ފަލާހު ނޫސްވެރިން "އުލުބައިންދަން" ޖެހޭކަމަށް ވިދާޅުވެ ދެއްކެވި ވާހަަކަ އަށް ނޫސްވެރިންގެ ކިބައިން މާފަށް އެދެން ގޮވާލައިފި

ބައެއް މީޑިއާތަކުން މަސައްކަތް ކުރާ ގޮތުން އެ މީޑިއާގެ މުވައްޒަފުން އުލުބައިންދަން ޖެހޭ ކަމަށް ވިދާޅުވެ، ވެރިކަން ހިންގާ ޕްރޮގްރެސިވް ޕާޓީ އޮފް މޯލްޑިވްސްގެ ޕާލަމެންޓަރީ ގްރޫޕުގެ ލީޑަރު އިބްރާހިމް ފަލާހު ދެއްކެވި ވާހަކަ އަށް، ނޫސްވެރިންގެ ކިބައިން މައާފަށް އެދެން ޖެހޭ ކަމަށް މޯލްޑިވްސް މީޑިއާ ކައުންސިލްގެ މެމްބަރުން ބުނެފި އެވެ.

މިނިވަން މީޑިއާ ނެތިކޮށްލަން ތުޅާދޫ މަޖިލިސް މެމްބަރު އަންދުލް ހަންނާން އަބޫބަކުރު، ހުށަހަޅާފައިވާ ބިލަށް ވާހަކަ ދައްކަވަމުން ފަލާހު ވިދާޅުވީ އޭނާއާ ގުޅޭ ގޮތުން ބައެއް މީޑިއާތަކުން ދޮގު ހަބަރުތަކެއް މީގެ ކުރިން ފަތުރާފައިވާ ކަމަށެވެ. އަދި ވިދާޅުވީ އެގޮތަށް މަސައްކަތް ކުރާ މީޑިއާގެ މުވައްޒަފުން އުލުބައިންދަންޖެހޭ ކަމަށެވެ.

މި ލެވެލުގައި މަސައްކަތް ކުރީމަ މީޑިއާ ގެންގޮސް ޖަލަކަށް ނޫން [ލާންވީ]، އުލުބައިންދަންވަނީ. އުލުބައިންދަންވީ

ޕީއެންސީ ޕީޖީ ލީޑަރު އަދި އިނގުރައިދޫ ދާއިރާގެ މަޖިލިސް މެމްބަރު އިބުރާހީމް ފަލާހު

އޭނާއަކީ އެއްޖިންސުން ގުޅުން ހިންގާ މީހެއް ކަމަށް ބުނެ މީޑިއާތަކުން ދޮގު ހެދި ކަމަށް ފަލާހު ބުންޏެވެ. ފަލާހު އެހެން ވިދާޅުވި ނަމަވެސް އެއްވެސް މީޑިއާއަކުން އެފަދަ ހަބަރެއް ނުލިޔެ އެވެ. އެ ވާހަކަ ބޮޑަށް ދައުރުވީ ސޯޝަލް މީޑިއާގަ އެވެ.

ދިވެހި ރަދީފުގައި ބުނެފައިވާ ގޮތުން އުލުބޭންދުމަކީ އިހު ޒަމާނުގައި މީހުން މަރަން ގެންގުޅުނު ވަރަށް އަނިޔާވެރި އަދި ލާއިންސާނީ އުކުޅެކެވެ.

ފަލާހުގެ މި ވާހަކަތަކަށް ވަރަށް ބޮޑަށް ކަންބޮޑުވުން ފާޅުކުރައްވައި ބުދަ ދުވަހުގެ ރޭ މީޑިއާ ކައުންސިލުން ބޭއްވި ނޫސްވެރިންގެ ބައްދަލުވުމުގައި އެ ކައުންސިލުގެ މެމްބަރުން ވިދާޅުވެފައިވަނީ ނޫސްވެރިންނަށް ރައްދުވާ ގޮތަށް ބުދަ ދުވަހު ދައުރުން ބޭރުން ބޭއްވި މަޖިލިސް ޖަލްސާގައި މެމްބަރު ފަލާހު ދެއްކެވި ވާހަތަކާއި މެދު ހުރިހާ ނޫސްވެރިން ވެސް ކަންބޮޑުވުން ފާޅުކުރަމުން ގެންދާ ކަމަށެވެ.

އެގޮތުން އެ ކައުންސިލް މެމްބަރުން ފާހަގަކުރެއްވި ގޮތުގައި މީޑިއާގެ ކޮންޓްރޯލް އަތުލާ ބިލުގެ ދިފާއުގައި ފަލާހު ވާހަކަދެއްކެވީ ނޫސްވެރިންގެ އަގު ވެއްޓޭ ގޮތަށެވެ. އެގޮތުން ނޫސްވެރިންނަކީ ދޮގު ހަދައި އޮޅުވާލައިގެން މީހުންގެ އަބުރު ކަތިލުމަށް ޚަބަރުތައް ލިޔެ ފަތުރާ ބައެއް ކަމުގެ ތުހުމަތު ވެސް ނޫސް ވެރިންގެ މައްޗަށް ފަލާހު ކޮށްފައިވާ ކަމަށް ވެސް މީޑިއާ ކައުންސިލް މެމްބަރުން ވިދާޅުވި އެވެ.

މީޑިއާ ކައުންސިލްގެ މެބަރުން ފާހަގަކުރި ގޮތުގައި ފަލާހު ނޫސްވެރިން އުލުބައިދަން ޖެހޭކަމަށް ތަކުރާރުކޮށް މަޖިލިސް ތަޅުމުގައި ވިދާޅުވުމަކީ ބަލައިނުގަނެވޭނެ، ވަރަށް ދަށުދަރައިޖައިގެ އަމަލެކެވެ. އަދި އެ ވާހަތަކަށް ނޫސްވެރިންގެ ކިބައިން މެމްބަރު ފަލާހު މައާފަށް އެދެން ޖެހޭނޭ ކަމަށް ވެސް އެ މެމްބަރުން ވިދަޅުވި އެވެ.

ބިލުގައި ހަމަ އެކަނި ނޫސްވެރިންގެ ހައްގުތަކެއް ނޫން. ސޯޝަލް މީޑިއާގެ އެކި މަންސަތަކުގައި ޚިޔާލުފާޅުކުރާ ފަރާތްތަކާ، ކޮންޓެންތް ކްރިއޭޓަރުންނާ، މި ހުރިހާ ފަރާތްތަކަށް މި ބިލުން އެބަ އިފެކްޓް ކުރޭ. ނޫސްވެރިންނަކީ ވަރަށް ޚުދުމުހުތާރު ބައެއްގެ ގޮތުގައި ލޭބަލް ކޮށް، ދައްކަމުންގެންދާ ވާހަތަށް އަޅުގަނޑު ހަރުކަށި އިބާރާތުން ކުއްވެރިކުރަން

މީޑިއާ ކައުންސިލް މެމްބަރު ފާޠިމަތު ނަހުދާ ފާއިޒު

ނަހުދާގެ އިތުރުން ކައުންސިލް މެމްބަރު ލީވާން ވެސް ވަނީ މެމްބަރު ފަލާހު ނޫސްވެރިން އުލުބައިދަން ޖެހޭ ކަމަށް ބުނެ ދެއްކިވާހަތަކަކީ ބަލައިގަނެވޭނޭ ވާހަތަކެއް ނޫން ކަމަށް ވިދާޅުވެފަ އެވެ.

ނޫސްވެރިން މުލިއާގެ ގޭޓު މަތިން އަރަން އުޅެނިއްޔޭ، ރައީސް އޮފީހުގެ ގޭޓުމަތިން އަރަން އުޅެނިއްޔޭ ކިޔައިގެން ނޫސްވެރިންގެ އަގުވައްޓާލަން ވެސް މިއަދު ބަޔަކު މަސައްކަތް ކޮށްފި. އަނެއްކޮޅުން ޕީއެންސީ ޕީޖީ ލީޑަރު މިއަދު މަޖިލީހުގައި އެ ދެއްކެވި ވާހައަކީ ނޫސްވެރިން އުލުބައިދަން ޖެހޭ ވާހަކަ. މިއީ ކޮންކަހަލަ ވާހަކައެއްތޯ ނޫސްވެރިންނާއި ގުޅޭގޮތުން އެ ދެއްކެވީ..؟ ކީކޭތޯ މި މިޔަނީ..؟ ހަގީގަތުގައި ވެސް މެމްބަރު ފަލާހު ޖެހޭނެ މިއަދު ނޫސްވެރިންގެ ކިބައިން މައާފަށް އެދެން.. އެއީ ހުރިހާ ނޫސްވެރިންނަށް ނިސްބަތްކޮށްފަ ފަލާހު ވިދާޅުވީ، ނޫސްވެރިން އުލުބައިދަން ޖެހޭ ވާހަކަ.. މި ކޮންކަހަލަ ވާހަކައެއްތޯ މި ދައްކަނީ..؟

މީޑިއާ ކައުންސިލް މެމްބަރު ލީވާން

މީޑިއާ ކައުންސިލްގެ މެމްބަރުންގެ އިތުރުން ފަލާހުގެ އެ ވާހަކަތަކާ ގުޅިގެން އެތައް ބަޔަކު އަންނަނީ ސޯޝަލްމީޑިއާގައި ނުރުހުން ފާޅުކޮށް އޭނާއަށް ފާޑުކިޔަމުންނެވެ. އެގޮތުން ހިޔާލުފާޅުކުރި ބައެއް މީހުން ބުނެފައި ވަނީ ބަޔަކަށް އަނިޔާވެރިވުމަށް މަޖިލީހުގެ މެންބަރަކު ގޮވައިލުމަކީ ތަހުގީގު ކުރަންޖެހޭ ވަރުގެ ބޮޑު މައްސަލައެއް ކަމަށެވެ. އަދި އެފަދަ މީހަކު މަޖިލީހުގައި ހުންނަން ކުފޫ ހަމަވޭތޯ ވެސް ބައެއް މީހުން ސުވާލު އުފައްދާފައިވެ އެވެ.

ފަލާހު ދެއްކެވި ވާހަކައަށް ފާޑުވިދާޅުވެ ގާނޫނީ ވަކީލު، އަހުމަދު މައުރޫފް ކުރެއްވި ޕޯސްޓެއްގައި ވިދާޅުވީ ނޫސްވެރިންނަށް ލާއިންސާނީ އަދަބު ދިނުމަށް ވެރިކަން ކުރާ ޕާޓީއަށް ނިސްބަތްވާ މަޖިލިސް މެންބަރަކު ގޮވައިލުމުން އެމީހުންގެ މަގުސަދާއި ވިސްނުން ހާމަވާ ކަމަށެވެ.