިތުރު ކުރުމަކީ ޤާނޫނާ ޚިލާފު ކަމެއް ކަމަށެވެ.